ಈ ಊರಿನಲ್ಲಿ ಹುಟ್ಟುವ ಮನುಷ್ಯರು, ಪ್ರಾಣಿ ಪಕ್ಷಿಗಳಿಗೆ ದೃಷ್ಟಿಯೇ ಇರಲ್ಲ! ಇಲ್ಲಿರುವ ಮರವೇ ಇವರಿಗೆ ಶಾಪವಂತೆ

ಮನುಷ್ಯರಂತೆ ಪ್ರಾಣಿ ಪಕ್ಷಿಗಳು ಕೂಡಾ ದೃಷ್ಟಿಹೀನ

ಟಿಲ್ಟೆಪೆಕ್ ಗ್ರಾಮವು ಸುಮಾರು 300 ರಿಂದ 400 ಜನರಿಗೆ ನೆಲೆಯಾಗಿದೆ. ಸ್ಥಳೀಯರ ಪ್ರಕಾರ, ಇಲ್ಲಿ ಜನಿಸಿದ ಹೆಚ್ಚಿನ ಮಕ್ಕಳು ಆರಂಭದಲ್ಲಿ ಸಾಮಾನ್ಯರಂತೆಯೇ ಕಾಣುತ್ತಾರೆ. ಹುಟ್ಟಿದಾಗ ಎಲ್ಲರ ದೃಷ್ಟಿಯೂ ಚೆನ್ನಾಗಿಯೇ ಇರುತ್ತದೆ. ಆದರೆ ದಿನ ಕಳೆಯುತ್ತಿದ್ದಂತೆ ಅವರ ದೃಷ್ಟಿ ಕ್ಷೀಣಿಸಲು ಪ್ರಾರಂಭಿಸುತ್ತದೆ. ಕ್ರಮೇಣ, ಅವರು ಸಂಪೂರ್ಣ ದೃಷ್ಟಿಯನ್ನು ಕಳೆದುಕೊಂಡು ಕುರುಡಾಗಿ ಬಿಡುತ್ತಾರೆ. ಇಲ್ಲಿ ವಾಸಿಸುವ ಪ್ರಾಣಿಗಳಲ್ಲೂ ಇದೇ ಸ್ಥಿತಿ ಕಂಡುಬರುತ್ತದೆ. ನಾಯಿ, ಬೆಕ್ಕು, ಪಕ್ಷಿಗಳು ಮತ್ತು ಇತರ ಪ್ರಾಣಿಗಳು ಸಹ ದೃಷ್ಟಿ ಸಮಸ್ಯೆಯನ್ನು ಎದುರಿಸುತ್ತವೆ. ಇದೇ ಕಾರಣಕ್ಕಾಗಿ ಗ್ರಾಮ ಎಲ್ಲೆಡೆ ಚರ್ಚೆಯ ವಸ್ತುವಾಗಿದೆ.

ಇದಕ್ಕೆಲ್ಲಾ ಕಾರಣ ಮರದ ಶಾಪವಂತೆ

ಈ ಸಮಸ್ಯೆಗೆ ಮರವೊಂದರ ಶಾಪವೇ ಕಾರಣ ಎನ್ನುವುದು ಟಿಲ್ಟೆಪೆಕ್ ಜನರ ನಂಬಿಕೆ. ಸ್ಥಳೀಯ ದಂತಕಥೆಯ ಪ್ರಕಾರ, ಶತಮಾನಗಳ ಹಿಂದೆ, ಗ್ರಾಮದಲ್ಲಿ ಒಂದು ವಿಶೇಷ ಮರವಿತ್ತು. ಅದನ್ನು ಯಾರೇ ನೋಡಿದರೂ ಅವರು ದೃಷ್ಟಿ ಕಳೆದುಕೊಳ್ಳುತ್ತಿದ್ದರು ಎನ್ನಲಾಗಿದೆ. ಅನೇಕ ಗ್ರಾಮಸ್ಥರು ಇನ್ನೂ ಈ ಸಮಸ್ಯೆಗೆ ಮರ ಅಥವಾ ಅದರ ಸುತ್ತಲಿನ ಕೆಲವು ನಿಗೂಢ ಶಕ್ತಿಯೇ ಕಾರಣ ಎಂದು ನಂಬುತ್ತಾರೆ.

ವಿಜ್ಞಾನಿಗಳು ಹೇಳುವುದೇ ಬೇರೆ

ಗ್ರಾಮಸ್ಥರು ಇದನ್ನು ಶಾಪವೆಂದು ಪರಿಗಣಿಸಿದರೆ, ವಿಜ್ಞಾನಿಗಳು ಬೇರೆಯದೇ ಕಾರಣವನ್ನು ಸೂಚಿಸಿದ್ದಾರೆ. ಟಿಲ್ಟೆಪೆಕ್‌ನಲ್ಲಿ ಕಂಡುಬರುವ ಕುರುಡುತನಕ್ಕೆ ಅನುವಂಶಿಕ ಅಂಶಗಳೇ ಕಾರಣವಾಗಿರಬಹುದು ಎಂದು ಹಲವಾರು ಅಧ್ಯಯನಗಳು ಸೂಚಿಸಿವೆ. ಸಣ್ಣ ಸಮುದಾಯದೊಳಗಿನ ದೀರ್ಘಕಾಲೀನ ವಿವಾಹಗಳು ಕೆಲವು ಜೀನ್‌ಗಳನ್ನು ಬಲಪಡಿಸಬಹುದು, ಕೆಲವು ರೋಗಗಳು ಪೀಳಿಗೆಯಿಂದ ಪೀಳಿಗೆಗೆ ಹರಡುವ ಅಪಾಯವನ್ನು ಹೆಚ್ಚಿಸಬಹುದು ಎನ್ನುವುದು ವಿಜ್ಞಾನಿಗಳ ವಾದ. ಇದಲ್ಲದೆ, ಕೆಲವು ತಜ್ಞರು ಪರಿಸರ ಅಂಶಗಳನ್ನು ಸೂಚಿಸಿದ್ದಾರೆ. ಜನರು ಇದಕ್ಕೆ ನೀರು, ಮಣ್ಣು ಮತ್ತು ಸುತ್ತಮುತ್ತಲಿನ ಪರಿಸರದಲ್ಲಿನ ಕೆಲವು ಅಂಶಗಳಿಗೆ ಕಾರಣವೆಂದು ಹೇಳಿದ್ದಾರೆ. ಕೆಲವು ವರದಿಗಳು ಇಲ್ಲಿರುವ ವಿಷಕಾರಿ ನೊಣಗಳಿಂದ ಈ ಸಮಸ್ಯೆ ಕಾಡುತ್ತಿದೆ ಎಂದೂ ಹೇಳಿದೆ.

ಕುರುಡರಾಗಿದ್ದರೂ ಸಾಮಾನ್ಯ ಜೀವನವನ್ನು ನಡೆಸುತ್ತಾರೆ ಇಲ್ಲಿನ ಜನ

ದೃಷ್ಟಿ ಕಳೆದುಕೊಂಡಿದ್ದರೂ, ಟಿಲ್ಟೆಪೆಕ್ ಜನರು ಸಾಮಾನ್ಯ ಜೀವನವನ್ನು ನಡೆಸಲು ಶ್ರಮಿಸುತ್ತಾರೆ. ತಮ್ಮ ಇತರ ಇಂದ್ರಿಯಗಳಾದ ಶಬ್ದ, ಸ್ಪರ್ಶ ಮತ್ತು ವಾಸನೆಯನ್ನು ಬಳಸಿಕೊಂಡು ದೈನಂದಿನ ಕೆಲಸಗಳನ್ನು ನಿರ್ವಹಿಸುತ್ತಾರೆ. ಇಲ್ಲಿನ ಜನರು ಮನೆಕೆಲಸಗಳನ್ನು ಮಾಡುತ್ತಾರೆ ಮತ್ತು ಕೃಷಿ ಚಟುವಟಿಕೆಗಳಲ್ಲಿ ತೊಡಗುತ್ತಾರೆ. ಮಕ್ಕಳು ತಮ್ಮ ಅಗತ್ಯಗಳಿಗೆ ಅನುಗುಣವಾಗಿ ಶಿಕ್ಷಣವನ್ನು ಪಡೆಯುತ್ತಾರೆ. ಇದರಿಂದಾಗಿ ಅವರು ಸ್ವಾವಲಂಬಿ ಜೀವನ ನಡೆಸುವುದು ಸಾಧ್ಯವಾಗುತ್ತದೆ.

ವಿಫಲವಾಯಿತು ಗ್ರಾಮವನ್ನು ತೊರೆಯುವ ಪ್ರಯತ್ನ

ಮೆಕ್ಸಿಕನ್ ಸರ್ಕಾರವು ಗ್ರಾಮಸ್ಥರನ್ನು ಸ್ಥಳಾಂತರಿಸಲು ಪದೇ ಪದೇ ಪ್ರಯತ್ನಿಸಿದೆ. ಆದರೆ ಹೆಚ್ಚಿನವರು ತಮ್ಮ ಭೂಮಿ ಮತ್ತು ಸಂಸ್ಕೃತಿಯನ್ನು ತ್ಯಜಿಸಲು ಸಿದ್ಧರಿಲ್ಲ. ಕೆಲವರು ಸ್ಥಳಾಂತರಗೊಳ್ಳಲು ಪ್ರಯತ್ನಿಸಿದ್ದಾರೆ. ಆದರೆ ಬೇರೆ ಪರಿಸರಕ್ಕೆ ಹೊಂದಿಕೊಳ್ಳುವುದು ಅವರಿಗೆ ಸಾಧ್ಯವಾಗಲಿಲ್ಲ. ಹಾಗಾಗಿ ಅಂತಿಮವಾಗಿ, ಅನೇಕರು ತಮ್ಮ ಹಳ್ಳಿಗೇ ಮರಳಿದ್ದಾರೆ. ಅವರಿಗೆ, ಟಿಲ್ಟೆಪೆಕ್ ಕೇವಲ ವಾಸಿಸುವ ಸ್ಥಳವಲ್ಲ, ಆದರೆ ಅವರ ಗುರುತು ಮತ್ತು ಸಂಪ್ರದಾಯದ ಸಂಕೇತವಾಗಿದೆ.

ನಿಗೂಢತೆ ಇನ್ನೂ ಸಿಕ್ಕಿಲ್ಲ ಉತ್ತರ

ಟಿಲ್ಟೆಪೆಕ್ ಗ್ರಾಮವು ಇಂದಿಗೂ ನಿಗೂಢವಾಗಿಯೇ ಉಳಿದಿದೆ. ಸ್ಥಳೀಯರು ಇದನ್ನು ಪ್ರಾಚೀನ ಶಾಪದೊಂದಿಗೇ ಬೆಸೆದರೂ ವಿಜ್ಞಾನವು ಇದನ್ನು ಆನುವಂಶಿಕ ಮತ್ತು ಪರಿಸರ ಸಮಸ್ಯೆ ಎಂದು ಕರೆಯುತ್ತಿದೆ. ಸತ್ಯ ಏನೇ ಇರಲಿ, ಕಠಿಣ ಸಂದರ್ಭಗಳಲ್ಲಿಯೂ ಮಾನವರು ಬದುಕಲು ಒಂದು ಮಾರ್ಗವನ್ನು ಕಂಡುಕೊಳ್ಳಬಹುದು ಎಂದು ಈ ಗ್ರಾಮ ಸಾಬೀತು ಮಾಡಿದೆ.

(ಬರಹ: ರಂಜಿತಾ ಆರ್.ಕೆ)