ಎರಡು ವಿಶ್ವದಾಖಲೆಯ ಹೊಸ್ತಿಲಲ್ಲಿ ಮಹೇಂದ್ರ ಸಿಂಗ್ ಧೋನಿ

ದನುಷ್ಕಾ ವಿಕೆಟ್ ಉರುಳಿಸಿದ್ದರಿಂದ ಸಾಧನೆ

ಶ್ರೀಲಂಕಾ ವಿರುದ್ಧದ ಏಕದಿನ ಸರಣಿಗೂ ಮುನ್ನ ಧೋನಿ ಅವರು, 97 ಸ್ಟಂಪಿಂಗ್ ಗಳನ್ನು ಹೊಂದಿದ್ದರು. ಆದರೆ, ಹಾಲಿ ಏಕದಿನ ಸರಣಿಯ 2ನೇ ಪಂದ್ಯದಲ್ಲಿ ದನುಷ್ಕಾ ಗುಣತಿಲಕ ಅವರನ್ನು ಸ್ಟಂಪಿಂಗ್ ಮಾಡುವ ಮೂಲಕ ಈವರೆಗೆ 98 ಸ್ಟಂಪಿಂಗ್ಸ್ ಗಳನ್ನು ಮಾಡುವ ಸಾಧನೆ ಮಾಡಿ, ಲಂಕಾದ ವಿಕೆಟ್ ಕೀಪರ್ ಕುಮಾರ ಸಂಗಕ್ಕಾರ ಅವರ ಸಾಧನೆಯನ್ನು ಸರಿಗಟ್ಟಿದ್ದರು.

ವಿಶ್ವ ದಾಖಲೆಗೆ ಇನ್ನೊಂದೇ ಸ್ಟಂಪಿಂಗ್ ಸಾಕು!

ಇದೀಗ, ಕುಮಾರ ಸಂಗಕ್ಕಾರ ಅವರ ಅತಿ ಹೆಚ್ಚು ಸ್ಟಂಪಿಂಗ್ ದಾಖಲೆ ಮುರಿಯಲು ಸಜ್ಜಾಗಿದ್ದಾರೆ ಧೋನಿ. ಹಾಲಿ ಏಕದಿನ ಸರಣಿಯಲ್ಲಿ ಇನ್ನೂ ಎರಡು ಪಂದ್ಯಗಳು ಬಾಕಿಯಿವೆ. ಈ ಎರಡು ಪಂದ್ಯಗಳಲ್ಲಿ ಒಂದು ಸ್ಟಂಪ್ ಮಾಡಿದರೂ ಸಾಕು ಧೋನಿ, ವಿಶ್ವದಲ್ಲಿ ಅತಿ ಹೆಚ್ಚು ಸ್ಟಂಪಿಂಗ್ ಮಾಡಿದ ದಾಖಲೆಗೆ ಪಾತ್ರರಾಗಲಿದ್ದಾರೆ.

ಈಗಾಗಲೇ 72 ಅಜೇಯ ಇನಿಂಗ್ಸ್ ಗಳು

ಇನ್ನು, ಏಕದಿನ ಮಾದರಿಯಲ್ಲಿ ಧೋನಿ ಈವರೆಗೆ 72 ಬಾರಿ ಅಜೇಯರಾಗುಳಿದ ಲೆಕ್ಕವಿದೆ. ಈ ಲೆಕ್ಕಕ್ಕೆ ಇನ್ನೊಂದು ಅಜೇಯ ಇನಿಂಗ್ಸ್ ಸೇರಿದರೆ ಸಾಕು ಅದು ಏಕದಿನ ಮಾದರಿಯಲ್ಲಿ ಅತಿ ಹೆಚ್ಚು ಅಜೇಯ ಇನಿಂಗ್ಸ್ ಗಳನ್ನು ಆಡಿರುವ ಬ್ಯಾಟ್ಸ್ ಮನ್ ಎಂಬ ಹೆಗ್ಗಳಿಕೆ ಧೋನಿಯವರನ್ನು ಅಲಂಕರಿಸಲಿದೆ.

ಸಾಧನೆಯ ಮೈಲಿಗಲ್ಲಿಗೆ ಇನ್ನೊಂದು ಪಂದ್ಯ ಸಾಕು

ಅಂದಹಾಗೆ, ಧೋನಿಯವರಿಗೆ ಇದು 300ನೇ ಏಕದಿನ ಪಂದ್ಯ. ಈವರೆಗೆ 299 ಏಕದಿನ ಪಂದ್ಯಗಳನ್ನಾಡಿರುವ ಅವರು, 9608 ರನ್ ಕಲೆಹಾಕಿದ್ದಾರೆ.