ಅಡಿಲೇಡ್, ನವೆಂಬರ್ 22: ದಕ್ಷಿಣ ಆಫ್ರಿಕಾದ ಟೆಸ್ಟ್ ತಂಡದ ನಾಯಕ ಫಾಫ್ ಡು ಪ್ಲೆಸಿಸ್ ಅವರಿಗೆ 'ಚೆಂಡು ವಿರೂಪ' (ball tampering) ಆರೋಪ ಸಾಬೀತಾಗಿದೆ. ಹೋಬಾರ್ಟ್ ನಲ್ಲಿ ನಡೆದ ಎರಡನೇ ಟೆಸ್ಟ್ ಪಂದ್ಯದ ನಾಲ್ಕನೇ ದಿನದಾಟದ ವೇಳೆ ಐಸಿಸಿ ನಿಯಮ ಮೀರಿ ಚೆಂಡನ್ನು ತೀಡುತ್ತಿದ್ದ ದೃಶ್ಯಗಳ ಸಾಕ್ಷಿ ಆಧಾರಿಸಿ ಡುಪ್ಲೆಸಿಸ್ ಗೆ ದಂಡ ವಿಧಿಸಲಾಗಿದೆ.
ಐಸಿಸಿ ನಿಯಮ 2.2.9 ಹಾಗೂ 42.3 ಮೀರಿರುವುದು ಕಂಡು ಬಂದಿದೆ. ಹೀಗಾಗಿ ಕ್ರಮ ಜರುಗಿಸಬೇಕಿದೆ ಎಂದು ಐಸಿಸಿ ಮುಖ್ಯ ಕಾರ್ಯನಿರ್ವಾಹಕ ಡೇವಿಡ್ ರಿಚರ್ಡ್ ಸನ್ ಹೇಳಿದ್ದರು. ಅದರಂತೆ ಆಂಡಿ ಪೈಕ್ರಾಫ್ಟ್ ನೇತೃತ್ವದ ಎಲೈಟ್ ಅಂಪೈರ್ ಗಳ ಸಮಿತಿ ನಡೆಸಿದ ಪರಿಶೀಲನೆಯಲ್ಲಿ ಡು ಪ್ಲೆಸಿಸ್ ತಪ್ಪೆಸಗಿರುವುದು ಕಂಡು ಬಂದಿದೆ.
ಟಿವಿ ಫುಟೇಜ್ ಗಳ ಪ್ರಕಾರ ಡುಪ್ಲೇಸಿಸ್ ಅವರು ಎಂಜಲು ಹಾಕಿ ನಂತರ ಮಿಂಟ್ ಅಥವಾ ಸಿಹಿ ಪದಾರ್ಥವೊಂದನ್ನು ಚೆಂಡಿಗೆ ಹಾಕಿ ತಿಕ್ಕಿದ್ದಾರೆ. ಇದು ಐಸಿಸಿ ನಿಯಮಕ್ಕೆ ವಿರೋಧವಾಗಿದೆ.
ಡುಪ್ಲೆಸಿಸ್ ವಿರುದ್ಧ ಆರೋಪ ಸಾಬೀತಾಗಿರುವುದರಿಂದ ಪಂದ್ಯದ ಶೇ 100ರಷ್ಟು ಸಂಭಾವನೆ ಕಡಿತಗೊಂಡಿದೆ ಹಾಗೂ ಎರಡರಿಂದ ಮೂರು ಅಂಕಗಳ ಕಡಿತವಾಗಲಿದೆ (ಒನ್ ಇಂಡಿಯಾ ಸುದ್ದಿ)