ಆತ್ಮಹತ್ಯೆಗೆ ಯತ್ನಿಸಿದ್ದನಂತೆ ಈ ಖ್ಯಾತ ಕ್ರಿಕೆಟಿಗ!

ಸಿಡ್ನಿ, ನವೆಂಬರ್. 01: ಆಸ್ಟ್ರೇಲಿಯಾ ಕ್ರಿಕೆಟ್ ತಂಡದ ಮಾಜಿ ಆಟಗಾರ ಬ್ರಾಡ್ ಹಾಗ್ ಅವರು ಆತ್ಮಹತ್ಯೆಗೆ ಯತ್ನಿಸಿದ್ದರಂತೆ. ಹೀಗೆಂದು ಸ್ವತಃ ಹಾಗ್ ತಮ್ಮ 'ದ ರಾಂಗ್ ಅನ್' ಎನ್ನುವ ಆತ್ಮಚರಿತ್ರೆಯಲ್ಲಿ ಹೇಳಿದ್ದಾರೆ.

ಈ ಕುರಿತಾಗಿ ಮಾತನಾಡಿರುವ ಹಾಗ್ ಕ್ರಿಕೆಟ್ ಜಗತ್ತಿನಿಂದ ನಿವೃತ್ತಿ ಪಡೆದ ಬಳಿಕ ಹಾಗೂ ತನ್ನ ವೈವಾಹಿಕ ಸಂಬಂಧ ಮುರಿದು ಬಿದ್ದ ಸಂದರ್ಭದಲ್ಲಿ ನಾನು ಸಮುದ್ರ ದಂಡೆಯಲ್ಲಿ ಕಾರ್ ಪಾರ್ಕ್ ಮಾಡಿ ವಾಕಿಂಗ್ ಗೆ ತೆರಳಿದ್ದೆ.

ಆ ವೇಳೆ ನಾನು ಸಮುದ್ರಕ್ಕೆ ಹಾರಬೇಕು. ಬದುಕಿದರೆ ಉಳಿದುಕೊಳ್ಳುತ್ತೇನೆ, ಇಲ್ಲದಿದ್ದರೆ ಸಾಯುತ್ತೇನೆ. ಎಲ್ಲವನ್ನೂ ನನ್ನ ಅದೃಷ್ಟದ ಮೇಲೆ ಬಿಟ್ಟುಬಿಡುತ್ತೇನೆ ಎಂಬ ಯೋಚನೆ ಬಂದಿತ್ತು. ಇದೇ ರೀತಿ ನಾಲ್ಕು ಬಾರಿ ಯೋಚಿಸಿದ್ದೆ ಆದರೆ ನನಗೆ ಹಾರುವ ಧೈರ್ಯ ಬರಲಿಲ್ಲ ಎಂದಿದ್ದಾರೆ.

2007-08ರಲ್ಲಿ ಪತ್ನಿ ಆಂದ್ರಿಯಾ ಹಾಗೂ ನನ್ನ ಸಂಬಂಧ ಮುರಿದು ಬೀಳುವ ಹಂತದಲ್ಲಿತ್ತು. ಹೀಗಾಗಿ ಕ್ರಿಕೆಟ್ ನ ಎಲ್ಲಾ ವಿಭಾಗಗಳಿಂದ ನಿವೃತ್ತಿ ಪಡೆಯುವುದನ್ನು ಬಿಟ್ಟರೇ ನನ್ನೆದುರು ಬೇರೆ ದಾರಿ ಇರಲಿಲ್ಲ ಎಂದಿದ್ದಾರೆ.

ಪತ್ನಿಯೊಂದಿಗಿನ ಸಂಬಂಧ ಮುರಿದ ನಂತರದ 3 ವರ್ಷಗಳನ್ನು ಅವರು ಯಾವ ರೀತಿ ಕಳೆದರು. ಆ ವಿಚಾರ ತನ್ನನ್ನು ಹೇಗೆ ಮದ್ಯಪಾನ ಸೇವಿಸಲು ಪ್ರೇರೇಪಿಸಿತು ಎಂಬುವುದನ್ನು ತಮ್ಮ 'ದ ರಾಂಗ್ ಅನ್' ಎನ್ನುವ ಆತ್ಮಚರಿತ್ರೆಯಲ್ಲಿ ವಿವರವಾಗಿ ತಿಳಿಸಿದ್ದಾರೆ.