#AskTheCoach ಅನಿಲ್ ಕುಂಬ್ಳೆಗೆ ನೇರ ಪ್ರಶ್ನೆ ಎಸೆಯಿರಿ!

ಬೆಂಗಳೂರು, ಜುಲೈ 05: ಟೀಂ ಇಂಡಿಯಾದ ನೂತನ ಕೋಚ್ ಅನಿಲ್ ಕುಂಬ್ಳೆ ಅವರಿಗೆ ಸಾರ್ವಜನಿಕರು ಕೂಡಾ ಪ್ರಶ್ನೆಗಳನ್ನು ಕೇಳುವ ಅವಕಾಶವನ್ನು ಟ್ವಿಟ್ಟರ್ ಒದಗಿಸುತ್ತಿದೆ. ಮಂಗಳವಾರ (ಜುಲೈ 5) ರಂದು ಸಂಜೆ 4 ಗಂಟೆಗೆ ನಿಮ್ಮ ಪ್ರಶ್ನೆಗಳನ್ನು 'ಗೂಗ್ಲಿ' ಬೌಲರ್ ಅನಿಲ್ ಕುಂಬ್ಳೆ ಅವರತ್ತ ಎಸೆಯಬಹುದು.

ಮೈಕ್ರೋ ಬ್ಲಾಗಿಂಗ್ ತಾಣ ಟ್ವಿಟ್ಟರ್ ಬಳಸಿಕೊಂಡು ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ(ಬಿಸಿಸಿಐ) ಇಂಥದ್ದೊಂದು ಅವಕಾಶವನ್ನು ನೀಡುತ್ತಿದೆ.ಜೂನ್ 23 ರಂದು 43 ವರ್ಷ ವಯಸ್ಸಿನ ಅನಿಲ್ ಕುಂಬ್ಳೆ ಅವರು ಟೀಂ ಇಂಡಿಯಾ ಮುಖ್ಯ ಕೋಚ್ ಆಗಿ ಒಂದು ವರ್ಷದ ಅವಧಿಗೆ ಅಧಿಕಾರ ಸ್ವೀಕರಿಸಿದರು.

ವಿರಾಟ್ ಕೊಹ್ಲಿ ನಾಯಕತ್ವದ ಟೀಂ ಇಂಡಿಯಾವನ್ನು ಮುಂಬರುವ ವೆಸ್ಟ್ ಇಂಡೀಸ್ ಪ್ರವಾಸಕ್ಕೆ ಅನಿಲ್ ಕುಂಬ್ಳೆ ಅವರು ಅಣಿಗೊಳಿಸುತ್ತಿದ್ದಾರೆ.

ಜುಲೈ 21ರಿಂದ 49 ದಿನಗಳ ಪ್ರವಾಸ ಆರಂಭವಾಗಲಿದೆ. 17 ಮಂದಿ ಸದಸ್ಯರಿರುವ ಟೀಂ ಇಂಡಿಯಾ ಟೆಸ್ಟ್ ತಂಡಕ್ಕೆ ಬೆಂಗಳೂರಿನ ರಾಷ್ಟೀಯ ಕ್ರಿಕೆಟ್ ಅಕಾಡೆಮಿ (ಎನ್ ಸಿಎ) ಮೈದಾನದಲ್ಲಿ ತರಬೇತಿ ನೀಡಲಾಗಿದೆ. ಜುಲೈ 4ರಂದು ತರಬೇತಿ ಶಿಬಿರ ಮುಕ್ತಾಯವಾಗಿದೆ.

Send in your queries for @anilkumble1074 with #AskTheCoach. The #TeamIndia coach will go LIVE at 4 PM IST today pic.twitter.com/1Ad7XgwkiF

— BCCI (@BCCI) July 5, 2016

ವೆಸ್ಟ್ ಇಂಡೀಸ್ ಪ್ರವಾಸದಲ್ಲಿ ನಾಲ್ಕು ಟೆಸ್ಟ್ ಸೇರಿದಂತೆ ಟೀಂ ಇಂಡಿಯಾ ಪ್ರಸಕ್ತ ವರ್ಷದಲ್ಲಿ ತವರು ನೆಲದಲ್ಲಿ 13 ಟೆಸ್ಟ್ ಪಂದ್ಯಗಳನ್ನಾಡಲಿದೆ. ನ್ಯೂಜಿಲೆಂಡ್, ಬಾಂಗ್ಲಾದೇಶ, ಇಂಗ್ಲೆಂಡ್ ಹಾಗೂ ಆಸ್ಟ್ರೇಲಿಯಾ ತಂಡಗಳು ಭಾರತ ಪ್ರವಾಸ ಕೈಗೊಳ್ಳಲಿವೆ. (ಒನ್ ಇಂಡಿಯಾ ಸುದ್ದಿ)