ರಿಷಿಕಾ ಸಿಂಗ್ ಪೋಸ್ಟರ್ ಗಲಾಟೆ - ಓದುಗರ ಪತ್ರ

'ಯಾರಾದ್ರೆ ನನಗೇನು' ಚಿತ್ರದಲ್ಲಿ ನಾಯಕಿಯಾಗಿ ನಟಿಸಿರುವ ರಿಷಿಕಾಸಿಂಗ್ ಅವರ ಪೋಸ್ಟರ್ ವಿವಾದ ಈಗ ರಾಜ್ಯದೆಲ್ಲಡೆ ಚರ್ಚೆಗೆ ಗ್ರಾಸವಾಗಿದೆ. ನಮ್ಮ ಫ್ಲ್ಯಾಟ್ ನಲ್ಲಿ ಇದೇ ಚರ್ಚೆ. ಮಾಧ್ಯಮಗಳಲ್ಲಿ ಈ ಪೋಸ್ಟರ್ ಪರ ಮತ್ತು ವಿರೋಧ ಚರ್ಚೆಗಳು ತಾರಕ್ಕೇರಿವೆ.

ಡರ್ಟಿ ಪಿಕ್ಚರ್ಸ್ ನಲ್ಲಿ ವಿದ್ಯಾಬಾಲನ್ ಮತ್ತು ಇತ್ತೀಚೆಗೆ ಮಳೆಹುಡುಗಿ ಪೂಜಾಗಾಂಧಿ ದಂಡುಪಾಳ್ಯ ಚಿತ್ರದಲ್ಲಿ ಅರೆನಗ್ನವಾದ ವಿಚಾರ ಇಷ್ಟು ಚರ್ಚೆಗೆ ಒಳಗಾಗದೇ ಇದ್ದದ್ದು ಮತ್ತು ಈ ಚಿತ್ರ ಮಾತ್ರ ಯಾಕೆ ಇಷ್ಟು ಚರ್ಚೆಗೆ ಒಳಾಗಾಗುತ್ತಿದೆ ಎನ್ನುವುದು ನನ್ನ ಕುತೂಹಲ.

ಮಹಿಳಾ ಸಂಘಟನೆಗಳು ಈ ಸಿನಿಮಾದ ಪೋಸ್ಟರ್ ವಿಚಾರದಲ್ಲಿ ಇಷ್ಟು ಬೀದಿರಂಪ ಮಾಡುತ್ತಿವೆ ಅಲ್ವೇ ? ಹಾಗಾದ್ರೆ ಪೂಜಾಗಾಂಧಿ ಮತ್ತು ವಿದ್ಯಾಬಾಲನ್ ವಿಷಯದಲ್ಲಿ ಯಾಕೆ ಸಂಘಟನೆಗಳಿಗೆ ಕಾಳಜಿ ಇರಲಿಲ್ಲ. ವಿದ್ಯಾ ಬಾಲನ್ ಮತ್ತು ಪೂಜಾ ಗಾಂಧೀ ಕೂಡ ಮಹಿಳೆಯರು ತಾನೆ? ಅವರಿಬ್ಬರೂ ಅರೆನಗ್ನವಾದಾಗ ಎಲ್ಲರೂ ನೋಡಿದ್ದೇ ನೋಡಿದ್ದು ಹೊರತು ಯಾರೂ ತಕರಾರು ಎತ್ತಿರಲಿಲ್ಲ ಯಾಕಪ್ಪಾ?.

ಟಿವಿ ವಾಹಿನಿಯಲ್ಲಿ ಮಂಗಳವಾರ (ಜ 11) ನಡೆದ ಬಿಸಿಬಿಸಿ ಚರ್ಚಾಕೂಟದಲ್ಲಿ ಚಿತ್ರದ ನಿರ್ದೇಶಕರು ನಾನು ಮುಸ್ಲಿಂ ಕೋಮಿನವನಾದುದರಿಂದ ಚಿತ್ರಕ್ಕೆ ಇಷ್ಟು ತೊಂದರೆಯಾಗುತ್ತಿದೆ ಎಂದು ಅಲವತ್ತು ಕೊಂಡರು. ಈ ಮಾತಿನಲ್ಲಿ ಹುರುಳಿಲ್ಲ ಎಂದು ನನ್ನ ಭಾವನೆ.

ಜವಾಬ್ದಾರಿಯುತ ಮಹಿಳಾ ಸಂಘಟನೆಗಳು ಪ್ರತಿಭಟನೆ ನಡೆಸುವ ಮುಂಚೆ ಚಿತ್ರತಂಡದ ಬಳಿ ಚಿತ್ರಕಥೆಯ ಬಗ್ಗೆ ಮಾತನಾಡಬಹುದಾಗಿತ್ತು. ಡರ್ಟಿ ಪಿಕ್ಚರ್ಸ್ ನಲ್ಲಿ ಸಿಲ್ಕ್ ಸ್ಮಿತಾ ಕಥೆಯಾಧಾರಿತ ಚಿತ್ರವಾಗಿದ್ದಿದ್ದರಿಂದ ಚಿತ್ರಕಥೆಗೆ ಪೂರಕವಾಗಿ ವಿದ್ಯಾಬಾಲನ್ ಅವರನ್ನು ಬಳಸಿಕೊಳ್ಳಲಾಗಿದೆ ಎಂದು ಒಪ್ಪಿಕೊಳ್ಳುವ ಸಂಘಟನೆಗಳು ಈ ಸಿನಿಮಾ ವಿಚಾರದಲ್ಲಿ ತಕರಾರು ಎತ್ತುತ್ತಿರುವುದು ಏಕೆ?

ಇದೇ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದ ಈಗ ವಿವಾದದ ಕೇಂದ್ರಬಿಂದು ಆಗಿರುವ ರಿಷಿಕಾ, ನಗ್ನ ಚಿತ್ರದಲ್ಲಿ ನಟಿಸುವ ದರ್ದ್ ನನಗಿಲ್ಲ, ರಾಜೇಂದ್ರ ಸಿಂಗ್ ಬಾಬು ಅಂತಹ ಹಿರಿಯ ಮತ್ತು ಗೌರವಾನ್ವಿತ ಕುಟುಂದದಿಂದ ಬಂದವಳು ನಾನು. ಪೋಸ್ಟರ್ ನಲ್ಲಿ ತಾಂತ್ರಿಕತೆ ಬಳಸಿ ಆ ರೀತಿಯಲ್ಲಿ ತೋರಿಸಲಾಗಿದೆಯೇ ಹೊರತು ನಾನೇನು ನಗ್ನಳಾಗಿಲ್ಲ. ಚಿತ್ರಕಥೆಗೆ ಆ ದೃಶ್ಯದ ಅವಶ್ಯಕತೆ ಇತ್ತು ಎಂಬ ವಾದ ಮಂಡಿಸಿದರು.

ನಮ್ಮ ಚಿತ್ರರಂಗ ಬೆಳೆಯುತ್ತಿದ್ದಂತೆ ನಮ್ಮ ನಾಯಕಿಯರು ಧರಿಸುವ ಬಟ್ಟೆಗಳ ಅಳತೆಗಳು ದಿನದಿಂದ ದಿನಕ್ಕೆ ಇಂಚಿಂಚು ಕಡಿಮೆ ಆಗುತ್ತಿರುವುದಂತೂ ಸತ್ಯ. ಅದಕ್ಕೆ ಅವಕಾಶಗಳ ಕೊರತೆ ಇರಬಹುದು ಅಥವಾ ಚಿತ್ರರಂಗದಲ್ಲಿ ಭದ್ರವಾಗಿ ನೆಲೆವೂರುವ ಹಂಬಲ ಇರಬಹುದು. ಅಥವಾ ಪ್ರೇಕ್ಷಕ ಮಹಾಶಯನ ಬೆಂಬಲವಿರಲೂಬಹುದು!

ಒಟ್ಟಿನಲ್ಲಿ ಮಹಿಳಾ ಸಂಘಟನೆಗಳು ನಡೆಸುವ ಹೋರಾಟ ಮಹಿಳೆಯರ ಪರವಾಗಿರಲಿ. ನಿಮ್ಮ ಹೋರಾಟ ಪ್ರಚಾರಕ್ಕಾಗಿ ಮಾತ್ರ ಇರದಿರಲಿ. ಒಟ್ಟಿನಲ್ಲಿ ನಿಮ್ಮ ಹೋರಾಟದಲ್ಲಿ ಯಾವುದೇ ತಾರತಮ್ಯ ಇರದಿರಲಿ. ಸರ್ವೇ ಜನಃ ಸುಖಿನೋ ಭವಂತು.

English summary

Kannada actress Rishika singhs 'sleaze' pose poster controversy is hot news in Sandalwood. If Vidya Balan and Pooja Gandhi can get away with such posters why not Rishika? argues Saraswati Shankar, Citizen reporter, Bangalore. Rishika playing lead role in movie " Yaradre Nanagenu?