ಅಂತೂ ಉದ್ಯೋಗಿಗಳ ಸಂಬಳ ಏರಿಸಿದ ಇನ್ಫೋಸಿಸ್

ಬೆಂಗಳೂರು, ಅ. 12 : ಬೆಂಗಳೂರು ಮೂಲದ ಭಾರತದ ಎರಡನೇ ಅತಿದೊಡ್ಡ ಸಾಫ್ಟ್‌ವೇರ್ ಸರ್ವೀಸ್ ನೀಡುವ ಸಂಸ್ಥೆ ಇನ್ಫೋಸಿಸ್ ತನ್ನ ಉದ್ಯೋಗಿಗಳಿಗೆ ಸಂತಸದ ಸುದ್ದಿಯನ್ನೊಂದು ನೀಡಿದೆ. ಎರಡನೇ ತ್ರೈಮಾಸಿಕ ಫಲಿತಾಂಶ ಹೊರಬರುತ್ತಿದ್ದಂತೆ ತನ್ನ ಉದ್ಯೋಗಿಗಳ ಸಂಬಳವನ್ನು ಹೆಚ್ಚು ಮಾಡುವುದಾಗಿ ಶುಕ್ರವಾರ ಹೇಳಿದೆ.

ಈ ಸುದ್ದಿಯನ್ನು ಇನ್ಫೋಸಿಸ್ ಸಿಇಓ ಎಸ್.ಡಿ. ಶಿಬುಲಾಲ್ ಅವರು ಎರಡನೇ ತ್ರೈಮಾಸಿಕ ವರದಿ ಪ್ರಕಟಿಸಿದ ಸಂದರ್ಭದಲ್ಲಿ ಪ್ರಕಟಿಸಿದ್ದಾರೆ. ಸಂಬಳ ಏರಿಕೆಯ ಪ್ರಮಾಣವನ್ನು ಅಧಿಕೃತವಾಗಿ ಘೋಷಿಸಲಿಲ್ಲದಿದ್ದರೂ, ಶೇ.6ರಿಂದ 8ರಷ್ಟು ಏರಿಸಬಹುದೆಂದು ಹೇಳಲಾಗಿದೆ.

ಇದು ಇನ್ಫೋಸಿಸ್ ಸಿಬ್ಬಂದಿಗಳಲ್ಲಿ ಸಂತಸದ ಹೊನಲು ಹರಿಸಿದ್ದರಲ್ಲಿ ಅನುಮಾನವಿಲ್ಲ. ಏಕೆಂದರೆ, ಮೊದಲ ತ್ರೈಮಾಸಿಕ ಫಲಿತಾಂಶ ಬಂದಾಗ ಅಷ್ಟೇನು ಲಾಭ ಗಳಿಸಿದಿದ್ದ ಇನ್ಫೋಸಿಸ್, ಕೇವಲ 20 ಸಾವಿರ ಉದ್ಯೋಗಿಗಳಿಗೆ ಮಾತ್ರ ಸಂಬಳವನ್ನು ಹೆಚ್ಚಿಸಿತ್ತು ಮತ್ತು ಅನೇಕ ಸಿಬ್ಬಂದಿಗಳ ವೇರಿಯೇಬರ್ ಪೇ ಕಟ್ ಮಾಡಿ, ಉದ್ಯೋಗಿಗಳು ಕಿಡಿಕಾರುವಂತೆ ಮಾಡಿತ್ತು.

ಕಂಪನಿ ತೊರೆಯುತ್ತಿರುವವರ ಸಂಖ್ಯೆ ಕಡಿಮೆಯಾಗಿದ್ದು, ಇರುವವರ ಸಂಬಳ ಹೆಚ್ಚಿಸುವ ಮುಖಾಂತರ ಕಂಪನಿ ಸರಿಯಾದ ದಾರಿಯಲ್ಲಿ ನಡೆಯುತ್ತಿದೆ ಎಂಬ ಸಂದೇಶವನ್ನು ಸಾರಲು ಬಯಸುತ್ತೇವೆ ಎಂದು ಸಿಬ್ಬಂದಿ ನೇಮಕಾತಿ ಸಂಸ್ಥೆ ಟೀಮ್‌ಲೀಸ್‌ನ ಸಹಸಂಸ್ಥಾಪಕಿ ಸಂಗೀತಾ ಲಾಲ್ ಹೇಳಿದ್ದಾರೆ. ಎರಡನೇ ತ್ರೈಮಾಸಿಕದಲ್ಲಿ 2,610 ಉದ್ಯೋಗಿಗಳನ್ನು ಇನ್ಫೋಸಿಸ್ ತನ್ನ ಬಳಗಕ್ಕೆ ಸೇರಿಸಿಕೊಂಡಿದೆ.

ವ್ಯಾಪಾರ ವಹಿವಾಟು ಏರುಪೇರಾಗುತ್ತಿದ್ದಂತಹ ಸಂದರ್ಭದಲ್ಲಿ, ಅನೇಕ ಕಂಪನಿಗಳು ಉದ್ಯೋಗಿಗಳ ಸಂಬಳವನ್ನು ತುಸುಮಟ್ಟಿಗಾದರೂ ಏರಿಸಿದ್ದರೆ, ಇನ್ಫೋಸಿಸ್ ಪಗಾರವನ್ನು ಏರಿಸಿರಲಿಲ್ಲ. ಇದರಿಂದಾಗಿ ಉದ್ಯೋಗಿಗಳಲ್ಲಿ ಸಾಕಷ್ಟು ಅಸಮಾಧಾನ ವ್ಯಕ್ತವಾಗಿತ್ತು. ಆದರೆ, ಭಡ್ತಿ ನೀಡಿದವರಿಗೆ ಮಾತ್ರ ಸಂಬಳ ಏರಿಸಲಾಗಿತ್ತು. 2009ರಲ್ಲಿ ಕೂಡ ಸಂಬಳ ಏರಿಕೆಯನ್ನು ಮುಂದೂಡಿ, ವ್ಯಾಪಾರ ಮತ್ತಷ್ಟು ಕುದುರಿದಾಗ ಸಂಬಳ ಏರಿಕೆ ಮಾಡಿತ್ತು.

ಕಂಪನಿಯ ಮುಖ್ಯ ಹಣಕಾಸು ಅಧಿಕಾರಿ ವಿ ಬಾಲಕೃಷ್ಣನ್ ಅವರು ತಮ್ಮ ಸ್ಥಾನಕ್ಕೆ ರಾಜೀನಾಮೆ ನೀಡಿರುವುದನ್ನು ಕೂಡ ಶುಕ್ರವಾರ ಇನ್ಫೋಸಿಸ್ ಪ್ರಕಟಿಸಿದೆ. ಅವರು ರಾಜೀನಾಮೆ ನೀಡಿದ್ದರೂ ನಿರ್ದೇಶಕ ಮಂಡಳಿಯಲ್ಲಿ ಮುಂದುವರಿಯಲಿದ್ದಾರೆ. ಅವರ ಸ್ಥಾನವನ್ನು ಹಣಕಾಸು ವಿಭಾಗದ ಉಪಾಧ್ಯಕ್ಷ ರಾಜೀವ್ ಬನ್ಸಾಲ್ ಅವರು ತುಂಬಲಿದ್ದಾರೆ.

English summary

Bangalore based IT major, India's second largest software service provider Infosys has at last decided to increase the salary of employees. The welcome announcement has come after the announcement of second quarter results.