ಕೇಂದ್ರ ಹಚ್ಚಿದ ಬೆಂಕಿಗೆ ತುಪ್ಪ ಸುರಿದ ಸಚಿವ ಅಶೋಕ

ಬೆಂಗಳೂರು ಜೂ 26: ಕೇಂದ್ರದ ಯುಪಿಎ ಸರ್ಕಾರ ಆರನೇ ಬಾರಿ ಡೀಸೆಲ್‌ ಬೆಲೆ ಏರಿಕೆ ಮಾಡಿ ದಾಖಲೆ ಮಾಡಿದ ಬೆನ್ನಲ್ಲೇ ರಾಜ್ಯ ಸರ್ಕಾರ ಸಾರಿಗೆ ಸಂಸ್ಥೆಯ ನಾಲ್ಕು ವಿಭಾಗಗಳ ಪ್ರಯಾಣ ದರವನ್ನು ಹೆಚ್ಚಿಸಿದೆ. ಜನಸಾಮಾನ್ಯರ ಹೊಟ್ಟೆಗೆ ಕೇಂದ್ರ ಸರ್ಕಾರ ಹಚ್ಚಿದ ಬೆಂಕಿಗೆ ರಾಜ್ಯ ಸಾರಿಗೆ ಸಚಿವ ಆರ್ ಅಶೋಕ್ ಅವರು ತಕ್ಷಣವೇ ತುಪ್ಪ ಸುರಿದು ಒಡಲ ಉರಿಯನ್ನು ಹೆಚ್ಚಿಸಿದ್ದಾರೆ.

ರಾಜ್ಯ ಸರ್ಕಾರ ರಾಜ್ಯ ರಸ್ತೆ ಸಾರಿಗೆ ಸಂಸ್ಥೆಯ ಬಸ್‌ಗಳ ಪ್ರಯಾಣ ದರ ಶನಿವಾರ ಮಧ್ಯ ರಾತ್ರಿಯಿಂದಲೇ ಜಾರಿ ಬಂದಿದ್ದು, ಶೇ.7ರಷ್ಟು ಹೆಚ್ಚಳವಾಗಿದೆ. ಬಿಎಂಟಿಸಿ, ಕೆಎಸ್ ಆರ್ ಟಿಸಿ, ವಾಯುವ್ಯ ಸಾರಿಗೆ ಮತ್ತು ಈಶಾನ್ಯ ಸಾರಿಗೆ ಬಸ್ ಗಳ ಪ್ರಯಾಣದಲ್ಲಿ ಶೇ.5.12 ರಿಂದ ಶೇ 6.95ರಷ್ಟು ಏರಿಕೆಯಾಗಿದೆ. ವೋಲ್ವೋ ಬಸ್ ದರದಲ್ಲಿ ಶೇ 8 ರಷ್ಟು ದರ ಏರಿಕೆ ಕಂಡಿದೆ.

ಸಾಮಾನ್ಯ ಸಾರಿಗೆ ದರದಲ್ಲಿ ಶೇ 5.12, ರಾಜಹಂಸ ಬಸ್ ಪ್ರಯಾಣ ದರ ಶೇ 6.95 ಹಾಗೂ ಬಿಎಂಟಿಸಿ ದರದಲ್ಲಿ ಮೊದಲ ಹಂತ ಹೊರತುಪಡಿಸಿ ನಂತರದ ಸ್ಟೇಜ್ ಗಳಲ್ಲಿ ರು 1 ರಿಂದ 2ರಷ್ಟು ಏರಿಕೆ ಆಗಿದೆ. ಬಿಎಂಟಿಸಿ ದಿನದ ಪಾಸ್, ಮಾಸಿಕ ಬಸ್ ದರ ಕೂಡ ಹೆಚ್ಚಳ ಕೊಂಡಿದೆ.ಗುರುತಿನ ಚೀಟಿ ಇರುವ ದಿನದ ಪಾಸ್ ದರ 35 ರು.ನಿಂದ 40 ರು. ಗುರುತಿನ ಚೀಟಿ ಇಲ್ಲದ್ದು 45ರು ಹಾಗೂ ವಜ್ರ ಗೋಲ್ಡ್ ದರ 90 ರು.ಗಳಾಗಿದೆ.

	ವೇಗದೂತ		ರಾಜಹಂಸ
ಊರಿನ ಹೆಸರು	ಹಿಂದಿನ ದರ(ರೂ.ಗಳಲ್ಲಿ)	ಈಗಿನ ದರ	ಹಿಂದಿನ ದರ	ಈಗಿನ ದರ
ಮೈಸೂರು	95	101	143	153
ಮಂಗಳೂರು	237	253	357	385
ಹುಬ್ಬಳ್ಳಿ	273	291	413	444
ಮಂಡ್ಯ	67	72	100	107
ಧಾರವಾಡ	284	304	431	464
ಗುಲ್ಬರ್ಗಾ	412	441	628	676
ಬಳ್ಳಾರಿ	213	227	321	345
ದಾವಣಗೆರೆ	182	193	271	292
ಶಿವಮೊಗ್ಗ	193	206	290	312
ಬೆಳಗಾವಿ	332	355	505	544

English summary

Following hike in Diesel price by UPA govt, Karnataka government also hiked Karnataka State Road Transport Corporation KSRTC bus fares by 7 percent..The fare will be hiked in four bus services including KSRTC, north-east, north-west and BMTC announced Transport minister R Ashok.