ಟ್ಯಾಕ್ಸ್ ಹಾಲಿಡೇ ಹಿಂತೆಗೆತ, ಕಂಪನಿಗಳಿಗೆ ಹೊಡೆತ

ಬೆಂಗಳೂರು, ಮೇ 26 : ಭಾರತದ ಸಾಫ್ಟ್‌ವೇರ್ ಕಂಪನಿಗಳಿಗೆ ಸಾಫ್ಟ್‌ವೇರ್ ಟೆಕ್ನಾಲಜಿ ಪಾರ್ಕ್ಸ್ ಆಫ್ ಇಂಡಿಯಾ (ಎಸ್ಟಿಪಿಐ) ಯೋಜನೆಯಡಿ ನೀಡಲಾಗಿದ್ದ ಹತ್ತು ವರ್ಷಗಳ ಟ್ಯಾಕ್ಸ್ ಹಾಲಿಡೇ ಅವಧಿ 2010ರಲ್ಲಿ ಕೊನೆಯಾಗುತ್ತಿರುವುದು ವಿಪ್ರೋ ಮತ್ತು ಇನ್ಫೋಸಿಸ್‌ನಂಥ ಸಾಫ್ಟ್‌ವೇರ್ ದಿಗ್ಗಜ ಕಂಪನಿಗಳಿಗೆ ಬಿಸಿತಟ್ಟಲು ಪ್ರಾರಂಭಿಸಿದೆ.

ಭಾರತದ ಕಂಪನಿಗಳು ಆರ್ಥಿಕ ಹಿಂಜರಿತದ ಹೊಡೆತದಿಂದ ಸಾವಕಾಶವಾಗಿ ಹೊರಬರುತ್ತಿರುವ ಹೊತ್ತಿನಲ್ಲಿಯೇ ಟ್ಯಾಕ್ಸ್ ಹಾಲಿಡೇ ಅವಧಿ ಮುಗಿಯುತ್ತಿರುವುದು ಚೇತರಿಸಿಕೊಳ್ಳುತ್ತಿರುವ ಅನೇಕ ಸಾಫ್ಟ್‌ವೇರ್ ಕಂಪನಿಗಳಿಗೆ ಅರಗಿಸಿಕೊಳ್ಳಲು ಕಷ್ಟವಾಗಲಿದೆ.

40 ಬಿಲಿಯನ್ ಡಾಲರ್ ವಾರ್ಷಿಕ ವಹಿವಾಟು ಹೊಂದಿರುವ ಮಾಹಿತಿ ತಂತ್ರಜ್ಞಾನ ಕ್ಷೇತ್ರ ಟ್ಯಾಕ್ಸ್ ಹಾಲಿಡೇ ರದ್ದತಿಗೆ ಸಿದ್ಧತೆ ಮಾಡಿಕೊಳ್ಳುತ್ತಿದೆ. ವಿಪ್ರೋ ಮತ್ತು ಇನ್ಫೋಸಿಸ್ ಕಂಪನಿಗಳು ಈಗಾಗಲೆ ಹೂಡಿಕೆದಾರರಿಗೆ ಈಕುರಿತು ಎಚ್ಚರಿಕೆ ನೀಡಿವೆ.

"ಅವಧಿ ಮುಗಿದ ನಂತರ ಭಾರತ ಸರಕಾರ ಹೆಚ್ಚಿನ ತೆರಿಗೆ ಹೊರೆ ಹೇರಿದರೆ ಅಥವಾ ಟ್ಯಾಕ್ಸ್ ಹಾಲಿಡೇ ಸೌಲಭ್ಯ ಹಿಂತೆಗೆದುಕೊಂಡರೆ ಅಥವಾ ತೆರಿಗೆ ಲಾಭದ ಪ್ರಮಾಣವನ್ನು ಇಳಿಸಿದರೆ ನಮ್ಮ ನಿವ್ವಳ ಲಾಭದಲ್ಲಿ ಇಳಿಕೆ ಕಂಡುಬರಲಿದೆ" ಭಾರತದ ಮೂರನೇ ಅತಿದೊಡ್ಡ ಸಾಫ್ಟ್ ವೇರ್ ರಫ್ತು ಕಂಪನಿ ವಿಪ್ರೋ ಹೇಳಿದೆ.

ಎಸ್ಟಿಪಿಐ ಯೋಜನೆಯಿಂದ ಭಾರತದ ಸಾಫ್ಟ್ ವೇರ್ ಕಂಪನಿಗಳು ಕಳೆದ ಹತ್ತು ವರ್ಷಗಳಲ್ಲಿ ಭಾರೀ ಲಾಭ ಪಡೆದಿವೆ. ಇನ್ಫೋಸಿಸ್ ಕಂಪನಿಯ ಆದಾಯ ತೆರಿಗೆಯಲ್ಲಿ 2009 ಮತ್ತು 2008ರಲ್ಲಿ 325 ಮಿಲಿಯನ್ ಡಾಲರ್ ಮತ್ತು 282 ಮಿಲಿಯನ್ ಡಾಲರ್ ನಷ್ಟು ಉಳಿಸಿದೆ. ಟ್ಯಾಕ್ಸ್ ಹಾಲಿಡೇ ಹಿಂತೆಗೆದುಕೊಂಡರೆ ಈ ಲಾಭ ಕೈತಪ್ಪಿಹೊಗಲಿದೆ.

(ಏಜೆನ್ಸೀಸ್)