ಲಂಡನ್, ಜೂನ್ 17: ಭಾರತೀಯ ಕ್ರೀಡಾಭಿಮಾನಿಗಳಿಗೆ ಇದೊಂದು ರೋಮಾಂಚಕ ಕ್ಷಣ. ಲಂಡನ್ ನಲ್ಲಿ ನಡೆಯಲಿರುವ ಎರಡು ಮಹತ್ವದ ಪಂದ್ಯಗಳಲ್ಲಿ ಭಾರತ ಹಾಗೂ ಪಾಕಿಸ್ತಾನ ತಂಡಗಳು ಮುಖಾಮುಖಿಯಾಗಲಿವೆ.
ಅಪರೂವೆಂಬಂಥ ಕ್ಷಣವಿದು. ಲಂಡನ್ ನಲ್ಲಿ ನಡೆಯುತ್ತಿರುವ ಐಸಿಸಿ ಕ್ರಿಕೆಟ್ ಚಾಂಪಿಯನ್ ಶಿಪ್ ನ ಫೈನಲ್ ಪಂದ್ಯ ಇದೇ ಭಾನುವಾರ ಭಾರತ , ಪಾಕಿಸ್ತಾನ ನಡುವೆ ನಡೆಯಲಿದೆ.
ಕಾಕತಾಳೀಯವೆಂಬಂತೆ, ಲಂಡನ್ ನಲ್ಲಿ ನಡೆಯುತ್ತಿರುವ ವಿಶ್ವ ಹಾಕಿ ಲೀಗ್ ಪಂದ್ಯಾವಳಿಯ ನ ಸೆಮಿಫೈನಲ್ ಪಂದ್ಯದಲ್ಲಿ ಭಾನುವಾರ ಭಾರತ- ಪಾಕಿಸ್ತಾನ ಮುಖಾಮುಖಿಯಾಗಲಿವೆ.
ಕ್ರಿಕೆಟ್ ಪಂದ್ಯವು ಭಾರತೀಯ ಕಾಲಮಾನದ ಪ್ರಕಾರ, ಮಧ್ಯಾಹ್ನ 3 ಗಂಟೆಗೆ ಶುರುವಾದರೆ, ಹಾಕಿ ಪಂದ್ಯ ಸಂಜೆ 6:30ಗೆ ಆರಂಭವಾಗಲಿದೆ.
ಅತ್ತ, ಕ್ರಿಕೆಟ್, ಇತ್ತ ಹಾಕಿ... ಇಷ್ಟೇ ವ್ಯತ್ಯಾಸ. ಎರಡೂ ಪ್ರಾಕಾರದ ಕ್ರೀಡೆಗಳಲ್ಲಿ ಮುಖಾಮುಖಿಯಾಗುತ್ತಿರುವುದು ಸಾಂಪ್ರದಾಯಿಕ ಎದುರಾಳಿಗಳು. ಹಾಗಾಗಿ, ಭಾರತೀಯ ಕ್ರೀಡಾಭಿಮಾನಿಗಳ ಪಾಲಿಗೆ ಎರಡು 'ಹೈ ವೋಲ್ಟೇಜ್' ಪಂದ್ಯಗಳನ್ನು ನೋಡುವ ಅವಕಾಶ.
ಈ ಎರಡೂ ಪಂದ್ಯಗಳಲ್ಲಿ ಭಾರತವೇ ಗೆದ್ದರೆ ಮುಗೀತು, ಭಾರತೀಯರ ಸಂಭ್ರಮವಂತೂ ಮುಗಿಲು ದಾಟಿ ಅಂತರಿಕ್ಷ ಮುಟ್ಟುತ್ತದೆ. ಆದರೆ, ಎರಡೂ ಪಂದ್ಯಗಳನ್ನು ಸೋತರೆ ಪಾಕಿಸ್ತಾನದಲ್ಲಿ ಗುಜರಿ ಅಂಗಡಿಗಳಿಗೆ ಬರುವ ಟಿವಿಗಳ ಸಂಖ್ಯೆ ದುಪ್ಪಟ್ಟಾಗಬಹುದು!