ಆಕ್ಲೆಂಡ್, ಡಿ. 08: ಶ್ರೀಲಂಕಾದ ಪ್ರತಿಭಾವಂತ ವಿಕೆಟ್ ಕೀಪರ್ ಬ್ಯಾಟ್ಸ್ ಮನ್ ಕುಶಾಲ್ ಪೆರೆರಾ ಅವರ ಮೇಲೆ ಮಾದಕ ದ್ರವ್ಯ ಸೇವಿಸಿದ ಆರೋಪ ಹೊರೆಸಲಾಗಿದೆ. ಡೋಪ್ ಟೆಸ್ಟ್ ನಲ್ಲಿ ಫೇಲ್ ಆಗಿರುವ ಪೆರೆರಾ ಈಗ ನ್ಯೂಜಿಲೆಂಡ್ ಟೆಸ್ಟ್ ಸರಣಿ ಆರಂಭಕ್ಕೂ ಮುನ್ನವೇ ತವರಿಗೆ ಮರಳಬೇಕಾಗಿದೆ.
ನ್ಯೂಜಿಲೆಂಡಿನಲ್ಲಿ ಡಿಸೆಂಬರ್ 10ರಿಂದ ಆರಂಭವಾಗಲಿರುವ ಎರಡು ಟೆಸ್ಟ್ ಪಂದ್ಯಗಳ ಸರಣಿಯ ಮೊದಲ ಪಂದ್ಯ ಹಾಗೂ ನಂತರ ಏಕದಿನ ಸರಣಿಗೆ ಸಿದ್ಧತೆ ನಡೆಸಿದ್ದ ಶ್ರೀಲಂಕಾದ ಕ್ರಿಕೆಟರ್ ಕುಶಾಲ್ ಪೆರೆರಾಗೆ ಆಘಾತವಾಗಿದೆ.
ಡುನೇಡಿನ್ ನಲ್ಲಿರುವ ಕುಶಾಲ್ ಅವರು ಮಾದಕ ವಸ್ತು ಸೇವಿಸಿರುವುದು ಪತ್ತೆಯಾಗಿರುವುದರಿಂದ ಅವರನ್ನು ನ್ಯೂಜಿಲೆಂಡ್ ಪ್ರವಾಸದ ನಡುವೆಯೇ ವಾಪಸ್ ಕರೆಸಿಕೊಳ್ಳಲಾಗುತ್ತಿದೆ ಎಂದು ಶ್ರೀಲಂಕಾ ಕ್ರಿಕೆಟ್ ಮಂಡಳಿ ಹೇಳಿದೆ.|
ಈ ಹಿಂದೆ ಶ್ರೀಲಂಕಾದ ಅಂತಾರಾಷ್ಟ್ರೀಯ ಕ್ರಿಕೆಟರ್ ಉಪುಲ್ ತರಂಗಾ ಅವರು ಇದೇ ರೀತಿ ಸಿಕ್ಕಿಬಿದ್ದು, ಮೂರು ತಿಂಗಳ ನಿಷೇಧಕ್ಕೆ ಒಳಗಾಗಿದ್ದರು. 25 ವರ್ಷ ವಯಸ್ಸಿನ ಕುಶಾಲ್ ಅವರು ಶ್ರೀಲಂಕಾ ಪರ 3 ಟೆಸ್ಟ್, 51 ಏಕದಿನ ಕ್ರಿಕೆಟ್, 22 ಟಿ20 ಪಂದ್ಯಗಳನ್ನಾಡಿದ್ದಾರೆ. (ಒನ್ ಇಂಡಿಯಾ ಸುದ್ದಿ)