ಭಾರತದ ಮೇಲೆ ಮಿಸೈಲ್ ದಾಳಿಗೆ ಪಾಕ್ ಹುನ್ನಾರ?

ವಾಷಿಂಗ್ಟನ್, ಆ. 30 : ಆಂತರಿಕೆ ಭದ್ರತೆಗಾಗಿ ಅಮೆರಿಕ ನೀಡಿದ್ದ ಯುದ್ಧಾಸ್ತ್ರಗಳನ್ನು ಪಾಕಿಸ್ತಾನ ಅಮೆರಿಕಕ್ಕೆ ತಿಳಿಸದೆ ಆಧುನೀಕರಿಸಿದ್ದು, ಭಾರತದ ಮೇಲೆ ದಾಳಿ ನಡೆಸಲು ಹುನ್ನಾರ ನಡೆಸಿದೆ ಎಂದು ಅಮೆರಿಕದ ಗುಪ್ತಚರ ಸಂಸ್ಥೆ ಬಹಿರಂಗಪಡಿಸಿದೆ ಎಂದು ನ್ಯೂಯಾರ್ಕ್ ಟೈಮ್ಸ್ ಪತ್ರಿಕೆ ವರದಿ ಮಾಡಿದೆ.

1980ರಲ್ಲಿ ಪಾಕಿಸ್ತಾನಕ್ಕೆ ಮಾರಾಟ ಮಾಡಲಾಗಿದ್ದ ಹಾರ್ಪೂನ್ ನೌಕೆ ವಿರೋಧಿ ಮಿಸೈಲನ್ನು ಪಾಕಿಸ್ತಾನ ಮಾರ್ಪಡಿಸಿ ಏಪ್ರಿಲ್ 23ರಂದು ಪರೀಕ್ಷಾ ಪ್ರಯೋಗ ನಡೆಸಿದೆ. ಈ ಬಗ್ಗೆ ಅಮೆರಿಕಕ್ಕೆ ಪಾಕಿಸ್ತಾನ ತಿಳಿಸಿಲ್ಲ ಎಂದು ಅಮೆರಿಕದ ಬೇಹುಗಾರಿಕಾ ಸಂಸ್ಥೆ ತಿಳಿಸಿದೆ. ಈ ಕುರಿತು ಅಮೆರಿಕ ತನ್ನ ಅಸಮಾಧಾನ ಮತ್ತು ವಿರೋಧವನ್ನು ಪಾಕಿಸ್ತಾನದ ಪ್ರಧಾನಿ ಯುಸೂಫ್ ಗಿಲಾನಿ ಮತ್ತು ಇತರ ಹಿರಿಯ ಅಧಿಕಾರಿಗೆ ತಿಳಿಸಿದೆ ಎಂದು ವರದಿಯಾಗಿದೆ.

ಮುಂದಿನ ಐದು ವರ್ಷಗಳಲ್ಲಿ ಪಾಕಿಸ್ತಾನಕ್ಕೆ ಅಮೆರಿಕ ನೀಡಲಿರುವ 7.5 ಮಿಲಿಯನ್ ಡಾಲರ್ ಸಹಾಯದ ಅನುಮೋದನೆ ನೀಡಬೇಕಾಗಿರುವ ಸಂದರ್ಭದಲ್ಲಿ ಈ ವಿಷಯ ಪ್ರಸ್ತಾಪವಾಗಿದೆ. ಭಾರತದೊಡನೆ ಕಾಲುಕೆದರಿ ಜಗಳಕ್ಕೆ ನಿಲ್ಲುವ ಬದಲು ಆಂತರಿಕವಾಗಿ ತಾಲಿಬಾನಿಗಳನ್ನು ಹತ್ತಿಕ್ಕುವತ್ತ ಗಮನಹಸಿರಬೇಕೆಂದು ಅಮೆರಿಕ, ಪಾಕಿಸ್ತಾನ ಸರಕಾರ ಒತ್ತಾಯಿಸುತ್ತಿದೆ.

(ಏಜೆನ್ಸೀಸ್)