ಬಿಡಿಎ ನಿವೇಶನ ಖರೀದಿಗೆ ಕಾರ್ಪ್ ಬ್ಯಾಂಕ್ ನೆರವು

ಬೆಂಗಳೂರು, ಅ.20: ಬೆಂಗಳೂರು ಅಭಿವೃದ್ಧಿ ಪ್ರಾಧಿಕಾರ(ಬಿಡಿಎ)ದಿಂದ ನಿವೇಶನ ಮತ್ತು ಮನೆ ಕೊಳ್ಳುವವರಿಗೆ ಆರ್ಥಿಕ ನೆರವು ಸೇರಿದಂತೆ ಎಲ್ಲ ಬಗೆಯ ಸೌಲಭ್ಯ ಒದಗಿಸಲು ಕಾರ್ಪೊರೇಷನ್ ಬ್ಯಾಂಕ್ ಮುಂದಾಗಿದೆ. ಈ ಸಂಬಂಧ ಮಂಗಳವಾರ ಬಿಡಿಎ ಕಚೇರಿಯಲ್ಲಿ ಹಮ್ಮಿಕೊಂಡಿದ್ದ ಕಾರ್ಯಕ್ರಮದಲ್ಲಿ ಬಿಡಿಎ ಅಧ್ಯಕ್ಷೆ ವತ್ಸಲಾ ವತ್ಸಾ, ಆಯುಕ್ತ ಭರತ್‌ಲಾಲ್ ಮೀನಾ ಮತ್ತು ಕಾರ್ಪೋರೇಷನ್ ಬ್ಯಾಂಕ್‌ನ ನಿರ್ವಾಹಕ ನಿರ್ದೇಶಕ ರಾಮನಾಥ್ ಪ್ರದೀಪ್ ಸಹಯೋಗದಲ್ಲಿ ಈ ಒಡಂಬಡಿಕೆ(MoU)ಗೆ ಸಹಿ ಹಾಕಲಾಯಿತು.

ಈ ಒಡಂಬಡಿಕೆಯಿಂದಾಗಿ ಇನ್ನು ಮುಂದೆ ಬಿಡಿಎ ನಿವೇಶನ ಮತ್ತು ಮನೆ ಖರೀದಿ ಮಾಡುವವರಿಗೆ ಕಾರ್ಪೊರೇಷನ್ ಬ್ಯಾಂಕ್ ಆಕರ್ಷಕ ಹಾಗೂ ಕಡಿಮೆ ಬಡ್ಡಿ ದರದಲ್ಲಿ ಸಾಲ ಸೌಲಭ್ಯ ನೀಡಲಿದೆ. ಇದರೊಂದಿಗೆ ಬಿಡಿಎ ನೌಕರರಿಗೂ ವಿವಿಧ ರೀತಿಯ ಸಾಲ ಸೌಲಭ್ಯ ಸಹ ದೊರೆಯಲಿದೆ.

ಬಿಡಿಎಯ ಮುಂದಿನ ಯೋಜನೆಗಳಿಗೆ ಬಂಡವಾಳ ಹೂಡಲು ಮುಂದಾಗಿರುವ ಬ್ಯಾಂಕ್, ಆರ್ಥಿಕವಾಗಿ ಹಿಂದುಳಿದವರಿಗೆ, ಸಣ್ಣ ಪ್ರಮಾಣದ ಮನೆಗಳು ಹಾಗೂ ನಿವೇಶನಗಳ ಖರೀದಿಗೆ ಕಡಿಮೆ ಬಡ್ಡಿ ದರದಲ್ಲಿ ಸಾಲ ಒದಗಿಸುವುದರೊಂದಿಗೆ, ಅರ್ಜಿಗಳನ್ನೂ ಸಹ ನೀಡಲಿದೆ.

ಆನ್‌ಲೈನ್ ಬ್ಯಾಂಕಿಂಗ್: ಆನ್ ಲೈನ್ ಬ್ಯಾಂಕಿಂಗ್ ಮೂಲಕ ಐಟಿ ಸೌಲಭ್ಯಗಳನ್ನು ಒದಗಿಸಲು ನಿರ್ಧರಿಸಿದೆ. ಇದರಿಂದಾಗಿ ಇನ್ನು ಮುಂದೆ ಬಿಡಿಎಯಿಂದ
ಯಾವುದೇ ಸೌಲಭ್ಯಗಳನ್ನು ಪಡೆಯಲು ಕಚೇರಿ ಮುಂದೆ ಸಾಲು ನಿಲ್ಲುವ ಅಗತ್ಯವಿಲ್ಲ ಇದಕ್ಕೆ ಬದಲಾಗಿ ಆನ್‌ಲೈನ್ ಮೂಲಕವೇ ಬ್ಯಾಂಕ್‌ನಿಂದ
ಅರ್ಜಿಗಳನ್ನು ಪಡೆಯುವುದು, ಸಲ್ಲಿಸುವುದು, ಆಸ್ತಿ ತೆರಿಗೆ, ಸೇರಿದಂತೆ ಎಲ್ಲ ವ್ಯವಹಾರಗಳನ್ನು ಆನ್‌ಲೈನ್ ಮೂಲಕವೇ ಮಾಡಬಹುದಾಗಿದೆ ಎಂದು ಬ್ಯಾಂಕ್‌ನ ನಿರ್ವಾಹಕ ನಿರ್ದೇಶಕ ರಾಮನಾಥ್ ಪ್ರದೀಪ್ ಹೇಳಿದರು.