ಸಿದ್ದು ಸಿಎಂ, ರೇವಣ್ಣ ಡಿಸಿಎಂ ರೇಣುಕಾ ಕನಸು

ಬೆಂಗಳೂರು, ಅ.7: "ಸಿದ್ದರಾಮಯ್ಯ ಅವರನ್ನು ಸಿಎಂ ಮಾಡುವುದು ಹಾಗೂ ಎಚ್ ಡಿ ರೇವಣ್ಣ ಡಿಸಿಎಂ ಮಾಡುವುದು ಹಾಗೂ ಕುಮಾರಸ್ವಾಮಿ ಅವರಿಗೆ ಕೇಂದ್ರದಲ್ಲಿ ಮಂತ್ರಿಸ್ಥಾನಕ್ಕೆ ಬೆಂಬಲಿಸುವುದು. ಇದು ಈ ಎಲ್ಲಾ ಭಿನ್ನಮತದ ಹಿಂದಿನ ಗುಟ್ಟು" ಎಂದು ಗುಟ್ಟು ಬಿಚ್ಚಿಟ್ಟವರು ಹರಿಹರದ ಶಾಸಕ ಹರೀಶ್. "ಭಿನ್ನಮತೀಯರ ಗುಂಪಿನಿಂದ ನಾನು ಹೊರಬಿದ್ದ ಮೇಲೆ ನನಗೆ ಅಪರಿಚಿತರಿಂದ ಬೆದರಿಕೆ ಕರೆಗಳು ಬರುತ್ತಿದೆ. ಈ ಬಗ್ಗೆ ರೇಣುಕಾಚಾರ್ಯ ವಿರುದ್ಧ ವಿಧಾನಸೌಧ ಪೊಲೀಸ್ ಠಾಣೆಗೆ ದೂರು ನೀಡಿದ್ದೇನೆ" ಎಂದಿದ್ದಾರೆ.

ಮುಖ್ಯಮಂತ್ರಿಗಳ ಅಣತಿಯ ಮೇರೆಗೆ ನಾನು ಚೆನ್ನೈಗೆ ಹೋಗಿ ಭಿನ್ನಮತೀಯರ ಓಲೈಕೆ ಮಾಡಲು ಹೋದಾಗ, ಕೆಲ ಗೂಂಡಾಗಳು, ಅಪಹರಣ ಮಾಡುವ ವಿಫಲ ಯತ್ನ ನಡೆಸಿದ್ದರು. ಸರ್ಕಾರಕ್ಕೆ ಕೊಟ್ಟಿರುವ ಬೆಂಬಲ ವಾಪಾಸ್ ಪಡೆಯುತ್ತೇನೆ ಎಂದು ಪತ್ರಕ್ಕೆ ಸಹಿ ಹಾಕುವಂತೆ ಬಲಾತ್ಕರಿಸಿದರು. ಆದರೆ, ತಕ್ಷಣವೇ ಆ ರೆಸಾರ್ಟ್ ಖಾಲಿ ಮಾಡಿ ಅಲ್ಲಿಂದ 5 ಕಿ.ಮೀ ದೂರದ ಬೇರೊಂದು ಹೋಟೆಲ್ ಸೇರಿಕೊಂಡೆ. ಕಡೆಗೆ, ಸಂಧಾನಕ್ಕೆ ಬಂದ ಆರ್ ಅಶೋಕ್, ಶ್ರೀರಾಮುಲು ಹಾಗೂ ಬೊಮ್ಮಾಯಿ ಅವರೊಂದಿಗೆ ಬೆಂಗಳೂರಿಗೆ ವಾಪಾಸ್ ಬಂದೆ ಎಂದು ವಿವರಿಸಿದರು.

ರೇಣುಕಾಚಾರ್ಯ ಹಾಗೂ ಬೇಳೂರು ಗೋಪಾಲಕೃಷ್ಣ ಅವರು ವಿಪಕ್ಷಗಳ ಜೊತೆ ಅನೈತಿಕವಾಗಿ ಕೈ ಜೋಡಿಸಿ, ಬಿಜೆಪಿಗೆ ದ್ರೋಹ ಬಗೆಯುವ ಕಾರ್ಯದಲ್ಲಿ ತೊಡಗಿದ್ದಾರೆ. ಇದು ಸಾಧ್ಯವಿಲ್ಲದ ಮಾತು. ರೆಡ್ಡಿಗಳ ಸಹಾಯದಿಂದ ಸಮಸ್ಯೆ ಸುಸೂತ್ರವಾಗಿ ಬಗೆಹರಿಯಲಿದೆ ಎಂದು ಹರೀಶ್ ಖಾಸಗಿ ವಾಹಿನಿಯೊಂದಕ್ಕೆ ನೀಡಿದ ಸಂದರ್ಶನದಲ್ಲಿ ಹೇಳಿದರು.

ಸೆಲ್ ಫೋನಿನಲ್ಲಿ ದಟ್ಸ್ ಕನ್ನಡ ಓದುವ ಸಂಭ್ರಮ