ಮುಂಬೈ, ಜೂ.26: ಟೀಂ ಇಂಡಿಯಾದ ಜಿಂಬಾಬ್ವೆ ಪ್ರವಾಸ ನಡೆಯುವುದೇ ಅನುಮಾನ ಎಂಬ ಸುದ್ದಿ ಈಗ ಸತ್ತಿದೆ. ಹೊಸ ಸುದ್ದಿ ಪ್ರಕಾರ, ಈ ಟೂರ್ನಿಗೆ ಧೋನಿ ಹಾಗೂ ಕೊಹ್ಲಿ ಹೋಗುತ್ತಾರಾ? ಎಂಬ ಪ್ರಶ್ನೆ ಕಾಡುತ್ತಿದೆ. ಎಲ್ಲಕ್ಕೂ ಉತ್ತರ ಜೂ.29ರಂದು ಸಿಗಲಿದೆ.
ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ (ಬಿಸಿಸಿಐ) ಆಯ್ಕೆ ಸಮಿತಿ ಸದಸ್ಯರು, ಜೂ.29ರಂದು ದೆಹಲಿಯಲ್ಲಿ ಸಭೆ ಸೇರಿ ಜಿಂಬಾಬ್ವೆ ಪ್ರವಾಸಕ್ಕೆ ಟೀಂ ಇಂಡಿಯಾ ಸದಸ್ಯರನ್ನು ಅಯ್ಕೆ ಮಾಡಲಿದ್ದಾರೆ. [2015-16: ಟೀಂ ಇಂಡಿಯಾಕ್ಕೆ ಬಿಗಿ ವೇಳಾಪಟ್ಟಿ ]
ಐಸಿಸಿ ವಿಶ್ವಕಪ್ 2015, ಐಪಿಎಲ್, ಬಾಂಗ್ಲಾ ದೇಶ ಪ್ರವಾಸ ನಂತರ ಟೀಂ ಇಂಡಿಯಾದ ಪ್ರಮುಖ ಆಟಗಾರರು ಜಿಂಬಾಬ್ವೆ ಪ್ರವಾಸದಿಂದ ಹೊರಗುಳಿಯುವ ಸುದ್ದಿ ಕೂಡಾ ಬಂದಿದೆ. ಧೋನಿ, ಕೊಹ್ಲಿ ವಿಶ್ರಾಂತಿ ಬಯಸುವ ಸಾಧ್ಯತೆಯಿದೆ ಎನ್ನಲಾಗಿದೆ. ಆದರೆ, ಈ ಸಮಯಕ್ಕೆ ಯಾವುದೂ ಸ್ಪಷ್ಟವಾಗಿಲ್ಲ.
ಆಟಗಾರರ ಲಭ್ಯತೆ, ದೈಹಿಕ ಸಾಮರ್ಥ್ಯ ಪರೀಕ್ಷೆ ವರದಿ ಮೇರೆಗೆ ಆಯ್ಕೆ ಸಮಿತಿ ಮುಂದೆ ಆಟಗಾರರ ಪಟ್ಟಿಯನ್ನು ಸಿದ್ಧಪಡಿಸಿ ಬಿಸಿಸಿಐ ಕಾರ್ಯದರ್ಶಿ ಅನುರಾಗ್ ಠಾಕೂರ್ ಇಡಲಿದ್ದಾರೆ. ಸದ್ಯಕ್ಕೆ ಅಂತಾರಾಷ್ಟ್ರೀಯ ಕ್ರಿಕೆಟ್ ಕೌನ್ಸಿಲ್ ಮೀಟಿಂಗ್ ನಲ್ಲಿ ಅನುರಾಗ್ ಠಾಕೂರ್ ನಿರತರಾಗಿದ್ದಾರೆ.
ಅಸಲಿಗೆ ಟೂರ್ನಿ ನಡೆಯುವುದೆ?: ಜೀ ನೆಟ್ವರ್ಕ್ ಹಾಗೂ ಟೆನ್ ಸ್ಫೋರ್ಟ್ ಗೆ ಜಿಂಬಾಬ್ವೆ ಪ್ರವಾಸದ ಪ್ರಸಾರ ಹಕ್ಕು ಮಾರಾಟ ಮಾಡಲು ಬಿಸಿಸಿಐ ಸಿದ್ಧವಿಲ್ಲ.
ಅದರೆ, ಜಿಂಬಾಬ್ವೆ ಆಡುವ ಎಲ್ಲಾ ಅಂತಾರಾಷ್ಟ್ರೀಯ ಪಂದ್ಯಗಳ ಪ್ರಸಾರ ಹಕ್ಕು ಟೆನ್ ಸ್ಫೋರ್ಟ್ ಕೈಲಿದೆ. ಈ ಜಟಾಜಟಿ ಲಾಭಾಂಶಕ್ಕೆ ಪ್ರವಾಸವನ್ನೇ ಬಲಿ ಹಾಕಿದರೂ ಅಚ್ಚರಿ ಪಡಬೇಕಾಗಿಲ್ಲ. ಅಥವಾ ಒಳ್ಳೆ ಲಾಭಕ್ಕೆ ಡೀಲ್ ಕುದುರಿದರೆ ಮುಂದಿನ ವರ್ಷಕ್ಕೆ ಪ್ರವಾಸವನ್ನು ಬಿಸಿಸಿಐ ಮುಂದೂಡಲಿದೆ.
ಲಭ್ಯವಿರುವ ಮಾಹಿತಿ ಪ್ರಕಾರ ಜಿಂಬಾಬ್ವೆ vs ಭಾರತ ಪ್ರವಾಸದ ವೇಳಾಪಟ್ಟಿ
* ಜುಲೈ 10: ಮೊದಲ ಏಕದಿನ ಪಂದ್ಯ, ಹರಾರೆ (12.30 IST)
* ಜುಲೈ 12: ಎರಡನೇ ಏಕದಿನ ಪಂದ್ಯ, ಹರಾರೆ (12.30 IST)
* ಜುಲೈ 14: ಮೂರನೇ ಏಕದಿನ ಪಂದ್ಯ, ಹರಾರೆ (12.30 IST)
* ಜುಲೈ 17: ಮೊದಲ ಟ್ವೆಂಟಿ 20 ಪಂದ್ಯ, ಹರಾರೆ (16.30 IST)
* ಜುಲೈ 19: ಎರಡನೇ ಟ್ವೆಂಟಿ 20 ಪಂದ್ಯ, ಹರಾರೆ (16.30 IST)
(ಪಿಟಿಐ)