ಚುನಾವಣೆ ಹತ್ತಿರವಾಗುತ್ತಿದಂತೆ ರೌಡಿ ಶೀಟರ್‌ಗಳ ಪಟ್ಟಿಯಿಂದ 7000 ಕ್ಕೂ ಹೆಚ್ಚು ಹೆಸರು ಕೈಬಿಟ್ಟ ಸರ್ಕಾರ: ಹುಟ್ಟಿಕೊಂಡ ಅನುಮಾನ

ಈ ವರ್ಷದ ಮೊದಲ ಎರಡು ತಿಂಗಳಲ್ಲೇ ಕರ್ನಾಟಕ ಪೊಲೀಸ್ ಇಲಾಖೆ 7,361 ಮಂದಿಯ ಹೆಸರನ್ನು ರೌಡಿ ಶೀಟರ್‌ಗಳ ಪಟ್ಟಿಯಿಂದ ಕೈಬಿಟ್ಟಿದೆ. ಇದು ಸಾಕಷ್ಟು ಅನುಮಾನಕ್ಕೆ ಎಡೆ ಮಾಡಿಕೊಟ್ಟಿದೆ. ಈ ವರದಿ ಓದಿ

ಬೆಂಗಳೂರು, ಫೆಬ್ರವರಿ 24: ಈ ವರ್ಷದ ಮೊದಲ ಎರಡು ತಿಂಗಳಲ್ಲೇ ಕರ್ನಾಟಕ ಪೊಲೀಸ್ ಇಲಾಖೆ 7,361 ಮಂದಿಯ ಹೆಸರನ್ನು ರೌಡಿ ಶೀಟರ್‌ಗಳ ಪಟ್ಟಿಯಿಂದ ಕೈಬಿಟ್ಟಿದೆ. ಇದು ಕಳೆದ ವರ್ಷವಿಡೀ 3,314 ಹೆಸರುಗಳನ್ನು ರೌಡಿ ಶೀಟರ್‌ ಪಟ್ಟಿಯಿಂದ ಕೈಬಿಡಲಾಗಿತ್ತು. ಈಗ ಕೇವಲ ಎರಡು ತಿಂಗಳಲ್ಲಿ ಎರಡು ಪಟ್ಟು ರೌಡಿಗಳನ್ನು ರೌಡಿ ಶೀಟರ್‌ ಪಟ್ಟಿಯಿಂದ ಕೈಬಿಟ್ಟಿರುವುದು ಅನುಮಾನಕ್ಕೆ ಎಡೆ ಮಾಡಿಕೊಟ್ಟಿದೆ. ಈ ಬಗ್ಗೆ ನಿವೃತ್ತ ಪೊಲೀಸ್ ಅಧಿಕಾರಿಗಳೂ ಕಳವಳ ವ್ಯಕ್ತಪಡಿಸಿದ್ದಾರೆ.

ವಿಧಾನಸಭೆಯಲ್ಲಿ ಬೀದರ್‌ನ ಕಾಂಗ್ರೆಸ್ ಎಂಎಲ್‌ಸಿ ಅರವಿಂದಕುಮಾರ್ ಅರಳಿ ಅವರು ಕೇಳಿದ ಪ್ರಶ್ನೆಗೆ ಉತ್ತರಿಸಿದ ಗೃಹ ಸಚಿವ ಆರಗ ಜ್ಞಾನೇಂದ್ರ, 2018 ರಿಂದ ಇಲ್ಲಿಯವರೆಗೆ 26,319 ರೌಡಿ ಶೀಟರ್‌ಗಳ ಹೆಸರನ್ನು ಸರ್ಕಾರ ಕೈಬಿಟ್ಟಿದೆ ಎಂದು ಲಿಖಿತ ಹೇಳಿಕೆಯಲ್ಲಿ ತಿಳಿಸಿದ್ದಾರೆ. 2021 ರಲ್ಲಿ 8,062 ಹೆಸರುಗಳನ್ನು ತೆಗೆದುಹಾಕಲಾಗಿದೆ ಎಂದು ಮಾಹಿತಿ ನೀಡಿದ್ದಾರೆ.

ಬೀದರ್‌ನಲ್ಲಿ ಆಡಳಿತ ಪಕ್ಷ ಬಿಜೆಪಿಗೆ ಹತ್ತಿರವಿರುವ ಒಂದೇ ಸಮುದಾಯದ 519 ರೌಡಿ ಶೀಟರ್‌ಗಳ ಹೆಸರನ್ನು ಕೈಬಿಟ್ಟಿರುವ ಬಗ್ಗೆ ಅನುಮಾನಗೊಂಡ ನಂತರ ಪರಿಷತ್ತಿನಲ್ಲಿ ಈ ಪ್ರಶ್ನೆಯನ್ನು ಎತ್ತಿದ್ದೇನೆ ಎಂದು ಅರಳಿ ಹೇಳಿದರು. 'ರಾಜ್ಯದಾದ್ಯಂತ ಇರುವ ರೌಡಿ ಶೀಟರ್‌ಗಳ ಪಟ್ಟಿಗೆ ಜಾತಿ/ಧರ್ಮವಾರು ಸೇರ್ಪಡೆ ಮತ್ತು ಹೆಸರುಗಳನ್ನು ಅಳಿಸುವ ಕುರಿತು ವಿವರಗಳನ್ನು ಕೇಳಿದ್ದೇನೆ,' ಎಂದು ಅರಳಿ ತಿಳಿಸಿದರು.

ಗೃಹ ಸಚಿವಾಲಯದ ಉತ್ತರದಲ್ಲಿ ಪೊಲೀಸರು, 'ವ್ಯಕ್ತಿಗಳ ವಿರುದ್ಧ ರೌಡಿ ಶೀಟ್ ತೆರೆಯುವಾಗ ಧರ್ಮ/ಜಾತಿಯನ್ನು ಪರಿಗಣನೆಗೆ ತೆಗೆದುಕೊಳ್ಳುವುದಿಲ್ಲ' ಎಂದು ತಿಳಿಸಿದ್ದಾರೆ.

ಕಳೆದ 10 ವರ್ಷಗಳಲ್ಲಿ ರೌಡಿ ಶೀಟರ್‌ಗಳ ಉತ್ತಮ ನಡವಳಿಕೆ ಮತ್ತು ರೌಡಿ ಚಟುವಟಿಕೆಗಳಲ್ಲಿ ಭಾಗಿಯಾಗದಿರುವ ಆಧಾರದ ಮೇಲೆ ಅವರ ಹೆಸರನ್ನು ಕೈಬಿಡಲಾಗಿದೆ ಎಂದು ಸಚಿವಾಲಯ ವಿವರಿಸಿದೆ. ಆದರೆ, ಚುನಾವಣೆಯನ್ನು ಗಮನದಲ್ಲಿಟ್ಟುಕೊಂಡು ಒಂದು ಸಮುದಾಯದವರನ್ನು ಮಾತ್ರ ಕೈಬಿಡಲಾಗಿದೆ ಎಂದು ವಿರೋಧ ಪಕ್ಷದ ನಾಯಕರು ಆರೋಪಿಸಿದ್ದಾರೆ.

ಹೆಸರು ಹೇಳಲು ಇಚ್ಛಿಸದ ನಿವೃತ್ತ ಐಪಿಎಸ್ ಅಧಿಕಾರಿಯೊಬ್ಬರು 'ಡೆಕ್ಕನ್‌ ಹೆರಾಲ್ಡ್‌'ಗೆ ಮಾತನಾಡಿ, 'ರಾಜಕಾರಣಿಗಳು ತಮ್ಮ ಹಿಂಬಾಲಕರ ಹೆಸರನ್ನು ಪಟ್ಟಿಯಿಂದ ಹಿಂತೆಗೆದುಕೊಳ್ಳುವಂತೆ ಸ್ಥಳೀಯ ಪೊಲೀಸರ ಮೇಲೆ ಒತ್ತಡ ಹೇರುವುದು ಸಾಮಾನ್ಯ. ರೌಡಿ ಶೀಟರ್‌ಗಳ ಹೆಸರನ್ನು ಸಾಮೂಹಿಕವಾಗಿ ಅಳಿಸುವುದು ಈ ಹಿಂದೆ ಕರ್ನಾಟಕದಲ್ಲಿ ನಡೆದಿಲ್ಲ. ಚುನಾವಣಾ ವರ್ಷದಲ್ಲಿ ಹೆಸರುಗಳನ್ನು ಹಿಂತೆಗೆದುಕೊಳ್ಳುವುದು ಮತದಾರರನ್ನು ಬೆದರಿಸಲು ಸಹಾಯ ಮಾಡುತ್ತದೆ' ಎಂದು ಅವರು ಹೇಳಿದ್ದಾರೆ.

ಕೋಮು ಸೂಕ್ಷ್ಮ ಪ್ರದೇಶವಾದ ಮಂಗಳೂರು ನಗರದಲ್ಲಿ ಈ ವರ್ಷ ಅತಿ ಹೆಚ್ಚು (781) ರೌಡಿ ಶೀಟರ್‌ಗಳ ಹೆಸರು ಕೈಬಿಡಲಾಗಿದೆ. 2022 ರಲ್ಲಿ, ಕೇವಲ 97 ಹೆಸರುಗಳನ್ನು ಪಟ್ಟಿಯಿಂದ ತೆಗೆದುಹಾಕಲಾಗಿತ್ತು.

ಈ ಕುರಿತು ಮಾತನಾಡಿರುವ ಮಂಗಳೂರು ನಗರ ಪೊಲೀಸ್ ಆಯುಕ್ತ ಎನ್.ಶಶಿಕುಮಾರ್, 'ರೌಡಿ ಶೀಟರ್ ಪಟ್ಟಿಯಿಂದ ಯಾವುದೇ ಹೆಸರನ್ನು ಕೈಬಿಡಲು ಯಾವುದೇ ರಾಜಕೀಯ ಒತ್ತಡವಿಲ್ಲ. ಪ್ರಕರಣದ ತೀವ್ರತೆ ಮತ್ತು ವರ್ಷಗಳಲ್ಲಿ ವ್ಯಕ್ತಿಯ ನಡವಳಿಕೆಯನ್ನು ಅವಲಂಬಿಸಿ ಘಟಕದ ಅಧಿಕಾರಿಯ (ಸಹಾಯಕ ಪೊಲೀಸ್ ಆಯುಕ್ತ ಅಥವಾ ಪೊಲೀಸ್ ಉಪ ಅಧೀಕ್ಷಕ) ಶಿಫಾರಸಿನ ಆಧಾರದ ಮೇಲೆ ಹೆಸರುಗಳನ್ನು ತೆಗೆದುಹಾಕುವ ಪ್ರಕ್ರಿಯೆ ನಡೆಯುತ್ತದೆ' ಎಂದು ತಿಳಿಸಿದ್ದಾರೆ.

'ನಾವು ಯಾವುದೇ ರೌಡಿ ಶೀಟರ್‌ಗಳ ಧರ್ಮ, ಜಾತಿ ನೋಡುವುದಿಲ್ಲ. ಪಟ್ಟಿಯಿಂದ ತೆಗೆದುಹಾಕುವಿಕೆಯು ಪ್ರತಿ ವರ್ಷದ ಕೊನೆಯಲ್ಲಿ ಫೈಲ್ ಅನ್ನು ಮುಂದುವರಿಸಲು ಅಥವಾ ಮುಚ್ಚಲು ಪೊಲೀಸರು ತೆಗೆದುಕೊಳ್ಳುವ ಒಂದು ವಾಡಿಕೆಯ ಕ್ರಮವಾಗಿದೆ' ಎಂದು ಆಯುಕ್ತರು ಹೇಳಿದ್ದಾರೆ.

ಮಂಗಳೂರಿನಲ್ಲಿ ಅಳಿಸಲಾದ ಬಹುತೇಕ ಹೆಸರುಗಳು ಸಿ-ಶೀಟರ್‌ಗಳು (ಬಡ್ಡಿಂಗ್ ರೌಡಿ ಶೀಟರ್) ಅಥವಾ 65 ವರ್ಷಕ್ಕಿಂತ ಮೇಲ್ಪಟ್ಟವರು. ಅಳಿಸಲಾದ ಪಟ್ಟಿಯಲ್ಲಿ ಎಲ್ಲಾ ಸಮುದಾಯಗಳ ಸದಸ್ಯರ ಹೆಸರುಗಳಿವೆ ಎಂದು ಅವರು ತಿಳಿಸಿದ್ದಾರೆ.

ಹೆಚ್ಚುವರಿ ಪೊಲೀಸ್ ಮಹಾನಿರ್ದೇಶಕ (ಕಾನೂನು ಮತ್ತು ಸುವ್ಯವಸ್ಥೆ) ಅಲೋಕ್ ಕುಮಾರ್ ಮಾತನಾಡಿ, 'ಕರ್ನಾಟಕದಲ್ಲಿ 47,000 ಕ್ಕೂ ಹೆಚ್ಚು ರೌಡಿ ಶೀಟರ್‌ಗಳಿದ್ದಾರೆ. ಯಾವುದೇ ಘೋರ ಅಪರಾಧಗಳನ್ನು ಮಾಡದ ದುಷ್ಕರ್ಮಿಗಳ ಹೆಸರನ್ನು ಮಾತ್ರ ಹಿಂಪಡೆಯಲಾಗಿದೆ' ಎಂದು ತಿಳಿಸಿದ್ದಾರೆ.

'ಸಕ್ರಿಯ ಮತ್ತು ಕುಖ್ಯಾತ ರೌಡಿಗಳ ವಿರುದ್ಧ ತಡೆಗಟ್ಟುವ ಕ್ರಮಗಳನ್ನು ತೆಗೆದುಕೊಳ್ಳುವಲ್ಲಿ ಕೇಂದ್ರೀಕೃತ ವಿಧಾನವನ್ನು ಹೊಂದಲು ಇದು ಸಹಾಯ ಮಾಡುತ್ತದೆ. ರಾಜ್ಯದಲ್ಲಿ ಅಸ್ತಿತ್ವದಲ್ಲಿರುವ 47,000 ಕ್ಕೂ ಹೆಚ್ಚು ರೌಡಿ ಶೀಟರ್‌ಗಳ ವಿರುದ್ಧ ಮುಂಜಾಗ್ರತಾ ಕ್ರಮಗಳನ್ನು ತೆಗೆದುಕೊಳ್ಳಲಾಗುತ್ತದೆ' ಎಂದು ಅವರು ಹೇಳಿದರು.

'ಎಚ್ಚರಿಕೆಯಿಂದ ಕಾರ್ಯವಿಧಾನವನ್ನು ಅನುಸರಿಸಿದ ನಂತರವೇ ಇಲಾಖೆಯು ಹೆಸರುಗಳನ್ನು ಹಿಂಪಡೆದಿದೆ ಮತ್ತು ಯಾವುದೇ ರಾಜಕೀಯ ಒತ್ತಡವಿಲ್ಲ' ಎಂದು ತಿಳಿಸಿದರು.

ಯಾವುದೇ ಪ್ರಕರಣಗಳಿಲ್ಲದ ರೌಡಿ ಶೀಟರ್‌ಗಳ ಹೆಸರನ್ನು ಮಾತ್ರ ಹಿಂಪಡೆಯಲು ರಾಜ್ಯ ಸರ್ಕಾರ ಪೊಲೀಸ್ ಇಲಾಖೆಗೆ ಸೂಚಿಸಿದೆ ಎಂದು ಗೃಹ ಸಚಿವ ಆರಗ ಜ್ಞಾನೇಂದ್ರ ಹೇಳಿದರು.

English summary

In the first two months of this year, the Karnataka Police Department dropped 7,361 names from the list of rowdy sheeters. It dropped 3,314 names from the Rowdy Sheeter list throughout last year. Now, in just two months, twice as many rowdies have been removed from the rowdy sheeter list, it has given rise to doubt,