ರಾಜಸ್ಥಾನ ಚುನಾವಣೆ, ಮತದಾನ ಆರಂಭ
ಜೈಪುರ, ಡಿ. 4 : ಭಯೋತ್ಪಾಕ ಕೃತ್ಯದ ಕರಾಳ ನೆನಪಿನ ಜತೆಗೆ ಬಿಗಿ ಪೊಲೀಸ್ ಬಂದೋಬಸ್ತ್ ನಡುವೆ ಇಂದು ರಾಜಸ್ಥಾನದಲ್ಲಿ ಮತದಾನ ಆರಂಭವಾಗಿದೆ. 200 ಶಾಸಕ ಸ್ಥಾನ ಹೊಂದಿರುವ ರಾಜಸ್ಥಾನ ವಿಧಾನಸಭೆಯಲ್ಲಿ ಕಾಂಗ್ರೆಸ್, ಬಿಎಸ್ಪಿ ಹಾಗೂ ಆಡಳಿತರೂಡ ಬಿಜೆಪಿ ಪಕ್ಷಗಳು ಹಣಾಹಣಿ ನಡೆಸಲಿವೆ.
ಬೆಳಗ್ಗೆ 8 ಗಂಟೆಗೆ ರಾಜ್ಯ 42, 212 ಮತಗಟ್ಟೆಗಳಲ್ಲಿ ಮತದಾನ ಶಾಂತಯುತವಾಗಿ ಆರಂಭವಾಗಿದೆ. ಯಾವುದೇ ಅಹಿತಕರ ಘಟನೆ ಜರುಗದಂತ ಭಾರಿ ಭದ್ರತೆಯನ್ನು ನಿಯೋಜನೆ ಮಾಡಲಾಗಿದೆ ಎಂದು ರಾಜಸ್ಥಾನ ಚುನಾವಣಾ ಆಯೋಗದ ಅಧಿಕಾರಿಗಳು ತಿಳಿಸಿದ್ದಾರೆ. ಇದರಲ್ಲಿ 8400 ಮತಗಟ್ಟೆಗಳು ಸೂಕ್ಷ್ಮ ಎಂದು ಪರಿಗಣಿಸಲಾಗಿದ್ದು, ಇಲ್ಲಿ ಹೆಚ್ಚಿನ ಭದ್ರತೆಯನ್ನು ನೀಡಲಾಗಿದೆ ಎಂದು ಹೇಳಿದರು. ಒಟ್ಟು 2193 ಅಭ್ಯರ್ಥಿಗಳು ಚುನಾವಣಾ ಕಣದಲ್ಲಿದ್ದು, ಅದರಲ್ಲಿ 159 ಮಹಿಳೆ ಅಭ್ಯರ್ಥಿಗಳಿದ್ದಾರೆ ಎಂದು ಆಯೋಗ ತಿಳಿಸಿದೆ.
ಕಾಂಗ್ರೆಸ್ ರಾಜ್ಯ ಎಲ್ಲ 200 ಕ್ಷೇತ್ರಗಳಲ್ಲಿ ಸ್ಪರ್ಧಿಸಲಿದೆ. ಬಿಜೆಪಿ 193 ಕ್ಷೇತ್ರಗಳಲ್ಲಿ ಹಾಗೂ ಬಿಎಸ್ ಪಿ 199 ಕ್ಷೇತ್ರಗಳಲ್ಲಿ ಸೆಣಸಲಿದೆ. ಹಾಲಿ ಮುಖ್ಯಮಂತ್ರಿ ವಸುಂದರಾ ರಾಜೆ ಸಿಂದಿಯಾ, ಕಾಂಗ್ರೆಸ್ ನಾಯಕ ಹಾಗೂ ಮಾಜಿ ಮುಖ್ಯಮಂತ್ರಿ ಅಶೋಕ್ ಗೆಹಲೋಟ್, ಕಾಂಗ್ರೆಸ್ ಅಧ್ಯಕ್ಷ ಸಿ ಪಿ ಜೋಶಿ, ಗುಜ್ಜಾರ್ ಮುಖಂಡ ಪ್ರಹ್ಲಾದ್ ಗುಂಜಲ್, ಮೀನಾ ಜನಾಂಗದ ನಾಯಕ ಕಿರೋರಿ ಲಾಲ್ ಮೀನಾ ಸೇರಿದಂತೆ ಅನೇಕ ಮುಖಂಡ ಭವಿಷ್ಯ ಇಂದು ನಿರ್ಧಾರವಾಗಲಿದೆ.
(ದಟ್ಸ್ ಕನ್ನಡ ವಾರ್ತೆ)