ಏರಿದ ತರಕಾರಿ ಬೆಲೆ, ಮೊಟ್ಟೆಯ ದರ ಕೊಂಚ ಇಳಿಕೆ

ಬೆಂಗಳೂರು, ಏಪ್ರಿಲ್ 05: ಬೇಸಿಗೆಯಲ್ಲಿ ನೀರಿನ ಅಭಾವ ಒಂದೆಡೆಯಾದರೆ, ಹಲವೆಡೆ ಇತ್ತೀಚೆಗೆ ಬಿದ್ದ ಮಳೆಯಿಂದಾಗಿ ತರಕಾರಿಗಳ ಬೆಳೆಗಳು ಹಾಳಾಗಿವೆ. ಹಾಗಾಗಿ ಸಾಕಷ್ಟು ತರಕಾರಿಗಳ ಬೆಲೆ ಏರಿಕೆಯಾಗಿದೆ.

ಹೀಗಾಗಿ ಬೀನ್ಸ್, ಟೊಮೇಟೋ ಮತ್ತಿತರೆ ತರಕಾರಿಗಳ ದರದಲ್ಲಿ ಏರಿಕೆಯಾಗಿದೆ. ಮಾರ್ಚ್ ನಲ್ಲಿ ಬೀನ್ಸ್ 25ರೂ ಇದ್ದಿದ್ದು, ಇದೀಗ ಕೆಜಿಗೆ 44ರೂ. ತಲುಪಿದೆ. 10ರೂ. ಇದ್ದ ಟೊಮೇಟೊ ದರ 20ರೂ.ಗೆ ಏರಿಕೆಯಾಗಿದೆ. ಸೌತೆಕಾಯಿ ದರ ಒಂದಕ್ಕೆ 10ರೂ. ತಲುಪಿದೆ. ಬೆಂಡೆಕಾಯಿ 38ರೂ.ಇದೆ. ಕೊತ್ತಂಬರಿ ಸೊಪ್ಪು ಸೇರಿದಂತೆ ಇತರೆ ಸೊಪ್ಪುಗಳ ದರವೂ ಏರಿಕೆಯಾಗಿದೆ.

ಮೊಟ್ಟೆಗಳ ದರ ಇಳಿಕೆ: ಕೆಲ ತಿಂಗಳ ಹಿಂದೆ 6ರೂ.ವರೆಗೆ ಏರಿಕೆಯಾಗಿದ್ದ ಮೊಟ್ಟೆಯ ದರ ಇದೀಗ ಕಡಿಮೆಯಾಗಿದೆ. ಚಿಲ್ಲರೆ ಮೊಟ್ಟೆಯೊಂದರ ಬೆಲೆ 4.30ರಿಂದ 5 ರೂಗೆ ಇಳಿದಿದೆ. ಸರ್ಕಾರದ ವತಿಯಿಂದ ಅಂಗನವಾಡಿ ಮಕ್ಕಳಿಗೆ ವಾರಕ್ಕೆ ಎರಡು ದಿನ ಬೇಯಿಸಿದ ಮೊಟ್ಟೆ ನೀಡಲಾಗುತ್ತದೆ.

ಶಾಲೆಗಳಿಗೆ ನೀಡುವಂತೆ ಬೇಸಿಗೆ ರಜೆಯನ್ನು ಅಂಗನವಾಡಿಗಳಿಗೆ ನೀಡುವುದಿಲ್ಲವಾದರೂ ಈ ಅವಧಿಯಲ್ಲಿ ಹೆಚ್ಚಿನ ಮಕ್ಕಳು ಅಲ್ಲಿಗೆ ಬರುವುದಿಲ್ಲ ಇವೆಲ್ಲ ಕಾರಣಗಳಿಂದ ಮೊಟ್ಟೆಯ ದರ ಕಡಿಮೆಯಗಿದೆ.

ಬೇಸಿಗೆಯಲ್ಲಿ ಕೋಳಿಗಳು ಜೋಳ ಮತ್ತಿತರೆ ಆಹಾರ ಪದಾರ್ಥಗಳನ್ನು ಸೇವಿಸುವುದು ಕಡಿಮೆ. ಈ ಋತುವಿನಲ್ಲಿ ಹೆಚ್ಚಾಗಿ ನೀರು ಕುಡಿಯುತ್ತವೆ. ರಾಜ್ಯದಲ್ಲಿ ನಿತ್ಯ 1.20 ಕೋಟಿ ಮೊಟ್ಟೆ ಉತ್ಪಾದನೆಯಾಗುತ್ತದೆ. ಬೇಸಿಗೆಯಲ್ಲಿ ಉತ್ಪಾದನಾ ಪ್ರಮಾಣದಲ್ಲಿ ಶೇ.10-15ರಷ್ಟು ಇಳಿಕೆಯಾಗುತ್ತಿದೆ ಎಂದು ಎನ್‌ಇಸಿಸಿ ಬೆಂಗಳೂರು ವಲಯದ ಅಧ್ಯಕ್ಷ ಬಿ.ಆರ್. ಸಾಯಿನಾಥ್ ಮಾಹಿತಿ ನೀಡಿದ್ದಾರೆ.

English summary

There is a price hike in vegetables, but egg price was decreased. Beacuse of uneven rain there is a loss of vegetable crops.