ಸಣ್ಣ ಕೈಗಾರಿಕೆಗಳಿಗೆ ಸಾಲ; ಮರುಪಾವತಿಗೆ 4 ವರ್ಷ ಅವಕಾಶ
ನವದೆಹಲಿ, ಮೇ 13 : "ಲಾಕ್ ಡೌನ್ ಅವಧಿಯಲ್ಲಿ ಆರ್ಥಿಕ ನಷ್ಟವಾಗಿದೆ ಎಂದು ಕಿರು, ಸಣ್ಣ ಮತ್ತು ಮಧ್ಯಮ ಕೈಗಾರಿಕೆಗಳು ಚಿಂತಿಸುವುದು ಬೇಡ. ಈಗ ಎಂಎಸ್ಎಂಇಯ ವ್ಯಾಖ್ಯಾನವೇ ಬದಲಾಗಿದೆ" ಎಂದು ಕೇಂದ್ರ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಹೇಳಿದರು.
Recommended Video
ಬುಧವಾರ ಪತ್ರಿಕಾಗೋಷ್ಠಿ ನಡೆಸಿದ ನಿರ್ಮಲಾ ಸೀತಾರಾಮನ್ ಪ್ರಧಾನಿ ನರೇಂದ್ರ ಮೋದಿ ಘೋಷಣೆ ಮಾಡಿದ್ದ 20 ಲಕ್ಷ ಕೋಟಿ ರೂ. ಪ್ಯಾಕೇಜ್ನ ವಿವರಗಳನ್ನು ನೀಡಿದರು. ಸಣ್ಣ, ಮಧ್ಯಮ ಕೈಗಾರಿಕೆಗಳಿಗೆ 3 ಲಕ್ಷ ಕೋಟಿ ರೂ. ಸಾಲ ನೀಡುವುದಾಗಿ ಘೋಷಣೆ ಮಾಡಿದರು.
"ಅಕ್ಟೋಬರ್ 31ರ ತನಕ ಸಣ್ಣ, ಮಧ್ಯಮ ಕೈಗಾರಿಕೆಗಳು ಸಾಲವನ್ನು ಪಡೆಯಬಹುದಾಗಿದೆ. ಬ್ಯಾಂಕ್ಗಳು ನೀಡುವ ಸಾಲಕ್ಕೆ ಕೇಂದ್ರ ಸರ್ಕಾರವೇ ಗ್ಯಾರಂಟಿ ನೀಡಲಿದೆ. ಈ ತೀರ್ಮಾನದಿಂದ ಸುಮಾರು 45 ಲಕ್ಷ ಸಣ್ಣ ಕೈಗಾರಿಕೆಗಳಿಗೆ ಲಾಭವಾಗಲಿದೆ" ಎಂದು ಹಣಕಾಸು ಸಚಿವರು ವಿವರಿಸಿದರು.
"25 ರಿಂದ 100 ಕೋಟಿ ವ್ಯವಹಾರ ಇರುವ ಕೈಗಾರಿಕೆಗಳಿಗೆ ಇದರಿಂದ ಅನುಕೂಲವಾಗಲಿದೆ. ಅಲ್ಲದೇ ಪಡೆದ ಸಾಲವನ್ನು ಮರುಪಾವತಿ ಮಾಡಲು 4 ವರ್ಷದ ತನಕ ಕಾಲಾವಕಾಶವನ್ನು ನೀಡಲಾಗುತ್ತದೆ" ಎಂದು ಸಚಿವರು ತಿಳಿಸಿದರು.
"ಸಾಲವನ್ನು ಪಡೆದ ಸಣ್ಣ ಕೈಗಾರಿಕೆಗಳು ಮೊದಲ 12 ತಿಂಗಳು ಸಾಲವನ್ನು ಮರುಪಾವತಿ ಮಾಡುವ ಅಗತ್ಯವಿಲ್ಲ. ಸಣ್ಣ ಕೈಗಾರಿಕೆಗಳಿಗೆ ಸಂಬಳ ಪಾವತಿಗೆ ಹಣ ಅವಶ್ಯಕತೆ ಇದ್ದರೆ ಸಾಲ ನೀಡಲಾಗುತ್ತದೆ" ಎಂದು ಸಚಿವರು ಹೇಳಿದರು.
"ಪ್ರಧಾನಿ ನರೇಂದ್ರ ಮೋದಿ ಅವರು ಘೋಷಣೆ ಮಾಡಿದಂತೆ ಭಾರತ ಸ್ವಾವಲಂಬಿಯಾಗಲು ಉಪಕ್ರಮಗಳು ನೆರವು ನೀಡಲಿವೆ. ಸ್ಥಳೀಯ ಬ್ರಾಂಡ್ ಅನ್ನು ಜಾಗತಿಕವಾಗಿ ಬೆಳೆಸುತ್ತೇವೆ. ಪ್ರಧಾನಿಗಳು ಹೇಳಿದಂತೆ ದೇಶ ಕಟ್ಟಲು ಇವೆಲ್ಲಾ ಸಹಕಾರಿಯಾಗಲಿವೆ" ಎಂದರು.
Click it and Unblock the Notifications
Sign in with Google