ಮುಂಬೈ, ಏಪ್ರಿಲ್ 14: ಏಪ್ರಿಲ್ ಹಾಗೂ ಮೇ ತಿಂಗಳ ಬಂತೆಂದರೆ ಸಾಕು ಭಾರತದೆಲ್ಲೆಡೆ ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) ಹಬ್ಬ ಆರಂಭವಾಗುತ್ತದೆ. ಹಣದ ಹೊಳೆ ಹರಿಸುವ ಕ್ರಿಕೆಟ್ ಲೀಗ್ ಇದಾದರೂ, ಹತ್ತು ಹಲವು ಪ್ರತಿಭೆಗಳಿಗೆ, ದಿಗ್ಗಜ ಕ್ರಿಕೆಟರ್ ಗಳಿಗೆ ಸೂಕ್ತ ವೇದಿಕೆ, ವಿದಾಯದ ರಹದಾರಿ ತೋರಿಸಿದ ಲೀಗ್ ಗೆ ಈಗ 10ರ ಸಂಭ್ರಮ.
2013ರಲ್ಲಿ ಮುಂಬೈ ಇಂಡಿಯನ್ಸ್ ಪಾಲಿಗೂ ಇಂಥದ್ದೊಂದು ಅವಿಸ್ಮರಣೀಯ ಸನ್ನಿವೇಶ ಒದಗಿತ್ತು. ಕ್ರಿಕೆಟ್ ದೇವರು ಸಚಿನ್ ಅವರ ಜರ್ಸಿ ನಂಬರ್ 10ಕ್ಕೆ ವಿದಾಯ ಹೇಳಿದ ಕ್ಷಣ ಮರೆಯುವಂತಿಲ್ಲ.[ನಿವೃತ್ತಿ ನಂತರ ಸಚಿನ್ ಸುದ್ದಿಗೋಷ್ಠಿ ಮುಖ್ಯಾಂಶ]
2008ರಿಂದ ಕ್ರಿಕೆಟ್ ಪ್ರೇಮಿಗಳನ್ನು ರಂಜಿಸುತ್ತಾ ಬಂದಿರುವ ಐಪಿಎಲ್ ನಲ್ಲಿ 2013- ಸಚಿನ್ ತೆಂಡೂಲ್ಕರ್ ಅವರ ಪಾಲಿಗೆ ಮರೆಯಲಾರದ ವರ್ಷ.
ಸಚಿನ್ ಅವರ ವೃತ್ತಿ ಬದುಕು ಅಂತ್ಯವಾದ ಬಳಿಕ ಅವರು ಬಳಸುತ್ತಿದ್ದ ಜರ್ಸಿ 10 ಬೇರೊಬ್ಬರಿಗೆ ನೀಡಲು ಮನಸು ಮಾಡದ ಮುಂಬೈ ಇಂಡಿಯನ್ಸ್ ಫ್ರಾಂಚೈಸಿ ಓನರ್ ನೀತಾ ಅಂಬಾನಿ ಅವರು, 10ನೇ ನಂಬರ್ ಜರ್ಸಿಯನ್ನು ರಿಟೈರ್ ಮಾಡಲು ನಿರ್ಧರಿಸುವುದಾಗಿ ಹೇಳಿದರು.
ಜರ್ಸಿ ವಿದಾಯಕ್ಕೆ ಅಭಿಯಾನ: ಹಾಗೆ ನೋಡಿದರೆ 2012ರಲ್ಲೇ ಈ ಅಭಿಯಾನ ಆರಂಭವಾಯಿತು. ತೆಂಡೂಲ್ಕರ್ ಅವರು ಏಕದಿನ ಕ್ರಿಕೆಟ್ ಬದುಕಿಗೆ ಗುಡ್ ಬೈ ಹೇಳಿದ ಬಳಿಕ#RetireTheJerseyNo10 ಎಂಬ ಹ್ಯಾಶ್ ಟ್ಯಾಗ್ ನೊಂದಿಗೆ ಮುಂಬೈನ ಫ್ಯಾನ್ ಕ್ಲಬ್ ಗಳು ಅಭಿಯಾನ ಆರಂಭಿಸಿದವು. ಇದಕ್ಕೆ ಮುಂಬೈ ಇಂಡಿಯನ್ಸ್ ಫ್ರಾಂಚೈಸಿ ಕೂಡಾ ಸಮ್ಮತಿಸಿತು. ಆದರೆ, ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ(ಬಿಸಿಸಿಐ) ಈ ಬಗ್ಗೆ ಯಾವುದೇ ಅಧಿಕೃತ ಹೇಳಿಕೆ ನೀಡಿಲ್ಲ.
2013ರಲ್ಲಿ ಐಪಿಎಲ್ ಹಾಗೂ ಚಾಂಪಿಯನ್ಸ್ ಲೀಗ್ ಟಿ20 ಪ್ರಶಸ್ತಿ ಗೆದ್ದರು. ಮುಂಬೈ ಇಂಡಿಯನ್ಸ್ ಪರ ಸಿಎಲ್ ಟಿ20ಯಲ್ಲಿ ರಾಜಸ್ಥಾನ್ ರಾಯಲ್ಸ್ ವಿರುದ್ಧ ಫಿರೋಶ್ ಶಾ ಕೋಟ್ಲಾದಲ್ಲಿ ತಮ್ಮ ಕೊನೆ ಪಂದ್ಯವಾಡಿದರು. ಆ ಪಂದ್ಯದಲ್ಲಿ 15ರನ್ ಗಳಿಸಿದ ಸಚಿನ್ ಅವರು ಈಗಲೂ ಮುಂಬೈ ಇಂಡಿಯನ್ಸ್ ತಂಡದ ಜತೆ ನಿಕಟ ಸಂಬಂಧ ಹೊಂದಿದ್ದಾರೆ. ಐಕಾನ್ ಆಟಗಾರನಾಗಿ ಕಾಣಿಸಿಕೊಂಡಿದ್ದಾರೆ.