ಹೈದಾರಾಬಾದ್, ಫೆಬ್ರವರಿ 09: ಟೀಂ ಇಂಡಿಯಾದ ಪ್ರಮುಖ ಬ್ಯಾಟ್ಸ್ ಮನ್ ಚೇತೇಶ್ವರ್ ಪೂಜಾರಾ ಅವರು ಮತ್ತೊಂದು ದಾಖಲೆ ಬರೆದಿದ್ದಾರೆ. ಬಾಂಗ್ಲಾದೇಶ ವಿರುದ್ಧದ ಏಕೈಕ ಟೆಸ್ಟ್ ಪಂದ್ಯದ ಮೊದಲ ದಿನ(ಫೆಬ್ರವರಿ 09) ದಂದು 52 ವರ್ಷ ಹಳೆ ದಾಖಲೆಯನ್ನು ಪೂಜಾರಾ ಮುರಿದಿದ್ದಾರೆ.
ಪಂದ್ಯದ ವರದಿ | ಗ್ಯಾಲರಿ
ರಾಜೀವ್ ಗಾಂಧಿ ಸ್ಟೇಡಿಯಂನಲ್ಲಿ ಆರಂಭವಾದ ಟೆಸ್ಟ್ ಪಂದ್ಯದ ಮೊದಲ ದಿನದಂದು ಬ್ಯಾಟಿಂಗ್ ಆಯ್ದುಕೊಂಡ ಭಾರತಕ್ಕೆ ಆರಂಭಿಕ ಆಘಾತ ಕಾದಿತ್ತು. ಕೆಎಲ್ ರಾಹುಲ್ 2 ರನ್ ಗಳಿಸಿ ಔಟಾದರು. ನಂತರ ಮುರಳಿ ವಿಜಯ್ ಜೊತೆಗೂಡಿದ ಚೇತೇಶ್ವರ್ ಪೂಜಾರಾ ಅವರು 83ರನ್ ಗಳಿಸಿ ಔಟಾದರು.
ಭಾರತದ ಪ್ರಥಮ ದರ್ಜೆ ಸೀಸನ್ ನಲ್ಲಿ ಒಟ್ಟಾರೆ 1605 ರನ್ ಗಳಿಸಿರುವ ಪೂಜಾರಾ, ಅತಿ ಕಡಿಮೆ ಇನ್ನಿಂಗ್ಸ್ ನಲ್ಲಿ ಅಧಿಕ ರನ್ ಗಳಿಸಿದ ಆಟಗಾರ ಎನಿಸಿಕೊಂಡರು. 13 ಪಂದ್ಯಗಳಿಂದ 21 ಇನ್ನಿಂಗ್ಸ್ ನಲ್ಲಿ 1,605 ರನ್ ಗಳಿಸಿದ್ದಾರೆ. ಚಂದು ಬೊರ್ಡೆ ಅವರು 1964-65 ಸೀಸನ್ ನಲ್ಲಿ 21 ಪಂದ್ಯಗಳಿಂದ 28 ಇನ್ನಿಂಗ್ಸ್ ನಲ್ಲಿ 1,604 ರನ್ ಗಳಿಸಿ ಸಾಧನೆ ಮಾಡಿದ್ದಾರೆ.