ಸೊಹೈಲ್ ಖಾನ್ ಕಾರಿಗೆ ಸಿಲುಕಿ ಮಹಿಳೆ ಸಾವು
ಬಾಲಿವುಡ್ ನಟ, ನಿರ್ಮಾಪಕ ಸೋಹೆಲ್ ಖಾನ್ ಅವರು ಕಾರು ಭಾನುವಾರ ತಡರಾತ್ರಿ ಚಂದನ್ ಬಾಲಾ ಎಂಬ ಮಹಿಳೆ ಮೇಲೆ ಕಾರು ಚಲಾಯಿಸಿದ್ದಾರೆ. ಬಾಂದ್ರಾದ ಸೈಂಟ್ ಆಂಡ್ರೂಸ್ ಚರ್ಚ್ ಬಳಿ ಅಪಘಾತ ನಡೆದಿದ್ದು, ತೀವ್ರವಾಗಿ ಗಾಯಗೊಂಡ ಮಹಿಳೆ ದುರಂತ ಸಾವನ್ನಪ್ಪಿದ್ದಾರೆ.
ಅಪಘಾತ ನಡೆದಾಗ ಕಾರಿನಲ್ಲಿ ಸೋಹೆಲ್ ಖಾನ್ ಇದ್ದಿದ್ದನ್ನು ಪ್ರತ್ಯಕ್ಷ ನೋಡಿದವರಿದ್ದಾರೆ. ಸೊಹೈಲ್ ಅವರ ಚಾಲಕ ಧನಂಜಯ್ ಪಿಂಪಲೆ ಲ್ಯಾಂಡ್ ಕ್ರೂಸರ್ ವಾಹನವನ್ನು ಚಲಾಯಿಸುತ್ತಿದ್ದರು.
ಮಹಿಳೆಗೆ ಕಾರು ಬಡಿದ ಮೇಲೆ ಹಿಂತಿರುಗಿ ನೋಡದಂತೆ ಹೋಗಿಬಿಟ್ಟರು ಎಂದು ಕೆಲವರು ಹೇಳಿಕೆ ನೀಡಿದ್ದಾರೆ. ಆದರೆ, ಇನ್ನೊಂದು ವರದಿ ಪ್ರಕಾರ ಕಾನ್ಸ್ ಟೇಬಲ್ ನೆರವಿನಿಂದ ಮಹಿಳೆಯನ್ನು ಸಮೀಪದ ಆಸ್ಪತ್ರೆಗೆ ಸೇರಿಸುವ ತನಕ ಡ್ರೈವರ್ ಧನಂಜಯ್ ಜೊತೆಯಲ್ಲಿದ್ದ ಎನ್ನಲಾಗಿದೆ.
ಆದರೆ, ಆಸ್ಪತ್ರೆಯಲ್ಲಿ ಯಾವೊಬ್ಬ ಡಾಕ್ಟರ್ ಗತಿ ಇರಲಿಲ್ಲ. ಅರ್ಧ ಗಂಟೆಗಳ ಕಾಲ ಜೀವನ್ಮರಣ ಹೋರಾಟ ನಡೆಸಿದ ಮಹಿಳೆಯನ್ನು ಹೊರಕ್ಕೆ ತೆಗೆದುಕೊಂಡು ಹೋಗುವಂತೆ ಆಸ್ಪತ್ರೆ ಸಿಬ್ಬಂದಿ ದಬಾಯಿಸಿದರು ಎಂದು ಪ್ರತ್ಯಕ್ಷದರ್ಶಿಯೊಬ್ಬರು ಹೇಳಿದರು.
ಡ್ರೈವರ್ ಧನಂಜಯ್ ಮೇಲೆ ಅಡ್ಡಾದಿಡ್ಡಿ ವಾಹನ ಚಲಾಯಿಸಿದ್ದಕ್ಕೆ ಪ್ರಕರಣ ದಾಖಲಾಗಿದೆ. ಧನಂಜಯ್ ಕಾರು ಚಲಾಯಿಸುತ್ತಿದ್ದ ವೇಳೆಯಲ್ಲಿ ಯಾವುದೇ ಮಾದಕ ದ್ರವ್ಯ ಅಥವಾ ಮದ್ಯಪಾನ ಮಾಡಿರಲಿಲ್ಲ ಎಂದು ಪ್ರಾಥಮಿಕ ವರದಿಗಳು ಹೇಳಿದೆ. ಘಟನೆ ನಡೆದ ಸಮಯದಲ್ಲಿ ಸೊಹೈಲ್ ಅವರ ಸೋದರ ಅರ್ಬಾಜ್ ಖಾನ್ ಅವರ ಗೆಲ್ಯಾಕ್ಸಿ ಅಪಾರ್ಟ್ ಮೆಂಟ್ ಕಡೆಗೆ ವಾಹನ ಸಾಗುತ್ತಿತ್ತು ಎಂದು ತಿಳಿದು ಬಂದಿದೆ.
ಡ್ರೈವರ್ ಧನಂಜಯ್ ನನ್ನು ವಶಕ್ಕೆ ತೆಗೆದುಕೊಂಡ ಪೊಲೀಸರು ಕೋರ್ಟಿಗೆ ಹಾಜರುಪಡಿಸಿದ್ದಾರೆ. ಕೋರ್ಟಿನಲ್ಲಿ ತಪ್ಪೊಪ್ಪಿಗೆ ನೀಡಿದ ಧನಂಜಯ್ ಗೆ ಜಾಮೀನು ಸಿಕ್ಕಿದೆ. 10,000 ರು ದಂಡ ಕಟ್ಟಿಸಿಕೊಳ್ಳಲಾಗಿದೆ. ಆಚಾನಕ್ ಆಗಿ ಮಹಿಳೆ ಕಾರಿನ ಮುಂದೆ ಬಂದರು ನನಗೆ ಆ ಕ್ಷಣ ಏನು ಮಾಡಲಾಗಲಿಲ್ಲ ಎಂದು ಡ್ರೈವರ್ ಧನಂಜಯ್ ಹೇಳಿದ್ದಾನೆ.
ಅಸಲಿಗೆ ಲ್ಯಾಂಡ್ ಕ್ರೂಸರ್ ವಾಹನ ಸೋಹೆಲ್ ಖಾನ್ ಅವರ ಸೋದರ ಅರ್ಬಾಜ್ ಖಾನ್ ಗೆ ಸೇರಿದ್ದು ಎಂದು ತಿಳಿದು ಬಂದಿದೆ. ಈ ಬಗ್ಗೆ ಅವರ ಹೇಳಿಕೆಯನ್ನು ದಾಖಲಿಸಿಕೊಳ್ಳಲಾಗುತ್ತದೆ ಎಂದು ಪೊಲೀಸರು ಹೇಳಿದ್ದಾರೆ.
ಸಲ್ಮಾನ್ ಖಾನ್ ತಂದೆ ಸಲೀಂ ಖಾನ್, ಅರ್ಬಾಜ್ ಖಾನ್, ಸೊಹೇಲ್ ಖಾನ್ ಅವರು ಮಹಿಳೆ ಸಾವಿಗೆ ತೀವ್ರ ಸಂತಾಪ ವ್ಯಕ್ತಪಡಿಸಿದ್ದಾರೆ. ಇದು ದುರದೃಷ್ಟಕರ ಸಂಗತಿ. ಮಹಿಳೆ ಕಾರಿನ ಮುಂಭಾಗದಲ್ಲಿ ಬಂದು ಬಿದ್ದಿದ್ದಾರೆ. ಚಾಲಕನ ಬ್ರೇಕ್ ಹಾಕಿ ಅಪಘಾತ ತಪ್ಪಿಸಲು ಯತ್ನಿಸಿದರೂ ನಿಯಂತ್ರಣ ತಪ್ಪಿದೆ.ನಂತರ ವಿಷಯವನ್ನು ಪೊಲೀಸರಿಗೆ ಒಪ್ಪಿಸಲಾಗಿದೆ ಎಂದು ಸಲ್ಮಾನ್ ಕುಟುಂಬ ಹೇಳಿಕೆ ನೀಡಿದೆ.
ಸಲ್ಮಾನ್ ಖಾನ್ ಅವರ ಸೋದರನ ಕಾರು ಅಪಘಾತವಾಗಿದೆ ಎಂದು ಸುದ್ದಿ ಕಾಡ್ಗಿಚ್ಚಿನಂತೆ ಹಬ್ಬಿದ ಮೇಲೆ ಘಟನಾ ಸ್ಥಳಕ್ಕೆ ಸುಮಾರು 500ಕ್ಕೂ ಅಧಿಕ ಜನ ಆಗಮಿಸಿದ್ದರು. ವೈದ್ಯರು ಸರಿಯಾಗಿ ಸಕಾಲಕ್ಕೆ ಚಿಕಿತ್ಸೆ ನೀಡಿದ್ದರೆ ಮಹಿಳೆ ಬದುಕುಳಿಯುವ ಸಾಧ್ಯತೆಯಿತ್ತು ಎಂದು ದಾರಿಹೋಕ ಪ್ರತ್ಯಕ್ಷದರ್ಶಿ ಹೇಳಿದ್ದಾರೆ.
Click it and Unblock the Notifications
Sign in with Google