ಚಂದ್ರಯಾನ

ದೂರದಲ್ಲಿ ಕೆಲವೊಮ್ಮೆ ದುಂಡಗೆ, ಕೆಲವೊಮ್ಮೆ ಚಕ್ಕುಲಿಯಾಕಾರದಲ್ಲಿ ಕಾಣುವ ಚಂದಾಮಾಮ, ಅದರ ಸುತ್ತಲೂ ಫಳಫಳನೆ ಹೊಳೆಯುವ ನಕ್ಷತ್ರಗಳನ್ನು ಅರಿಯಲೆತ್ನಿಸುವ ಪುಟಾಣಿಗಳಿಗಾಗಿ ವಿಜ್ಞಾನದ ಅಭಿವೃದ್ಧಿಯನ್ನು ಸಾರುವ ಒಂದು ಕವನ ತಾಳಿಕೋಟಿಯ

ಅವರಿಂದ.

ಗೋಲ ಗೋಲ ಖಗೋಲ ಗರ್ಭದಿ
ವಿಸ್ಮಯ ಸರಣಿ ನೂರಾರು !
ತಾರಾ ಪುಂಜ ಉಲ್ಕಾ ಪಾತ
ನೀಹಾರಿಕೆಗಳ ತವರೂರು !

ಅಂತರಿಕ್ಷದ ಅದ್ಭುತ ನಮ್ಮಯ
ಬೆಳ್ಳಿ ಬೆಳಕಿನ ಚಂದ್ರಾಮ !
ಚಂದ್ರನ ಮುಟ್ಟಿ ಮೈಯನು ತಟ್ಟಿ
ಬರುವುದೆ ಇಂದಿನ ಸಂಭ್ರಮ !

ಬಾನಂಗಳದ ತಿಂಗಳ ರಾಜನ
ಸುತ್ತುತಲಿರುವುದು ಉಪಕರಣ !
ಕ್ಷಣ ಕ್ಷಣ ಚಿತ್ರಣ ಮಾಹಿತಿ ಹರಿದು
ಬರುವುದು ನಮಗೆ ಅನುದಿನ !

ಗಗನದೊಡೆಯನ ಮಡಿಲನು ಶೋಧಿಸಿ
ನಿಜವನು ತಿಳಿಯುವ ಹಂಬಲ !
ಮಾನವ ಸಹಿತ ಚಂದ್ರಯಾನಕೆ
ಬಹಳ ದಿನಗಳು ಬೇಕಿಲ್ಲ !

ಭಾರತ ದೇಶದ ಹೆಮ್ಮೆಯ ಸಾಧನೆ
ಚಂದ್ರನ ಮೇಲಿನ ಈ ಯಾನ !
ಕಲಾಂ ಕನಸು ನನಸಾಗುವುದು
ಯಾರಿಗೆ ಇಲ್ಲವು ಅನುಮಾನ !

ಈ ಶತಮಾನದ ಅದ್ಭುತ ಗಳಿಗೆ
ಚಂದ್ರಯಾನದ ಸಾಧನೆ !
ಇಸ್ರೊ ಸಂಸ್ಥೆಯ ಪರಿಣತ ಪಡೆಗೆ
ಸಾವಿರ ಸಾವಿರ ವಂದನೆ !