ಮಾರ್ಚ್ ನಿಂದ ನ್ಯಾನೋ ಬುಕಿಂಗ್ ಆರಂಭ

ಹಲ್ದಾನಿ(ಉತ್ತರಖಂಡ), ಜ.1: ಮಧ್ಯಮ ವರ್ಗದವರ ಕನಸಿನ ಕಾರು ಎಂದೇ ಬಣ್ಣಿತವಾಗಿರುವ 1 ಲಕ್ಷ ರು.ಬೆಲೆಯ ಟಾಟಾ ನ್ಯಾನೋ ಕಾರಿನ ಬುಕಿಂಗ್ 2009ರ ಮಾರ್ಚ್ ಅಥವಾ ಏಪ್ರಿಲ್ ತಿಂಗಳಿಂದ ಆರಂಭವಾಗಲಿದೆ.

ಈ ಕುರಿತು ಟಾಟಾ ಮೋಟರ್ಸ್ ನ ಎಂಜಿನಿಯರಿಂಗ್ ವಿಭಾಗದ ನಾಗಭೂಷಣ್ ಮಾತನಾಡುತ್ತಾ, ಉತ್ತರಖಂಡ ರಾಜ್ಯದ ಪಟ್ನಾಗರ್ ನಲ್ಲಿರುವ ಕಾರು ತಯಾರಿಕಾ ಘಟಕದಿಂದ ನ್ಯಾನೋದ 3 ಮಾದರಿ ಕಾರುಗಳನ್ನು ಪರೀಕ್ಷಾರ್ಥ ಸಂಚಾರಕ್ಕಾಗಿ ರಸ್ತೆಗೆ ಇಳಿಸಲಾಗಿದೆ ಎಂದರು.

ಕಳೆದ ವಾರ ಉತ್ತರಖಂಡ ಸರ್ಕಾರ ಟಾಟಾ ಕಂಪನಿಗೆ ಹೆಚ್ಚುವರಿಯಾಗಿ 45 ಎಕರೆ ಭೂಮಿಯನ್ನು ಪಟ್ನಾಗರ್ ನಲ್ಲಿ ನೀಡಿದೆ. ಇದರಿಂದ ಕಂಪನಿಗೆ ಬಹಳಷ್ಟು ಸಹಕಾರಿಯಾಗಿದೆ. ಸಿಂಗೂರಿನಲ್ಲಿ ಭೂಸ್ವಾಧೀನ ಪ್ರಕ್ರಿಯೆಗೆ ತೃಣಮೂಲ್ ಕಾಂಗ್ರೆಸ್ ನಿಂದ ತೀವ್ರ ವಿರೋಧ ವ್ಯಕ್ತವಾದ ಹಿನ್ನೆಲೆಯಲ್ಲಿ ಗುಜರಾತ್ ನ ಸನಂದ್ ಗೆ ಮಾತೃ ಘಟಕವನ್ನು ಸ್ಥಳಾಂತರಿಸಲಾಯಿತು. ಸಿಂಗೂರಿನಲ್ಲಿ 1,500 ಕೋಟಿ ರು.ಗಳ ಬಂಡವಾಳ ಹೂಡಲು ಉದ್ದೇಶಿಸಲಾಗಿತ್ತು. ಸನಂದ್ ಗೆ ಸ್ಥಳಾಂತರವಾದ ನಂತರ ಬಂಡವಾಳದ ಮೊತ್ತ 2,000 ಕೋಟಿ ರು.ಗಳಾಗಿದೆ ಎಂದು ನಾಗಭೂಷಣ್ ತಿಳಿಸಿದರು.

(ಏಜೆನ್ಸೀಸ್)