ಸ್ಮೃತಿ ಝುಬಿನ್ ಇರಾನಿ

ದೆಹಲಿಯ ಹೋಲಿ ಚೈಲ್ಡ್ ಆಕ್ಸಿಲಿಯಂ ಶಾಲೆಯಲ್ಲಿ ಆರಂಭಿಕ ವಿದ್ಯಾಭ್ಯಾಸ ನಡೆಸಿ, ದೂರಶಿಕ್ಷಣ ವಿದ್ಯಾಲಯದಿಂದ ಶಿಕ್ಷಣ ಪಡೆದರು. ಸದ್ಯ ಇವರು ದೆಹಲಿ ವಿಶ್ವವಿದ್ಯಾಲಯದ ವಿದ್ಯಾರ್ಥಿಯಾಗಿದ್ದಾರೆ. ಕ್ಯಾನ್ಸರ್ ರೋಗಿಗಳ ಸಹಾಯ ಸಂಘ ಹಾಗೂ ವಾತ್ಸಲ್ಯ ಬೀದಿ ಮಕ್ಕಳ ಫೌಂಡೇಶನ್ ಸೇರಿದಂತೆ ಇನ್ನೂ ಹಲವಾರು ಎನ್ಜಿಓಗಳೊಂದಿಗೆ ನಿಕಟ ಸಂಪರ್ಕದಲ್ಲಿ ಕೆಲಸ ಮಾಡುತ್ತಿದ್ದಾರೆ. ಮಾಂಟೆ ಕಾರ್ಲೊ ಟೆಲಿವಿಷನ್ ಫೆಸ್ಟಿವಲ್ನಲ್ಲಿ ಭಾಗವಹಿಸಿದ ಪ್ರಥಮ ಭಾರತೀಯ ಪ್ರಜೆ ಎಂದು ಸ್ಮೃತಿ ಹೆಸರು ಮಾಡಿದ್ದಾರೆ. ಇವರನ್ನು ಡಬ್ಲ್ಯೂಎಚ್ಓ - ಓಆರ್ಎಸ್ನ ಭಾರತದ ಗುಡವಿಲ್ ರಾಯಭಾರಿಯಾಗಿ 3 ವರ್ಷಗಳ ಅವಧಿಗೆ ನೇಮಿಸಲಾಗಿತ್ತು. 2007 ರಲ್ಲಿ ’ಪೀಪಲ್ ಫಾರ್ ಚೇಂಜ್’ ಎಂಬ ಎನ್ಜಿಓ ಸಂಸ್ಥೆಯನ್ನು ಇವರು ಆರಂಭಿಸಿದರು. ಪೀಪಲ್ ಫಾರ್ ಚೇಂಜ್ ಸಂಸ್ಥೆಯ ಮೂಲಕ ನಾಶಿಕನಲ್ಲಿ ಕ್ರೀಡಾ ಸ್ಕಾಲರಶಿಪ್ಗಳನ್ನು ನೀಡಲಾಗುತ್ತಿದೆ. ಮಹಾರಾಷ್ಟ್ರದ 35 ಹಳ್ಳಿಗಳಲ್ಲಿ ಬೋರವೆಲ್ ಮೂಲಕ ಕುಡಿಯುವ ನೀರಿನ ವ್ಯವಸ್ಥೆಯನ್ನು ಸಂಸ್ಥೆ ಮಾಡಿದೆ. ಮುಂಬೈನಲ್ಲಿ ನೆರೆಹಾವಳಿ ಸಂಭವಿಸಿದಾಗ 92.5 ಎಫ್ಎಂ ರೇಡಿಯೊ ಸಂಸ್ಥೆಯೊಂದಿಗೆ 10 ಟನ್ಗೂ ಅಧಿಕ ಪರಿಹಾರ ಸಾಮಗ್ರಿಗಳನ್ನು ಸಂಗ್ರಹಿಸಿ ಹಂಚಲಾಗಿತ್ತು. ಆರ್ಥಿಕವಾಗಿ ಹಿಂದುಳಿದ ಕುಟುಂಬದ ಮಕ್ಕಳ ಉನ್ನತ ವಿದ್ಯಾಭ್ಯಾಸಕ್ಕಾಗಿ ಸ್ಕಾಲರಶಿಪ್ಗಳನ್ನು ಸಂಸ್ಥೆ ನೀಡುತ್ತಿದೆ. ವುಮೆನ್ ಆಂಡ್ ಹೆಲ್ತ್ ಕಾರ್ಯಕ್ರಮದ ಹೆಸರಿನಲ್ಲಿ ಮಹಿಳೆಯರಿಗಾಗಿ ಆರ್ಥಿಕ ಸಬಲೀಕರಣದ ತರಬೇತಿ ಕಾರ್ಯಕ್ರಮಗಳನ್ನು ಇವರ ಸಂಸ್ಥೆ ಆಯೋಜಿಸುತ್ತಿದೆ.

ಇಂಡಿಯನ್ ಟೆಲಿವಿಷನ್ ಅಕಾಡೆಮಿಯ ಅತ್ಯುತ್ತಮ ಅಭಿನೇತ್ರಿ ಪ್ರಶಸ್ತಿಯನ್ನು ಸತತ ಏಳು ಬಾರಿ ಪಡೆದರು. ಇಂಡೊ ಅಮೆರಿಕನ್ ಸೊಸೈಟಿಯ ಯಂಗ್ ಅಚೀವರ್ ಅವಾರ್ಡ್ ಪಡೆದಿದ್ದಾರೆ. 2001, 2002, 2003 ಹಾಗೂ 2005 ರಲ್ಲಿ ಐಟಿಎ ಅತ್ಯುತ್ತಮ ಅಭಿನೇತ್ರಿ-ಡ್ರಾಮಾ ಪ್ರಶಸ್ತಿ ಪಡೆದಿದ್ದಾರೆ. 2004 ರಲ್ಲಿ ಐಟಿಎ ಅತ್ಯುತ್ತಮ ಅಭಿನೇತ್ರಿ ಪ್ರಶಸ್ತಿ ಪಡೆದಿದ್ದಾರೆ. 2010 ರಲ್ಲಿ ಐಟಿಎ ಮೈಲಸ್ಟೋನ್ ಅವಾರ್ಡ ಪಡೆದರು. ಟಿವಿ ಧಾರಾವಾಹಿ ’ಕ್ಯೂಂ ಕಿ ಸಾಸ ಭಿ ಕಭಿ ಬಹು ಥಿ’ ಯಲ್ಲಿನ ಇವರ ಉತ್ತಮ ಅಭಿನಯಕ್ಕಾಗಿ ಈ ಎಲ್ಲ ಪ್ರಶಸ್ತಿಗಳು ಅವರಿಗೆ ಸಂದಿವೆ. ’ವಿರುದ್ಧ’ ಟಿವಿ ಧಾರಾವಾಹಿಯಲ್ಲಿನ ಅಭಿನಯಕ್ಕಾಗಿ ಉತ್ತಮ ಅಭಿನೇತ್ರಿ (ಜ್ಯೂರಿ) ಇಂಡಿಯನ್ ಟೆಲಿ ಅವಾರ್ಡ ಲಭಿಸಿದೆ.