ಚುನಾವಣಾ ಕಣದಲ್ಲಿರುವ ಅತೀ ದೊಡ್ಡ ಕುಬೇರ

ನವದೆಹಲಿ, ಏ. 16 : ಪಶ್ಚಿಮ ದೆಹಲಿ ಲೋಕಸಭೆ ಕ್ಷೇತ್ರದಿಂದ ಬಹುಜನ ಸಮಾಜ ಪಕ್ಷದಿಂದ ಚುನಾವಣಾ ಅಖಾಡಕ್ಕಿಳಿದಿರುವ ದೀಪಕ್ ಭಾರದ್ವಾಜ್ ಅವರ ಒಟ್ಟು ಆಸ್ತಿ ಮೌಲ್ಯ ಸುಮಾರು 600 ಕೋಟಿ ರುಪಾಯಿ. ಬೆಚ್ಚಿಬೀಳಬೇಡಿ, ಇದು ನಿಜ! ಇಂದು ಬಿಎಸ್ಪಿ ಪಕ್ಷದ ಮೂಲಕ ಕಣಕ್ಕಿಳಿದಿರುವ ಅವರು ತಮ್ಮ ಸಮಸ್ತ ಆಸ್ತಿಯ ವಿವರದೊಂದಿಗೆ ನಾಮಪತ್ರ ಸಲ್ಲಿಸಿದರು.

ದೇಶದ ಸಾರ್ವತ್ರಿಕ ಚುನಾವಣೆಯಲ್ಲಿ ಅಖಾಡದಲ್ಲಿರುವ ಎಲ್ಲ ಅಭ್ಯರ್ಥಿಗಳಿಗಿಂತಲೂ ಭಾರದ್ವಾಜ್ ಅವರೇ ದೊಡ್ಡ ಕುಬೇರ ಎನ್ನುವುದು ಕೂಡಾ ವಿಶೇಷವಾಗಿದೆ. ಕಳೆದ ಲೋಕಸಭೆ ಚುನಾವಣೆಯಲ್ಲಿ 200 ಕೋಟಿ ರುಪಾಯಿ ಹೊಂದಿದ್ದ ವ್ಯಕ್ತಿಯೇ ಅತ್ಯಂತ ಶ್ರೀಮಂತ ಹುರಿಯಾಳು ಆಗಿದ್ದರು. ಈ ಸಲ ಅದಕ್ಕಿಂತ ಮೂರು ಪಟ್ಟು ಹೆಚ್ಚಿನ ಹಣ ಮತ್ತು ಆಸ್ತಿ ಹೊಂದಿರುವ ದೀಪಕ್ ಭಾರದ್ವಾಜ್ ಅಖಾಡದಲ್ಲಿದ್ದಾರೆ.

58 ವರ್ಷದ 'ಕುಬೇರ' ದೀಪಕ್ ಭಾರದ್ವಾಜ್ ರಿಯಲ್ ಎಸ್ಟೇಟ್ ವ್ಯವಹಾರ ನಡೆಸುತ್ತಿದ್ದಾರೆ. ಅಲ್ಲದೆ, ಹೋಟೆಲ್, ಶಿಕ್ಷಣ ಸಂಸ್ಥೆಗಳನ್ನು ನಡೆಸುತ್ತಿದ್ದಾರೆ. ದೀಪಕ್ ಭಾರದ್ವಾಜ್ ಪಶ್ಚಿಮ ದೆಹಲಿಯ ಲಜವಂತಿ ಪ್ರದೇಶದ ನಿವಾಸಿಯಾಗಿದ್ದಾರೆ.

(ಏಜನ್ಸೀಸ್)