ಮಾರ್ಚ್ 3, 2026 – ಪೂರ್ವ ಫಲ್ಗುಣಿ ನಕ್ಷತ್ರದಲ್ಲಿ ಕೇತುಗ್ರಸ್ತ ಮಹಾ ಚಂದ್ರಗ್ರಹಣ: ದ್ವಾದಶ ರಾಶಿಗಳ ಫಲಿತಾಂಶ

Lunar Eclipse 2026: 2026 ಮಾರ್ಚ್ 3ರಂದು ಸಿಂಹ ರಾಶಿಯ ಪೂರ್ವ ಫಲ್ಗುಣಿ ನಕ್ಷತ್ರದಲ್ಲಿ ಕೇತುಗ್ರಸ್ತ ಮಹಾ ಚಂದ್ರಗ್ರಹಣ ಸಂಭವಿಸುತ್ತಿದೆ. ವೇದಶಾಸ್ತ್ರಗಳ ಪ್ರಕಾರ ಚಂದ್ರಗ್ರಹಣವು ಮಾನವ ಮನಸ್ಸು, ಆರೋಗ್ಯ, ಕುಟುಂಬ ಹಾಗೂ ಆರ್ಥಿಕ ಕ್ಷೇತ್ರಗಳ ಮೇಲೆ ಸೂಕ್ಷ್ಮ ಪ್ರಭಾವ ಬೀರುತ್ತದೆ. ವಿಶೇಷವಾಗಿ ಚಂದ್ರನು ಮನಸ್ಸಿನ ಕಾರಕನಾಗಿರುವುದರಿಂದ, ಈ ಗ್ರಹಣವು ಭಾವನಾತ್ಮಕ ಹಾಗೂ ಆಧ್ಯಾತ್ಮಿಕ ಅಲೆಗಳನ್ನು ಉಂಟು ಮಾಡುವ ಸಾಧ್ಯತೆ ಇದೆ. ಕೇತು ಸಂಯೋಗದಿಂದ ಈ ಗ್ರಹಣವು ಆತ್ಮಪರಿಶೀಲನೆ, ಹಳೆಯ ಕರ್ಮಗಳ ಫಲಾನುಭವ ಹಾಗೂ ಅಚಾನಕ್ ಬದಲಾವಣೆಗಳ ಸೂಚಕವಾಗಿರುತ್ತದೆ. (ಪಂಡಿತ್ ವಿಠ್ಠಲ್ ಭಟ್: ಬರಹ)

ಶಾಸ್ತ್ರಾನುಸಾರ, ನಿಮ್ಮ ಜನ್ಮ ರಾಶಿಯಿಂದ 3, 6, 10 ಮತ್ತು 11ನೇ ಸ್ಥಾನದಲ್ಲಿ ಗ್ರಹಣ ಸಂಭವಿಸಿದರೆ ಶುಭಫಲ ದೊರೆಯುತ್ತದೆ. 1, 4, 8 ಮತ್ತು 12ನೇ ಸ್ಥಾನಗಳಲ್ಲಿ ಗ್ರಹಣವಾದರೆ ಅಶುಭ ಪರಿಣಾಮಗಳ ಸಾಧ್ಯತೆ ಹೆಚ್ಚಾಗುತ್ತದೆ. 2, 5, 7 ಮತ್ತು 9ನೇ ಸ್ಥಾನಗಳಲ್ಲಿ ಗ್ರಹಣವಾದರೆ ಮಿಶ್ರ ವಿಚಿತ್ರ ಫಲಗಳು ಕಾಣಿಸಿಕೊಳ್ಳುತ್ತವೆ. ಈ ನಿಯಮದ ಪ್ರಕಾರ ಸಿಂಹ ರಾಶಿಯಲ್ಲಿ ನಡೆಯುತ್ತಿರುವ ಈ ಗ್ರಹಣವು ಪ್ರತಿ ರಾಶಿಗೂ ವಿಭಿನ್ನ ಪರಿಣಾಮಗಳನ್ನು ನೀಡಲಿದೆ.

ಅಶುಭ ಫಲ ಪಡೆಯುವ ರಾಶಿಗಳು

ಸಿಂಹ, ಕನ್ಯಾ, ವೃಷಭ ಮತ್ತು ಮಕರ ರಾಶಿ

ಸಿಂಹ ರಾಶಿಯವರಿಗಿದು ಜನ್ಮರಾಶಿಯಲ್ಲೇ ಗ್ರಹಣವಾಗುತ್ತಿರುವುದರಿಂದ ಮಾನಸಿಕ ಅಶಾಂತಿ, ಆರೋಗ್ಯದಲ್ಲಿ ಏರುಪೇರು ಹಾಗೂ ಅನಿರೀಕ್ಷಿತ ವೆಚ್ಚಗಳ ಸಂಭವ ಇದೆ. ತುರ್ತು ನಿರ್ಧಾರಗಳನ್ನು ಕೈಗೊಳ್ಳುವುದು ತಪ್ಪಿಸುವುದು ಒಳಿತು. ಕುಟುಂಬದಲ್ಲಿ ಸಣ್ಣ ಕಲಹಗಳು ಉಂಟಾಗಬಹುದು.

ಕನ್ಯಾ ರಾಶಿಯವರಿಗೆ ಇದು 12ನೇ ಸ್ಥಾನದಲ್ಲಿ ಗ್ರಹಣವಾಗುವುದರಿಂದ ಆರ್ಥಿಕ ವ್ಯಯ ಹೆಚ್ಚಾಗುವ ಸೂಚನೆ ಇದೆ. ದೂರ ಪ್ರಯಾಣ ಅಥವಾ ಆಸ್ಪತ್ರೆ ವೆಚ್ಚಗಳ ಸಾಧ್ಯತೆ ಇದೆ. ದೈವಸ್ಮರಣೆ, ದಾನಧರ್ಮಗಳಿಂದ ಪರಿಹಾರ ಕಂಡುಕೊಳ್ಳಬಹುದು.

ವೃಷಭ ರಾಶಿಗೆ ಇದು 4ನೇ ಸ್ಥಾನದಲ್ಲಿ ಗ್ರಹಣ. ಮನೆ, ವಾಹನ, ಆಸ್ತಿ ಸಂಬಂಧಿತ ವಿಚಾರಗಳಲ್ಲಿ ಜಾಗ್ರತೆ ಅಗತ್ಯ. ಮನೆಯಲ್ಲಿ ಶಾಂತಿ ಕಾಪಾಡಿಕೊಳ್ಳುವುದು ಮುಖ್ಯ.

ಮಕರ ರಾಶಿಯವರಿಗೆ 8ನೇ ಸ್ಥಾನದಲ್ಲಿ ಗ್ರಹಣವಾಗುವುದರಿಂದ ಅಚಾನಕ್ ಅಡೆತಡೆಗಳು, ಆರೋಗ್ಯದ ಕಡೆ ಹೆಚ್ಚು ಗಮನ ಬೇಕಾಗುತ್ತದೆ. ಗುಪ್ತ ಶತ್ರುಗಳಿಂದ ಎಚ್ಚರಿಕೆ ಅವಶ್ಯಕ.

ಶುಭ ಫಲ ಪಡೆಯುವ ರಾಶಿಗಳು

ಮಿಥುನ, ತುಲಾ, ವೃಶ್ಚಿಕ ಮತ್ತು ಮೀನ ರಾಶಿ

ಮಿಥುನ ರಾಶಿಗೆ ಇದು 3ನೇ ಸ್ಥಾನದಲ್ಲಿ ಗ್ರಹಣವಾಗುವುದರಿಂದ ಧೈರ್ಯ, ಸಾಹಸ ಹಾಗೂ ಪ್ರಯತ್ನಗಳಲ್ಲಿ ಯಶಸ್ಸು ದೊರೆಯಲಿದೆ. ಸಹೋದರ ಸಹೋದರಿಯರಿಂದ ಸಹಾಯ ಸಿಗುತ್ತದೆ.

ತುಲಾ ರಾಶಿಗೆ 11ನೇ ಸ್ಥಾನದಲ್ಲಿ ಗ್ರಹಣವಾಗುವುದರಿಂದ ಲಾಭಸ್ಥಾನ ಬಲವಾಗುತ್ತದೆ. ಆದಾಯದ ಮಾರ್ಗಗಳು ವೃದ್ಧಿಯಾಗುತ್ತವೆ. ಹಳೆಯ ಬಾಕಿಗಳು ವಾಪಸ್ ಸಿಗುವ ಸಾಧ್ಯತೆ ಇದೆ.

ವೃಶ್ಚಿಕ ರಾಶಿಗೆ 10ನೇ ಸ್ಥಾನದಲ್ಲಿ ಗ್ರಹಣವಾಗುವುದರಿಂದ ಉದ್ಯೋಗ ಹಾಗೂ ವ್ಯವಹಾರದಲ್ಲಿ ಉತ್ತಮ ಫಲಿತಾಂಶ. ಪದೋನ್ನತಿ ಅಥವಾ ಹೊಸ ಅವಕಾಶಗಳ ಸಾಧ್ಯತೆ ಇದೆ.

ಮೀನ ರಾಶಿಗೆ 6ನೇ ಸ್ಥಾನದಲ್ಲಿ ಗ್ರಹಣವಾಗುವುದರಿಂದ ಶತ್ರು ನಿವಾರಣೆ, ಸ್ಪರ್ಧೆಯಲ್ಲಿ ಜಯ ಹಾಗೂ ಆರೋಗ್ಯದಲ್ಲಿ ಸುಧಾರಣೆ ಕಾಣಬಹುದು.

ಮಿಶ್ರ ವಿಚಿತ್ರ ಫಲ ಪಡೆಯುವ ರಾಶಿಗಳು

ಕರ್ಕ, ಮೇಷ, ಧನು ಮತ್ತು ಕುಂಭ ರಾಶಿ

ಕರ್ಕ ರಾಶಿಗೆ 2ನೇ ಸ್ಥಾನದಲ್ಲಿ ಗ್ರಹಣವಾಗುವುದರಿಂದ ಹಣಕಾಸಿನ ವಿಷಯದಲ್ಲಿ ಏರುಪೇರು ಕಂಡು ಬರುತ್ತದೆ. ಮಾತಿನ ಮೇಲೆ ನಿಯಂತ್ರಣ ಅಗತ್ಯ.

ಮೇಷ ರಾಶಿಗೆ 5ನೇ ಸ್ಥಾನದಲ್ಲಿ ಗ್ರಹಣವಾಗುವುದರಿಂದ ಮಕ್ಕಳ ವಿಷಯದಲ್ಲಿ ಚಿಂತೆ ಮತ್ತು ವಿದ್ಯಾಭ್ಯಾಸದಲ್ಲಿ ಗಮನ ಬೇಕಾಗುತ್ತದೆ. ಆದರೆ ಹೊಸ ಸೃಜನಾತ್ಮಕ ಆಲೋಚನೆಗಳಿಗೆ ಅವಕಾಶ ಸಿಗಬಹುದು.

ಧನು ರಾಶಿಗೆ 9ನೇ ಸ್ಥಾನದಲ್ಲಿ ಗ್ರಹಣವಾಗುವುದರಿಂದ ಭಾಗ್ಯದಲ್ಲಿ ಸ್ವಲ್ಪ ಕುಸಿತ ಕಂಡರೂ ಆಧ್ಯಾತ್ಮಿಕ ಆಸಕ್ತಿ ಹೆಚ್ಚಾಗುತ್ತದೆ.

ಕುಂಭ ರಾಶಿಗೆ 7ನೇ ಸ್ಥಾನದಲ್ಲಿ ಗ್ರಹಣವಾಗುವುದರಿಂದ ದಾಂಪತ್ಯ ಹಾಗೂ ಪಾಲುದಾರಿಕೆ ವಿಷಯಗಳಲ್ಲಿ ಸಮತೋಲನ ಅಗತ್ಯ. ಸಹನೆಯಿಂದ ನಡೆದುಕೊಂಡರೆ ಲಾಭವಾಗುತ್ತದೆ.

ಗ್ರಹಣ ಸಮಯದಲ್ಲಿ ಪಾಲಿಸಬೇಕಾದ ಆಚರಣೆಗಳು

ಚಂದ್ರಗ್ರಹಣದ ಸಂದರ್ಭದಲ್ಲಿ ಉಪವಾಸ, ಜಪ, ತಪ ಹಾಗೂ ಧ್ಯಾನ ಮಾಡುವುದು ಶ್ರೇಯಸ್ಕರ. "ಓಂ ನಮಃ ಶಿವಾಯ" ಅಥವಾ ಚಂದ್ರ ಗಾಯತ್ರಿ ಮಂತ್ರ ಜಪಿಸುವುದು ಒಳಿತು. ಗ್ರಹಣ ಮುಗಿದ ನಂತರ ಸ್ನಾನ ಮಾಡಿ ದಾನಧರ್ಮ ಮಾಡುವುದು ಉತ್ತಮ ಫಲ ನೀಡುತ್ತದೆ. ಗರ್ಭಿಣಿಯರು ವಿಶೇಷ ಜಾಗ್ರತೆ ವಹಿಸಬೇಕು. ಗ್ರಹಣ ಸಮಯದಲ್ಲಿ ಆಹಾರ ಸೇವನೆ ತಪ್ಪಿಸುವುದು ಶಾಸ್ತ್ರೋಕ್ತ.

ಈ ಕೇತುಗ್ರಸ್ತ ಮಹಾ ಚಂದ್ರಗ್ರಹಣವು ಪ್ರತಿಯೊಬ್ಬರಿಗೂ ಜೀವನದ ಕೆಲವು ಕ್ಷೇತ್ರಗಳಲ್ಲಿ ಬದಲಾವಣೆ ತರಬಹುದಾದ ಮಹತ್ವದ ಖಗೋಳ ಘಟನೆ. ಭಯಪಡುವ ಅವಶ್ಯಕತೆ ಇಲ್ಲ; ಜಾಗ್ರತೆ, ಧೈರ್ಯ ಹಾಗೂ ದೈವಭಕ್ತಿ ಇದ್ದರೆ ಯಾವುದೇ ಅಶುಭ ಪರಿಣಾಮಗಳನ್ನು ಕಡಿಮೆ ಮಾಡಬಹುದು. ಶುಭಾಶಯಗಳು!

English summary

Discover how the March 3, 2026, Lunar Eclipse in Purva Phalguni Nakshatra affects your zodiac sign. Detailed insights on lucky and unlucky signs, rituals, and remedies.