ಸಮುದ್ರದ ಮಧ್ಯೆ ಐಶಾರಾಮಿ ಮನೆ: ಆಸ್ತಿ ತೆರಿಗೆ ಉಳಿಸುವುದಕ್ಕಾಗಿ ಕೋಟ್ಯಾಧಿಪತಿಯ ಸೂಪರ್‌ ಪ್ಲಾನ್‌

ಭೂಮಿಯನ್ನು ಬಿಟ್ಟು ಸಮುದ್ರವನ್ನೇ ತನ್ನ ಮನೆಯನ್ನಾಗಿ ಮಾಡಿಕೊಂಡ ಕತೆ:

ಚಾರ್ಲ್ಸ್ ಸಿಮೋನಿ ವಿಶ್ವಪ್ರಸಿದ್ಧ ತಂತ್ರಜ್ಞಾನ ತಜ್ಞ. ಇವರು ಮೈಕ್ರೋಸಾಫ್ಟ್ ವರ್ಡ್ ಮತ್ತು ಎಕ್ಸೆಲ್ ಸೃಷ್ಟಿಯಲ್ಲಿ ಪ್ರಮುಖ ಪಾತ್ರ ವಹಿಸಿರುವ ಕಾರಣ ಜನಪ್ರಿಯತೆ ಪಡೆದವರು. ಫೋರ್ಬ್ಸ್ ವರದಿಯ ಪ್ರಕಾರ ಸಿಮೋನಿಯ ನಿವ್ವಳ ಮೌಲ್ಯ ಸುಮಾರು 7.2 ಬಿಲಿಯನ್ ಡಾಲರ್‌ ಎಂದು ಅಂದಾಜಿಸಲಾಗಿದೆ. ಶತಕೋಟಿ ಡಾಲರ್ ಸಂಪತ್ತನ್ನು ಹೊಂದಿದ್ದರೂ, ಅವರು ತಮ್ಮ ಬದುಕಿಗೆ ಸಂಬಂಧಪಟ್ಟಂತೆ ಒಂದು ವಿಶಿಷ್ಟ ನಿರ್ಧಾರವನ್ನು ತೆಗೆದುಕೊಂಡಿದ್ದಾರೆ. ಬಹು ದೇಶಗಳಲ್ಲಿ ಆಸ್ತಿಯನ್ನು ಖರೀದಿಸಿದರೆ ತೆರಿಗೆ ಪಾವತಿ ನಿರ್ವಹಣೆ ಮತ್ತು ಸ್ಥಳೀಯ ನಿಯಮಗಳನ್ನು ನಿರ್ವಹಿಸುವುದನ್ನು ಒಳಗೊಂಡಿರುತ್ತದೆ. ಆಸ್ತಿ ತೆರಿಗೆಗಳು, ವಿಶೇಷವಾಗಿ ಕ್ಯಾಲಿಫೋರ್ನಿಯಾ ಮತ್ತು ನ್ಯೂಯಾರ್ಕ್‌ನಂತಹ ದುಬಾರಿ ಯುಎಸ್ ರಾಜ್ಯಗಳಲ್ಲಿ, ಬಹಳಷ್ಟು ಹೆಚ್ಚಿರುತ್ತದೆ. ಇದಕ್ಕಾಗಿ ಅವರು ಒಂದೇ ಸ್ಥಳದಲ್ಲಿ ನೆಲೆ ನಿಲ್ಲದೆ ಐಷಾರಾಮಿ ಜೀವನವನ್ನು ಆನಂದಿಸುವ ಪರಿಹಾರ ಕಂಡುಕೊಂಡರು. ತಮ್ಮದೇ ಆದ ತೇಲುವ ಅರಮನೆಯನ್ನು ನಿರ್ಮಿಸಿದರು.

ಸೂಪರ್‌ಯಾಚ್ಟ್ ಐಷಾರಾಮಿ ಕಚೇರಿ ಮತ್ತು ಮನೆ:

ಮಾಧ್ಯಮ ವರದಿಗಳ ಪ್ರಕಾರ, ಸ್ಕಾಟ್ ಸೂಪರ್‌ಯಾಚ್ ಕೇವಲ ಪ್ರಯಾಣಕ್ಕಾಗಿ ಇರುವ ದೋಣಿಯಾಗಿರಲಿಲ್ಲ. ಸಿಮೋನಿ ಅದನ್ನು ತನ್ನ ಕಚೇರಿಯಾಗಿಯೂ ಬಳಸುತ್ತಿದ್ದರು. ಅವರು ಹಡಗಿನಲ್ಲಿ ವಾಸಿಸುತ್ತಿದ್ದರು, ಕೆಲಸ ಮಾಡುತ್ತಿದ್ದರು ಮತ್ತು ಪ್ರಪಂಚದಾದ್ಯಂತ ಪ್ರಯಾಣಿಸುತ್ತಿದ್ದರು. ಈ ಸೂಪರ್‌ಯಾಚ್ ಐಷಾರಾಮಿ ಕೊಠಡಿಗಳು, ಕಲಾ ಗ್ಯಾಲರಿಯಂತಹ ಒಳಾಂಗಣಗಳು, ಹೆಲಿಪ್ಯಾಡ್ ಮತ್ತು ಇತ್ತೀಚಿನ ತಂತ್ರಜ್ಞಾನ ಸೇರಿದಂತೆ ಎಲ್ಲಾ ಆಧುನಿಕ ಸೌಲಭ್ಯಗಳನ್ನು ಹೊಂದಿತ್ತು. ಸಿಮೋನಿ ಆಗಾಗ ತನ್ನ ದೋಣಿಯನ್ನು ಪ್ರಮುಖ ಯುರೋಪಿಯನ್ ನಗರಗಳಲ್ಲಿ, ಸಾಮಾನ್ಯ ಜನರು ಆಸ್ತಿಯನ್ನು ಪಡೆಯಲು ಅಸಾಧ್ಯವಾದ ಸ್ಥಳಗಳಲ್ಲಿ ಡಾಕ್ ಮಾಡುತ್ತಿದ್ದರು. ನಾರ್ವೆ, ಡೆನ್ಮಾರ್ಕ್ ಮತ್ತು ಸ್ವೀಡನ್‌ನಂತಹ ದೇಶಗಳ ರಾಜಧಾನಿಗಳಲ್ಲಿ, ಅವರ ದೋಣಿ ರಾಜಮನೆತನದ ಅರಮನೆಗಳ ಬಳಿಯೂ ಗೋಚರಿಸುತ್ತಿತ್ತು. ಈ ಯಾಚ್‌ ವಿಶ್ವದ ಅತ್ಯಂತ ಐಷಾರಾಮಿ ಸ್ಥಳ, ಅತ್ಯುತ್ತಮ ಸ್ನಾನಗೃಹಗಳು, ರೆಸ್ಟೋರೆಂಟ್‌ಗಳನ್ನು ಒಳಗೊಂಡಿದೆ.

7 ಸಾವಿರ ಚದರಡಿಯ ಐಷಾರಾಮಿ ಮನೆ! ನಿಖಿಲ್ ಕಾಮತ್ ಬೆಂಗಳೂರಿನ ಕನಸಿನ ಮನೆಯೊಳಗೆ ಒಂದು ಸುತ್ತು

ಅದು ದೋಣಿಯಂತೆ ಅಲ್ಲ, ಯುದ್ಧನೌಕೆ:

ಚಾರ್ಲ್ಸ್ ಸಿಮೋನಿಯವರ ಸೂಪರ್‌ಯಾಚ್ಟ್‌ನ ವಿನ್ಯಾಸವು ಇದನ್ನು ಇತರ ಐಷಾರಾಮಿ ವಿಹಾರ ನೌಕೆಗಳಿಗಿಂತ ಭಿನ್ನವಾಗಿಸಿದೆ. ಹೆಚ್ಚಿನ ಸೂಪರ್‌ಯಾಚ್ಟ್‌ಗಳು ದುಂಡಾದ ಆಕಾರದಲ್ಲಿದ್ದರೆ, ಸಿಮೋನಿ ಇದಕ್ಕಿಂತ ಭಿನ್ನವಾದ ವಿನ್ಯಾಸವನ್ನು ಆಯ್ಕೆ ಮಾಡಿಕೊಂಡರು. ಪ್ರಸಿದ್ಧ ವಿನ್ಯಾಸಕ ಎಸ್ಪೆನ್ ಒಯಿನೊ ಅವರನ್ನು ಅದರ ವಿನ್ಯಾಸಕ್ಕಾಗಿ ಆಯ್ಕೆ ಮಾಡಲಾಯಿತು. ಇದರ ಹೊರಭಾಗವು ಮಿಲಿಟರಿ ಹಡಗನ್ನು ಹೋಲುತ್ತದೆ. ಇದು ಬೂದು ಬಣ್ಣದ್ದಾಗಿದ್ದು ತೀಕ್ಷ್ಣವಾದ ಅಂಚುಗಳನ್ನು ಹೊಂದಿತ್ತು. ಇದರ ನೋಟವು ಎಷ್ಟು ವಿಶಿಷ್ಟವಾಗಿತ್ತು ಎಂದರೆ ನಿಜವಾದ ಯುದ್ಧನೌಕೆ ಕೂಡ ಒಮ್ಮೆ ಮಿಲಿಟರಿ ಹಡಗೆಂದು ತಪ್ಪಾಗಿ ಭಾವಿಸಿತ್ತು. ಹೊರಗಿನಿಂದ ಅದು ಕಠಿಣವಾಗಿ ಕಂಡರೂ, ಒಳಭಾಗವು ಐಷಾರಾಮಿ ಹೋಟೆಲ್‌ಗಿಂತ ಕಡಿಮೆಯಿಲ್ಲ. ಇದು ವಿಶ್ವಪ್ರಸಿದ್ಧ ಕಲಾವಿದರ ಕಲಾಕೃತಿಗಳು ಮತ್ತು ಐಷಾರಾಮಿ ಪೀಠೋಪಕರಣಗಳನ್ನು ಒಳಗೊಂಡಿತ್ತು.

ಶಾಂತಿಗಾಗಿ ತಂತ್ರಜ್ಞಾನದ ಬಳಕೆ:

ಚಾರ್ಲ್ಸ್ ಸಿಮೋನಿ ತನ್ನ ದೋಣಿಯಲ್ಲಿ ಸಂಪೂರ್ಣ ಶಾಂತಿಯನ್ನು ಬಯಸಿದ್ದರು. ಇದನ್ನು ಸಾಧಿಸಲು, ವಿಶೇಷ ಶಬ್ದ ನಿಯಂತ್ರಣ ವ್ಯವಸ್ಥೆಯನ್ನು ಸ್ಥಾಪಿಸಲಾಯಿತು. ದೋಣಿಯ ಎಂಜಿನ್‌ಗಳು, ಜನರೇಟರ್‌ಗಳು ಮತ್ತು ಇತರ ಭಾರೀ ಯಂತ್ರೋಪಕರಣಗಳನ್ನು ಅವುಗಳ ಶಬ್ದ ಮತ್ತು ಕಂಪನಗಳು ಒಳಗೆ ಹರಡದ ರೀತಿಯಲ್ಲಿ ಇರಿಸಲಾಗಿತ್ತು. ಅದು ಚಲಿಸುತ್ತಿರುವಾಗಲೂ ಒಳಗಿನ ವಾತಾವರಣವು ತುಂಬಾ ಶಾಂತವಾಗಿದ್ದು ಲೈಬ್ರೆರಿಯಂತೆ ಭಾಸವಾಗುತ್ತಿತ್ತು.

₹1.5 ಕೋಟಿ ಬೆಂಗಳೂರಿನ ಫ್ಲ್ಯಾಟ್ ಯಾಕೆ? ಟೆಕ್ಕಿಯ ಪ್ರಶ್ನೆಗೆ ಮ್ಯಾನೇಜರ್ ಕೊಟ್ಟ ಉತ್ತರ ವೈರಲ್

ತಂತ್ರಜ್ಞಾನದಿಂದ ಬಾಹ್ಯಾಕಾಶಕ್ಕೆ ಪ್ರಯಾಣ:

ಚಾರ್ಲ್ಸ್ ಸಿಮೋನಿಯವರ ಮನಸ್ಥಿತಿ ಯಾವಾಗಲೂ ನಾವೀನ್ಯತೆಯಿಂದ ಕೂಡಿತ್ತು. ಮೈಕ್ರೋಸಾಫ್ಟ್‌ನಲ್ಲಿ ಕೆಲಸ ಮಾಡುವಾಗ, ಅವರು ಕಂಪ್ಯೂಟರ್ ಜಗತ್ತನ್ನು ಪರಿವರ್ತಿಸುವ ಸಾಫ್ಟ್‌ವೇರ್ ಅಭಿವೃದ್ಧಿಗೆ ಕೊಡುಗೆ ನೀಡಿದರು. ಆದರೆ, ಅವರ ಉತ್ಸಾಹ ತಂತ್ರಜ್ಞಾನವನ್ನು ಮೀರಿದ್ದಾಗಿತ್ತು. ಬಾಹ್ಯಾಕಾಶಕ್ಕೆ ಪ್ರಯಾಣಿಸಿದ ಕೆಲವೇ ಜನರಲ್ಲಿ ಅವರು ಒಬ್ಬರಾಗಿದ್ದರು. ಅವರು 2007 ಮತ್ತು 2009 ರಲ್ಲಿ ಅಂತರರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣಕ್ಕೆ ಪ್ರಯಾಣ ಬೆಳೆಸಿದ್ದರು. ಎರಡು ಬಾರಿ ಬಾಹ್ಯಾಕಾಶಕ್ಕೆ ಪ್ರಯಾಣಿಸಿದ ಮೊದಲ ವ್ಯಕ್ತಿ ಎನ್ನುವ ಹೆಗ್ಗಳಿಕೆ ಇವರದ್ದು.

2021 ರಲ್ಲಿ ವಿಹಾರ ನೌಕೆ ಮಾರಾಟ ಮಾಡಿ ಸೂಪರ್‌ಯಾಚ್ಟ್ ಖರೀದಿ:

"ಸ್ಕಾಟ್" ನಲ್ಲಿ ಸುಮಾರು ಎರಡು ದಶಕಗಳ ಕಾಲ ಕಳೆದ ನಂತರ, ಸಿಮೋನಿ 2021ರಲ್ಲಿ ಅದನ್ನು ಮಾರಾಟ ಮಾಡಿದರು. ಆದರೆ ಸಮುದ್ರದೊಂದಿಗಿನ ಅವರ ಸಂಪರ್ಕ ಇಲ್ಲಿಗೆ ಕಡಿದು ಹೋಗಲಿಲ್ಲ. ಅವರು "ನಾರ್ನ್" ಎಂಬ ಇನ್ನೂ ದೊಡ್ಡ ಸೂಪರ್‌ಯಾಚ್ ಅನ್ನು ಖರೀದಿಸಿದರು. ಇದು ಸರಿಸುಮಾರು 295 ಅಡಿ ಉದ್ದವಿದ್ದು, ಸುಮಾರು 250 ಮಿಲಿಯನ್ ಡಾಲರ್‌ ಮೌಲ್ಯದ್ದಾಗಿದೆ ಎಂದು ವರದಿಯಾಗಿದೆ. ಶ್ರೀಮಂತ ವ್ಯಕ್ತಿಗಳು ಹಣವನ್ನು ಖರ್ಚು ಮಾಡುವುದಿಲ್ಲ, ಆದರೆ ಅವರ ಅಗತ್ಯತೆಗಳು ಮತ್ತು ಆಕಾಂಕ್ಷೆಗಳಿಗೆ ಸರಿಹೊಂದುವಂತೆ ಹೊಸ ವಸ್ತುಗಳನ್ನು ಸೃಷ್ಟಿಸುತ್ತಾರೆ ಎನ್ನುವುದನ್ನು ಚಾರ್ಲ್ಸ್ ಸಿಮೋನಿಯವರ ಕಥೆ ತೋರಿಸುತ್ತದೆ. ಹೆಚ್ಚಿನ ಜನರು ಭೂಮಿಯಲ್ಲಿ ದುಬಾರಿ ಮನೆಗಳ ಕನಸು ಕಾಣುತ್ತಿರುವಾಗ, ಸಿಮೋನಿ ಸಮುದ್ರವನ್ನೇ ತಮ್ಮ ಮನೆಯನ್ನಾಗಿ ಮಾಡುವ ಮೂಲಕ ಹೊಸ ಮಾರ್ಗವನ್ನು ಕಂಡುಕೊಂಡಿದ್ದಾರೆ.

(ಬರಹ: ರಂಜಿತಾ ಆರ್.ಕೆ.)