ಟಿವಿಎಸ್‌ ಸುಜುಕಿ ಉತ್ಪನ್ನಗಳ ಮಾರಾಟದಲ್ಲಿ ಶೇ.8.6 ಹೆಚ್ಚಳ

ಬೆಂಗಳೂರು : ದ್ವಿಚಕ್ರ ವಾಹನಗಳ ಮಾರುಕಟ್ಟೆಯಲ್ಲಿ ಶೇ. 24 ರ ಪಾಲನ್ನು ಹೊಂದಿರುವ ಟಿವಿಎಸ್‌ ಸುಜುಕಿ ಲಿಮಿಟೆಡ್‌ ಪ್ರಸಕ್ತ ಸಾಲಿನಲ್ಲಿ ಕಳೆದ ವರ್ಷಕ್ಕಿಂತ ತನ್ನ ಉತ್ಪನ್ನಗಳ ಮಾರಾಟದಲ್ಲಿ ಶೇ. 8.6 ರ ಹೆಚ್ಚಳವನ್ನು ಸಾಧಿಸಿದೆ.

ಏಪ್ರಿಲ್‌ 2000 ದಿಂದ ಮಾರ್ಚ್‌ 2001 ರ ವರೆಗಿನ ವಹಿವಾಟು ವರ್ಷದಲ್ಲಿ , ಕಂಪನಿ 3 ಲಕ್ಷ 54 ಸಾವಿರದ 505 ಮೋಟಾರ್‌ ಸೈಕಲ್‌ಗಳನ್ನು ಮಾರಿದೆ. ಇದಕ್ಕೆ ಬದಲಾಗಿ ಕಳೆದ ಸಾಲಿನಲ್ಲಿ ಕಂಪನಿ ಮಾರಿದ ಮೋಟಾರ್‌ ಸೈಕಲ್‌ಗಳ ಸಂಖ್ಯೆ 3,26,325 ಮಾತ್ರ. ಬುಧವಾರ ಕಂಪನಿ ಪ್ರಕಟಿಸಿರುವ ಸುದ್ದಿ ಪ್ರಕಟಣೆ ಈ ಅಂಕಿ ಅಂಶಗಳನ್ನು ತಿಳಿಸಿದೆ.

ಈ ಸಾಲಿನಲ್ಲಿ ಒಟ್ಟು 8,63,559 ವಾಹನಗಳನ್ನು ಮಾರಾಟ ಮಾಡಿರುವ ಕಂಪನಿ, ಕಳೆದ ಸಾಲಿನಲ್ಲಿ 8,35,7577 ವಾಹನಗಳನ್ನು ಮಾರಾಟ ಮಾಡಿತ್ತು . ಕಳೆದ ವರ್ಷದ ಮಾರಾಟದ ಸಂಖ್ಯೆಯಲ್ಲಿ 1,42,575 ಸ್ಕೂಟರ್‌ ಹಾಗೂ 3,66,479 ಮೊಪೆಡ್‌ ಸೇರಿವೆ.

ಕಂಪನಿಯ ಮಾರಾಟದಲ್ಲಿ ಮೋಟಾರ್‌ಸೈಕಲ್‌ಗಳ ಪಾಲು ಶೇ.41 ರಷ್ಟಿದ್ದು , ಮೋಟಾರ್‌ಸೈಕಲ್‌ ಕ್ಷೇತ್ರದಲ್ಲಿ ಟಿವಿಎಸ್‌ ಸುಜುಕಿ ತನ್ನ ಅಗ್ರಸ್ವಾಮ್ಯವನ್ನು ಮುಂದುವರಿಸಿದೆ ಎಂದು ಕಂಪನಿಯ ಅಧ್ಯಕ್ಷ ಸಿ.ಪಿ. ರಮಣಿ ತಿಳಿಸಿದ್ದಾರೆ. ಕಂಪನಿ ಹೊಸದಾಗಿ ಪರಿಚಯಿಸಿರುವ ಸುಜುಕಿ ಫಿಯೆರೊಗೆ ಅತ್ಯುತ್ತಮ ಪ್ರತಿಕ್ರಿಯೆ ವ್ಯಕ್ತವಾಗಿದೆ ಎಂದು ಅವರು ಹೇಳಿದ್ದಾರೆ.

(ಯುಎನ್‌ಐ)