ಸೈನಾ ಔಟ್ : ಭಗ್ನಗೊಂಡ ಕನಸು

ಹೈದರಾಬಾದ್, ಆ. 15 : ಭಾರತದ ಬ್ಯಾಡ್ಮಿಂಟನ್ ಅಭಿಮಾನಿಗಳು ಕಳೆದ ಕೆಲದಿನಗಳಿಂದ ಕಾಣುತ್ತಿದ್ದ ಕನಸು ಗಚ್ಚಿಬೌಳಿ ಒಳಾಂಗಣ ಕ್ರೀಡಾಂಗಣದಲ್ಲಿ ಶುಕ್ರವಾರ ರಾತ್ರಿ ಭಗ್ನಗೊಂಡಿತು. ಭಾರತ ಬ್ಯಾಡ್ಮಿಂಟನ್ ತಾರೆ ಸೈನಾ ನೆಹ್ವಾಲ್ ವಿಶ್ವ ಚಾಂಪಿಯನ್ ಶಿಪ್ ನ ಕ್ವಾರ್ಟರ್ ಫೈನಲ್ ನಲ್ಲಿ ಸೋತು ನಿರ್ಗಮಿಸಿದರು.

ಶುಕ್ರವಾರ ನಡೆದ ಮಹಿಳೆಯರ ಸಿಂಗಲ್ಸ್ ವಿಭಾಗದ ಕ್ವಾರ್ಟರ್ ಫೈನಲ್ ನಲ್ಲಿ ಸೈನಾ 16-21, 19-21 ರಲ್ಲಿ ವಿಶ್ವದ ಎರಡನೇ ಕ್ರಮಾಂಕದ ಆಟಗಾರ್ತಿ ಚೀನಾದ ವಾಂಗ್ ಲೀನ್ ಎದುರು ಸೋಲುಂಡರು. 39 ನಿಮಿಷಗಳ ಹೋರಾಟದಲ್ಲಿ ಸೈನಾ ಒಂದೆರಡು ಬಾರಿ ಮಾತ್ರ ಗೆಲುವು ಪಡೆಯುವ ಭರವೆಸ ಮೂಡಿಸಿದ್ದರು. ಅದನ್ನು ಬಿಟ್ಟರೆ ಚೀನಾದ ಆಟಗಾರ್ತಿಯ ಪ್ರಭುತ್ವವೇ ಕಂಡುಬಂದಿತು.

ಮೊದಲ ಸೆಟ್ ನಲ್ಲಿ 1-8 ರ ಹಿನ್ನಡೆ ಅನುಭವಿಸಿದ ಸೈನಾ ಮರುಹೋರಾಟ ನಡೆಸಿ 11-11ರ ಸಮಬಲ ಸಾಧಿಸಿದರು. ಈ ಬಳಿಕ ಮೇಲುಗೈ ಸಾಧಿಸಿದ ನಾಂಗ್ ಲಿನ್ 21-16 ರಲ್ಲಿ ಸೆಟ್ ಗೆದ್ದರು. ಎರಡನೆ ಸೆಟ್ ನಲ್ಲಿ ಕನಸಿನ ಆರಂಭ ಪಡೆದ ಸೈನಾ 9-1ರ ಮುನ್ನಡೆ ಪಡೆದರು. ತಿರುಗೇಟು ನೀಡಿದ ಚೀನಾದ ಆಟಗಾರ್ತಿ 10-10ರ ಸಮಬಲ ಸಾಧಿಸಿದರು. ಮತ್ತೆ 17-17 ರ ಸಮಬಲ ಕಂಡುಬಂದಿತು. ಅಲ್ಲಿಂದ ಮುಂದೆ ಹಿಡಿತ ಸಡಿಲಿಸದ ವಾಂಗ್ ಲಿನ್ ಗೆಲುವು ಪಡೆದು ಸೆಮಿಫೈನಲ್ ಗೆ ತಲುಪಿದರು.

(ಏಜನ್ಸೀಸ್)