ನಿಮ್ಮ ಪ್ರೀತಿ, ಬೆಚ್ಚಗಿನ ಅಪ್ಪುಗೆಗೆ ನಾನು ಸದಾ ಋಣಿ: ತ್ರಿಶಾ ಕೃಷ್ಣನ್ ಪೋಸ್ಟ್ ವೈರಲ್

ದಕ್ಷಿಣ ಭಾರತದ ಖ್ಯಾತ ಗಾಯಕಿ ಎಸ್.ಜಾನಕಿ ಅವರ ಅಗಲಿಕೆಯ ಆಘಾತದಿಂದ ಚಿತ್ರರಂಗ ಇನ್ನೂ ಹೊರಬಂದಿಲ್ಲ. ಈ ನಡುವೆ ನಟಿ ತ್ರಿಶಾ ಕೃಷ್ಣನ್ (Trisha Krishnan) ಅವರು ಜಾನಕಮ್ಮ ಅವರ ನಿಧನಕ್ಕೆ ಸಂತಾಪ ಸೂಚಿಸಿದ್ದು, ತಮ್ಮ ಇನ್‌ಸ್ಟಾಗ್ರಾಮ್ ಖಾತೆಯಲ್ಲಿ ಅತ್ಯಂತ ಭಾವುಕ ಸಾಲುಗಳನ್ನು ಬರೆದುಕೊಂಡಿದ್ದಾರೆ. ತಾವು ನಟಿಸಿದ ಸಿನಿಮಾವೊಂದರಲ್ಲಿ ಜಾನಕಿ ಅಮ್ಮನ ಹೆಸರಿನ ಪಾತ್ರವನ್ನು ಮಾಡಿದ್ದನ್ನು ನೆನೆದಿರುವ ತ್ರಿಶಾ, ಜಾನಕಿ ಅವರೊಂದಿಗೆ ಕ್ಲಿಕ್ಕಿಸಿಕೊಂಡ ಸ್ಪೆಷಲ್‌ ಫೋಟೋಗಳನ್ನು ಹಂಚಿಕೊಂಡಿದ್ದಾರೆ.

ನಿಮ್ಮ ಹೆಸರಲ್ಲಿ ನಟಿಸಿದ್ದು ದೊಡ್ಡ ಗೌರವ

ತಮ್ಮ ವೃತ್ತಿಜೀವನದ ಸಾರ್ವಕಾಲಿಕ ಶ್ರೇಷ್ಠ ಪ್ರೇಮಕಾವ್ಯ ಸಿನಿಮಾ '96' ಚಿತ್ರದಲ್ಲಿ ಜಾನಕಮ್ಮನವರ ಹೆಸರಿನ ಪಾತ್ರವನ್ನೇ ಮಾಡಿದ್ದ ತ್ರಿಶಾ, ಹಳೆಯ ಸುಂದರ ನೆನಪುಗಳನ್ನು ನೆನೆದು ಭಾವುಕರಾಗಿದ್ದಾರೆ. ನಟಿ ತ್ರಿಶಾ ಶೂಟಿಂಗ್ ಸೆಟ್‌ನಲ್ಲಿ ಜಾನಕಮ್ಮನವರನ್ನು ಭೇಟಿಯಾಗಿದ್ದ ಫೋಟೋಗಳನ್ನು ಹಂಚಿಕೊಂಡು, "ನನ್ನ ಸಿನಿಮಾ ಕೆರಿಯರ್‌ನಲ್ಲಿ ವಿಶೇಷವಾದ ಚಲನಚಿತ್ರಗಳಲ್ಲಿ ಒಂದಾದ '96' ನಲ್ಲಿ ನಿಮ್ಮ ಹೆಸರನ್ನು ಹೊತ್ತು (ಜಾನಕಿ ಪಾತ್ರ) ನಟಿಸಿದ್ದು ನನ್ನ ಬದುಕಿನ ಅತ್ಯಂತ ಶ್ರೇಷ್ಠ ಗೌರವಗಳಲ್ಲಿ ಒಂದಾಗಿ ಸದಾ ಕಾಲ ಉಳಿಯುತ್ತದೆ. ಆದರೆ, ಅದಕ್ಕಿಂತ ಹೆಚ್ಚಾಗಿ ನಿಮ್ಮನ್ನು ವೈಯಕ್ತಿಕವಾಗಿ ಹತ್ತಿರದಿಂದ ತಿಳಿದುಕೊಂಡಿದ್ದು ಮತ್ತು ನಿಮ್ಮಿಂದ ಅಪಾರವಾದ ಪ್ರೀತಿ, ಆಶೀರ್ವಾದ ಪಡೆದಿದ್ದು ನನ್ನ ಜೀವನದ ಸೌಭಾಗ್ಯ. ಆ ಕ್ಷಣಗಳನ್ನು ನಾನು ಸದಾ ಕಾಲ ನನ್ನ ಹೃದಯದಲ್ಲಿ ಆರಾಧಿಸುತ್ತೇನೆ" ಎಂದು ಬರೆದಿದ್ದಾರೆ.