ಎರಡು ತಿಂಗಳು ಫೇಸ್ ಬುಕ್ ವೀಕ್ಷಣೆ ಉಚಿತ!

ನವದೆಹಲಿ, ಜು.6: ದೇಶದ ಅತೀ ದೊಡ್ಡ ಮೊಬೈಲ್ ಸೇವಾ ಕಂಪೆನಿ ಭಾರ್ತಿ ಏರ್ ಟೆಲ್ ತನ್ನ ಗ್ರಾಹಕರಿಗೆ ಮೊಬೈಲ್ ಇಂಟರ್ ನೆಟ್ ಮೂಲಕ ಉಚಿತವಾಗಿ ಸಾಮಾಜಿಕ ತಾಣ ಫೇಸ್ ಬುಕ್ ನ್ನು ವೀಕ್ಷಿಸಲು ಅನುವು ಮಾಡಿಕೊಟ್ಟಿದೆ.

ಸೋಮವಾರ ಈ ಕುರಿತು ಪ್ರಕಟಿಸಿದ ಕಂಪೆನಿ ಮುಂದಿನ ಎರಡು ತಿಂಗಳ ಕಾಲ ಫೇಸ್ ಬುಕ್ ತಾಣ ಜಾಲಾಡಲು ಕಂಪೆನಿ ಯಾವುದೇ ಶುಲ್ಕ ವಿಧಿಸುವುದಿಲ್ಲ ಎಂದು ಕಂಪೆನಿಯ ಮುಖ್ಯ ಮಾರುಕಟ್ಟೆ ಅಧಿಕಾರಿ ಶಿರೀಷ್ ಜೋಷಿ ಹೇಳಿದ್ದಾರೆ.

ಭಾರ್ತಿಯ 13 ಮಿಲಿಯನ್ ಮೊಬೈಲ್ ಇಂಟರ್ ನೆಟ್ ಸಂಪಕ್ ಹೊಂದಿರುವ ಗ್ರಾಹಕರು ಈ ಸೇವೆಯನ್ನು ಪಡೆದುಕೊಳ್ಳಲಿದ್ದಾರೆ ಎಂದು ಅವರು ಹೇಳಿದ್ದಾರೆ. ಫೇಸ್ ಬುಕ್ ನ ಮೊಬೈಲ್ ವ್ಯವಹಾರದ ಮುಖ್ಯಸ್ಥ ಹೆನ್ರಿ ಮೊಯಿಸ್ಸಿನಾಕ್ ಅವರು ಸುದ್ದಿಗಾರರೊಂದಿಗೆ ಮಾತನಾಡಿ ವಿಶ್ವಾದ್ಯಂತ ಸುಮಾರು 100 ಮಿಲಿಯನ್ ಫೇಸ್ ಬುಕ್ ಬಳಕೆದಾರರು ಮೊಬೈಲ್ ಮೂಲಕ ತಾಣದ ಸಂಪರ್ಕ ಪಡೆಯುತ್ತಿದ್ದಾರೆ ಎಂದು ತಿಳಿಸಿದರು.