ಸ್ಥಿರ ದೂರವಾಣಿಗೂ ಹತ್ತು ಅಂಕಿ:ಟ್ರಾಯ್

ನವದೆಹಲಿ, ಆ.23: 2011 ರ ಡಿಸೆಂಬರ್ ನಿಂದ ಸ್ಥಿರ ದೂರವಾಣಿಗಳಿಗೂ 10 ಅಂಕಿಗಳನ್ನು ಅಳವಡಿಸಿಕೊಳ್ಳುವಂತೆ ಟೆಲಿಕಾಂ ರೆಗ್ಯುಲೇಟರಿ ಅಥಾರಿಟಿ ಆಫ್ ಇಂಡಿಯಾ(TRAI) ಶಿಫಾರಸು ಮಾಡಿದೆ.

ಈಗ ಮೊಬೈಲ್ ದೂರವಾಣಿಗಳು ಮಾತ್ರ 10ಅಂಕಿಗಳನ್ನು ಹೊಂದಿದ್ದು ಸ್ಥಿರ ದೂರವಾಣಿಗಳು 8 ಅಂಕಿಗಳನ್ನು ಹೊಂದಿವೆ. ಈ ಹಿಂದೆ ಟ್ರಾಯ್ ಎಲ್ಲಾ ದೂರವಾಣಿಗಳಿಗೂ 11 ಅಂಕಿಗಳನ್ನು ಅಳವಡಿಸಿಕೊಳ್ಳುವಂತೆ ಸೂಚನೆ ನೀಡಲು ನಿರ್ಧರಿಸಿತ್ತು.

ಆದರೆ, ಇದರಿಂದ ಗ್ರಾಹಕರಿಗೆ ಗೊಂದಲ, ಟೆಲಿಕಾಮ್ ಕಂಪೆನಿಗಳು ತಂತ್ರಜ್ಞಾನವನ್ನು ಉನ್ನತೀಕರಿಸಲು ಭರಿಸಬೇಕಾದ ಹೆಚ್ಚಿನ ವೆಚ್ಚ ಮತ್ತು ಪುನಃ ಗ್ರಾಹಕರಿಗೆ ಹೊಸ ಸಿಮ್ ಕಾರ್ಡ್ ಗಳನ್ನು ವಿತರಿಸಬೇಕಾದ ತೊಂದರೆಯಿಂದ ಈ ಪ್ರಸ್ತಾವನೆಯನ್ನು ಕೈ ಬಿಟ್ಟಿತ್ತು.

ಸ್ಥಿರ ದೂರವಾಣಿಗಳು 10 ಅಂಕಿಗಳನ್ನು ಹೊಂದಲು ಎಲ್ಲಾ ಸಿದ್ಧತೆಯನ್ನು ಮುಂದಿನ ಸೆಪ್ಟೆಂಬರ್ 2011ರೊಳಗೆ ಮಾಡಬೇಕಿದೆ ಎಂದು ಟ್ರಾಯ್ ಹೇಳಿದ್ದು, ತನ್ನ ಇಫಿಶಿಯಂಟ್ ಯೂಸೇಜ್ ಆಫ್ ನಂಬರಿಂಗ್ ರಿಸೋರ್ಸಸ್ ಇನ್ ಇಂಡಿಯಾದ ವರದಿಯಲ್ಲಿ ಈ ವಿಷಯ ಸ್ಪಷ್ಟಪಡಿಸಿದೆ.

10 ಅಂಕಿಗಳ ಸಂಖೆಯನ್ನು ದೇಶದ ಎಲ್ಲಾ ದೂರವಾಣಿಗಳಿಗೆ ಅಳವಡಿಸುವುದರಿಂದ ಮುಂದಿನ 30-40 ವರ್ಷಗಳವರೆಗೆ ಹೊಸ ಸಂಪರ್ಕಗಳನ್ನು ಅಡ್ಡಿಯಿಲ್ಲದೆ ನೀಡಬಹುದಾಗಿದೆ, ಅಲ್ಲದೆ ನಂಬರ್ ಪೋರ್ಟೆಬಿಲಿಟಿ ಸೌಲಭ್ಯವನ್ನು ಸ್ಥಿರ ದೂರವಾಣಿಗಳಿಗೂ ನೀಡಬಹುದಾಗಿದೆ.

ಈಗಿನ ನಂಬರಿಂಗ್ ಸಿಸ್ಟಮ್ ನ್ನು 750 ಮಿಲಿಯ ಗ್ರಾಹಕರಿಗೆ ಸಂಪರ್ಕ ನೀಡಲು ಬಳಸಬಹುದಾಗಿದ್ದು, 2014ಕ್ಕೆ ದೇಶದ ಗ್ರಾಹಕರ ಸಂಖ್ಯೆ ಒಂದು ಬಿಲಿಯನ್ ಮೀರಲಿದೆ ಎನ್ನಲಾಗಿದೆ.