ಅಂತೂ ಇಂತೂ ರಾಯಲ್ ಚಾಲೆಂಜರ್ಸ್ ಗೆ ಜಯ

ಡರ್ಬನ್, ಏ.30: ಸತತ ನಾಲ್ಕು ಸೋಲುಗಳಿಂದ ಕಂಗೆಟ್ಟಿದ್ದ ಬೆಂಗಳೂರು ರಾಯಲ್ ಚಾಲೆಂಜರ್ಸ್ ಬುಧವಾರ ನಡೆದ ಪಂದ್ಯದಲ್ಲಿ ಕೋಲ್ಕತ್ತಾ ನೈಟ್ ರೈಡರ್ಸ್ ತಂಡದ ವಿರುದ್ಧ ಐದು ವಿಕೆಟ್ ಗಳ ಜಯಗಳಿಸುವುದರೊಂದಿಗೆ ಹೊಸ ಚೈತನ್ಯ ತುಂಬಿಕೊಂಡಿತು.

ಟಾಸ್ ಗೆದ್ದು ಮೊದಲು ಬ್ಯಾಟ್ ಆಯ್ದುಕೊಂಡ ಕೋಲ್ಕತ್ತಾ ತಂಡ 20 ಓವರ್ ಗಳಲ್ಲಿ ಆರು ವಿಕೆಟ್ ನಷ್ಟಕ್ಕೆ 139 ರನ್ ಗಳ ಸಾಧಾರಣ ಮೊತ್ತ ಪೇರಿಸಿತು. ಕ್ರಿಸ್ ಗೇಲ್ (40) ಮತ್ತು ವ್ಯಾನ್ ಮೋರ್ನ್ (43) ರನ್ ಗಳಿಸಿದರು. ಶಿಸ್ತುಬದ್ಧ ಬೌಲಿಂಗ್ ಪ್ರದರ್ಶಿಸಿದ ಕುಂಬ್ಳೆ ಎರಡು ವಿಕೆಟ್ ಪಡೆದರೆ, ಪೀಟರ್ಸನ್, ಪ್ರವೀಣ್ ಕುಮಾರ್ ಮತ್ತು ಅಪ್ಪಣ್ಣ ತಲಾ ಒಂದೊಂದು ವಿಕೆಟ್ ಪಡೆದರು.

ಇದೇ ಮೊದಲ ಬಾರಿಗೆ ಬೆಂಗಳೂರು ತಂಡವನ್ನು ಪ್ರತಿನಿಧಿಸುವ ಅವಕಾಶ ಪಡೆದ ಗೋಸ್ವಾಮಿ ಸಮಯೋಜಿತ 43 ರನ್ ಗಳಿಸಿ ಗಮನ ಸೆಳೆದರು. ಕ್ಯಾಲಿಸ್ (23), ಬೌಚರ್ (25) ರನ್ ಗಳಿಸಿದರು. ತಂಡಕ್ಕೆ ಕೊನೆಯ ಓವರ್ ನಲ್ಲಿ ಹತ್ತು ರನ್ ಗಳ ಅವಶ್ಯ್ಕತೆಯಿತ್ತು. ಗೇಲ್ ಎಸೆದ ಕೊನೇ ಓವರ್ ನಲ್ಲಿ ಎರಡು ಬೌಂಡರಿ ಬಾರಿಸಿ ತಂಡದ ಜಯಕ್ಕೆ ಪ್ರಮುಖ ಕಾಣಿಕೆ ನೀಡಿದ ಬೌಚರ್ ಪಂದ್ಯಪುರುಷ ಗೌರವಕ್ಕೆ ಪಾತ್ರರಾದರು. ಈ ಗೆಲುವಿನಿಂದ ಬೆಂಗಳೂರು ತಂಡ ಅಂಕ ಪಟ್ಟಿಯಲ್ಲಿ ಆರನೇ ಸ್ಥಾನಕ್ಕೇರಿತು.

(ದಟ್ಸ್ ಕನ್ನಡ ಕ್ರೀಡಾವಾರ್ತೆ)