ಶ್ರೀಶಾಂತ್ ಸ್ಪಾಟ್ ಫಿಕ್ಸಿಂಗ್ ಮಾಡಿದ್ದು ಹೇಗೆ?

ನವದೆಹಲಿ, ಮೇ.16: ಐಪಿಎಲ್ 2013 ಟೂರ್ನಿಯಲ್ಲಿ ಸ್ಪಾಟ್ ಫಿಕ್ಸಿಂಗ್ ನಡೆದಿದ್ದು, ರಾಜಸ್ಥಾನ ರಾಯಲ್ಸ್ ತಂಡ ಶ್ರೀಶಾಂತ್ ಸೇರಿ ಇಬ್ಬರು ಆಟಗಾರರನ್ನು ಬಂಧಿಸಿರುವುದನ್ನು ದೆಹಲಿ ಪೊಲೀಸ್ ವರಿಷ್ಠ ನೀರಜ್ ಕುಮಾರ್ ಸ್ಪಷ್ಟಪಡಿಸಿದ್ದಾರೆ.

ಕ್ರೀಡಾಲೋಕವನ್ನು ಬೆಚ್ಚಿಬೀಳಿಸಿರುವ ಇಂಡಿಯನ್ ಪ್ರಿಮಿಯರ್ ಲೀಗ್ ನ ಬೆಟ್ಟಿಂಗ್, ಮ್ಯಾಚ್ ಫಿಕ್ಸಿಂಗ್, ಸ್ಪಾಟ್ ಫಿಕ್ಸಿಂಗ್ ಬಗ್ಗೆ ವಿವರಣೆ ದೆಹಲಿ ಪೊಲೀಸ್ ವರಿಷ್ಠ ನೀರಜ್ ಕುಮಾರ್ ಗುರುವಾರ(ಮೇ.16) ಸುದ್ದಿಗೋಷ್ಠಿ ನಡೆಸಿ ತಮ್ಮ ಬಳಿ ಇದ್ದ ವಿಡಿಯೋ ದಾಖಲೆಗಳನ್ನು ಬಿಡುಗಡೆ ಮಾಡಿದರು.ಇದರ ಜೊತೆಗೆ ಆಟಗಾರರು ಬಳಸುತ್ತಿದ್ದ ಗುಪ್ತ ಪದ, ಬುಕ್ಕಿಗಳಿಗೆ ನೀಡುತ್ತಿದ್ದ ಸಂದೇಶದ ಬಗ್ಗೆ ವಿವರಿಸಿದರು

ಸಮಯ 3.55: ಶ್ರೀಶಾಂತ್ ಲೀಡರ್?
* ಕೇರಳ ಮೂಲದ ರಾಜಸ್ಥಾನ್ ರಾಯಲ್ಸ್ ತಂಡದ ವೇಗಿ ಎಸ್ ಶ್ರೀಶಾಂತ್ ಅವರು ಈ ಪ್ರಕರಣದಲ್ಲಿ ಹೆಚ್ಚಿನ ಪ್ರಮಾಣದಲ್ಲಿ ಭಾಗಿಯಾಗಿರುವುದು ಕಂಡು ಬರುತ್ತದೆ. ಆದರೆ, ಅವರನ್ನು ಈ ಸಮಯಕ್ಕೆ ಫಿಕ್ಸಿಂಗ್ ಜಾಲದ ಲೀಡರ್ ಎನ್ನಲು ಬರುವುದಿಲ್ಲ.

* ಆಟಗಾರರಿಗೆ ದುಬೈನಿಂದ ಕರೆ ಬಂದಿರುವುದು, ಡಾಲರ್ ಗಳಲ್ಲಿ ಹಣ ಸಂದಾಯ ವ್ಯವಹಾರ ನಡೆದಿರುವುದು ನಿಜ. ಹೀಗಾಗಿ ಇಡೀ ಬೆಟ್ಟಿಂಗ್ ಜಾಲದ ರುವಾರಿ ವಿದೇಶದಲ್ಲಿ ಕೂತು ಇಲ್ಲಿ ಆಟವಾಡಿಸುತ್ತಿದ್ದಾನೆ ಎನ್ನಬಹುದು ಎಂದು ನೀರಜ್ ಹೇಳಿದರು.

ಸಮಯ 3.45 : ಧೋನಿ ಫಿಕ್ಸರ್ ? ಚೆನ್ನೈ ಸೂಪರ್ ಕಿಂಗ್ಸ್ ನಾಯಕ ಎಂಎಸ್ ಧೋನಿ ಅಥವಾ ತಂಡದ ಮಾಲೀಕರು ಬುಕ್ಕಿಗಳ ಜೊತೆ ಸಂಪರ್ಕ ಹೊಂದಿರುವ ಬಗ್ಗೆ ಸಾಕ್ಷಿಗಳಿಲ್ಲ.
* ಪೊಲೀಸರಿಗೆ ಬುಕ್ಕಿಂಗ್ ಬೆಟ್ಟಿಂಗ್ ಜಾಲದ ಬಗ್ಗೆ ಮಾಹಿತಿ ಇತ್ತು. ಆದರೆ, ಯಾವ ಆಟಗಾರರು ಸ್ಪಾಟ್ ಫಿಕ್ಸಿಂಗ್ ನಲ್ಲಿ ತೊಡಗಿದ್ದಾರೆ ಎಂಬುದು ತಿಳಿಯಲು ಕೆಲ ತಿಂಗಳುಗಳ ಶ್ರಮವಹಿಸಬೇಕಾಯಿತು.
* ಕಳೆದ ರಾತ್ರಿ ಮುಂಬೈ ಇಂಡಿಯನ್ಸ್ vs ರಾಜಸ್ಥಾನ ರಾಯಲ್ಸ್ ಪಂದ್ಯ ಕೂಡಾ ಫಿಕ್ಸ್ ಆಗಿತ್ತು. ಅಂಕಿತ್ ಚೌವ್ಹಾಣ್ ಎರಡನೇ ಓವರ್ ನಲ್ಲಿ 13 ರನ್ ನೀಡಲು ಸೂಚನೆ ಸಿಕ್ಕಿತ್ತು.
* ಮೊದಲ ಓವರ್ ನಲ್ಲಿ ಕೇವಲ 2 ರನ್ ನೀಡಿದ್ದ ಅಂಕಿತ್, ಎರಡನೇ ಓವರ್ ನಲ್ಲಿ ಪೂರ್ವ ನಿಗದಿಯಂತೆ 12 ರನ್ ಚೆಚ್ಚಿಸಿಕೊಂಡರು. ಇದಕ್ಕೆ ಅಂಕಿತ್ ಗೆ 60 ಲಕ್ಷ ರು ಆಫರ್ ಸಿಕ್ಕಿದೆ ಎಂದು ದೆಹಲಿ ಪೊಲೀಸರು ಹೇಳಿದರು.

ಸಮಯ 3.30: ಬುಕ್ಕಿಗಳಿಗೆ ಪರಿಚಯವಾಗಿದ್ದು ಹೇಗೆ?
* ಶ್ರೀಶಾಂತ್ ಕಸಿನ್ ಜಿಜು ಜನಾರ್ಧನ್ ಸ್ವತಃ ಬುಕ್ಕಿಯಾಗಿದ್ದು, ದೊಡ್ಡ ಜಾಲಕ್ಕೆ ಎಲ್ಲರನ್ನು ಪರಿಚಯಿಸಿದ್ದಾನೆ. ಶ್ರೀಶಾಂತ್ ಗೆ ಒಂದು ಓವರ್ ಗೆ 40 ಲಕ್ಷ ರು ನಂತೆ ಹಣ ಸಂದಾಯವಾಗಿದೆ.
* ರಾಜಸ್ಥಾನ್ ರಾಯಲ್ಸ್ ತಂಡದ ಇತರೆ ಯಾವ ಆಟಗಾರರಾಗಲಿ, ಐಪಿಎಲ್ ನ ಇತರೆ ತಂಡದ ಕ್ರಿಕೆಟರ್ಸ್ ಕಳ್ಳಾಟದಲ್ಲಿ ಭಾಗಿಯಾಗಿರುವ ಬಗ್ಗೆ ಯಾವುದೇ ಮಾಹಿತಿ ಇಲ್ಲ. ಈ ಮೂವರು ಆಟಗಾರರು ಮಾತ್ರ ಆರೋಪಿಗಳಾಗಿದ್ದಾರೆ.
* ಐಪಿಎಲ್ ಟೂರ್ನಿ ನಡೆಸುತ್ತಿರುವ ಬಿಸಿಸಿಐ ಅಧಿಕಾರಿಗಳ ತಂಡ, ಮ್ಯಾನೇಜರ್ ಗಳ ಬಗ್ಗೆ ಕೂಡಾ ಸಂಶಯವಿತ್ತು ಆದರೆ, ಯಾರೊಬ್ಬರೂ ಆರೋಪಿಗಳಾಗಿ ಗುರುತಿಸಿಕೊಂಡಿಲ್ಲ.
* ಶೇನ್ ಟೈಟ್ ಸೇರಿದಂತೆ ಈ ಬಾರಿ ಆಡುತ್ತಿರುವ ಯಾವ ವಿದೇಶಿ ಆಟಗಾರರು ಕಳ್ಳಾಟದಲ್ಲಿ ಭಾಗಿಯಾಗಿಲ್ಲ

ಸಮಯ 3.15: ಮೇ.9 ರಂದು ನಡೆದ ಕಿಂಗ್ಸ್ XI ಪಂಜಾಬ್ ಹಾಗೂ ರಾಜಸ್ಥಾನ್ ರಾಯಲ್ಸ್ ನಡುವಿನ ಪಂದ್ಯ ನೋಡಿದ ಮೇಲೆ ಎರಡನೇ ಬಾರಿಗೆ ಡೌಟ್ ಬಂತು.

* ಆ ಪಂದ್ಯದಲ್ಲಿ ಶ್ರೀಶಾಂತ್ ಅವರು ತಮ್ಮ ಪ್ಯಾಂಟ್ ಹಿಂಬದಿಯಲ್ಲಿ ಸಣ್ಣ ಟವೆಲ್ ಸಿಕ್ಕಿಸಿಕೊಂಡರು. ಇದು ಬುಕ್ಕಿಗಳಿಗೆ ನೀಡಿದ ಸಂಕೇತವಾಗಿತ್ತು. ಈ ಮೂಲಕ ಈ ಓವರ್ ನಲ್ಲಿ ಪೂರ್ವನಿಗದಿಯಂತೆ ರನ್ ನೀಡುತ್ತೇನೆ ಎಂದು ಸಂದೇಶ ರವಾನಿಸಿದ್ದರು.
* ಪೂರ್ವ ನಿಗದಿತ ಫಿಕ್ಸ್ ಆಗದ ಓವರ್ ಎಂದು ಸೂಚಿಸಲು ಮುಂದಿನ ಓವರ್ ನಲ್ಲಿ ಟವೆಲ್ ತೆಗೆದು ಜೇಬಿನಲ್ಲಿರಿಸಿಕೊಂಡರು. ಆ ಓವರ್ ಮೇಲೆ ಯಾವುದೇ ಬುಕ್ಕಿಂಗ್ ನಡೆಯಲಿಲ್ಲ ಎಂದರ್ಥ.

ಸಮಯ 3.00: ಶ್ರೀಶಾಂತ್, ಅಜಿತ್ ಚಂಡಿಲಾ, ಅಂಕಿತ್ ಚೌವ್ಹಾಣ್ ಜೊತೆಗೆ 7 ಜನ ಬುಕ್ಕಿಗಳು ಸೇರಿದಂತೆ 14 ಜನರನ್ನು ಬಂಧಿಸಲಾಗಿದೆ. ಮೊಬೈಲ್ ಫೋನ್ ಅಪ್ಲಿಕೇಷನ್ ಬಳಸಿ ಸ್ಪಾಟ್ ಫಿಕ್ಸಿಂಗ್ ಬಗ್ಗೆ ಮಾಹಿತಿ ವಿನಿಮಯ ಮಾಡಿಕೊಂಡಿದ್ದರು.

* ಶ್ರೀಶಾಂತ್ ಅವರ ಕಸಿನ್ ಜಿಜು ಪೊಕ್ಕಾನ್ ಜನಾರ್ದನ್ ಬುಕ್ಕಿಯಾಗಿದ್ದು ವಿವಿಧ ಬೆಟ್ಟಿಂಗ್ ಜಾಲಕ್ಕೆ ಆಟಗಾರರಿಗೆ ಆತನೇ ಪರಿಚಯಿಸಿದ್ದ.

* ಪ್ರತಿ ಪಂದ್ಯದಲ್ಲಿ ನಿಗದಿತ ಸಮಯಕ್ಕೆ ನಿಗದಿತ ಓವರ್ ನಲ್ಲಿ ಇಂತಿಷ್ಟು ರನ್ ನೀಡಬೇಕೆಂದು ಪೂರ್ವ ಒಪ್ಪಂದವಾಗಿತ್ತು.

* ಯಾವ ಓವರ್ ಫಿಕ್ಸ್ ಆಗಿದೆ ಎಂದು ಬುಕ್ಕಿಗಳಿಗೆ ತಿಳಿಸಲು ಕೆಲವು ಹಾವ ಭಾವಗಳನ್ನು ಆಟಗಾರರು ಬಳಸುವಂತೆ ಸೂಚಿಸಲಾಗಿತ್ತು.

* ಆಟಗಾರರು ವಾಚ್ ತಿರುಗಿಸುವುದು, ಕೈವಸ್ತ್ರ ಬದಲಿಸುವುದು, ಅಂಗಿ ಬದಲಾಯಿಸುವುದು..ತಂಪು ಕನ್ನಡಕ ಬದಲಾವಣೆ..ಜೇಬಿನಿಂದ ಲಾಕೆಟ್ ತೆಗೆಯುವುದು..ಇತ್ಯಾದಿ

* ಮೊದಲ ಬಾರಿಗೆ ರಾಜಸ್ಥಾನ್ ರಾಯಲ್ಸ್ ಹಾಗೂ ಪುಣೆ ವಾರಿಯರ್ಸ್ ಪಂದ್ಯದಲ್ಲಿ ಈ ರೀತಿ ಗುಪ್ತ ಸಂಕೇತಗಳ ರವಾನೆ ಬಗ್ಗೆ ಸಂಶಯ ಕಂಡು ಬಂದಿತ್ತು.

* ಆದರೆ, ಚಂಡಿಲಾ ಆ ಪಂದ್ಯದಲ್ಲಿ 2 ಓವರ್ ನಲ್ಲಿ 14 ರನ್ ಮಾತ್ರ ನೀಡಿದ್ದರು. ಬುಕ್ಕಿಗಳಿಗೆ ಸಿಗ್ನಲ್ ನೀಡಲು ಮರೆತಿದ್ದರು. ಹೀಗಾಗಿ ಬುಕ್ಕಿಗಳು ಭಾರಿ ನಷ್ಟ ಅನುಭವಿಸಿದ್ದರು.

* ಕೋಪಗೊಂಡ ಬುಕ್ಕಿಗಳು ಪ್ರತಿ ಓವರ್ ಗೆ 20 ಲಕ್ಷ ರು ನಂತೆ ಹಣ ವಾಪಸ್ ಮಾಡುವಂತೆ ಚಂಡಿಲ ಹಿಂದೆ ಬಿದ್ದಿದ್ದರು.

English summary

IPL 2013 Spot Fixing : Delhi police chief Neeraj Kumar says players were paid to give certain number of runs per over. Sreesanth and two Rajasthan Royals teammates arrested on charges of spot-fixing in Indian Premier League Twenty 20 tournament 2013