ಸಿಂಗಪುರದಲ್ಲಿ 'ಕನಕ-ಪುರಂದರ'; ವಿಶ್ವದೆಲ್ಲೆಡೆ ಪ್ರಸಾರ
ಕನ್ನಡ ಸಂಘ (ಸಿಂಗಪುರ)ವು 1998ರಿಂದ ಪ್ರತೀ ವರ್ಷವೂ ಪುರಂದರ ದಾಸರ ಆರಾಧನೆಯನ್ನು ನಡೆಸಿಕೊಂಡು ಬರುತ್ತಿದೆ. ಮೊದಲು ಮನೆಗಳಲ್ಲಿ ಶುರುವಾಗಿ, ನಂತರ ದೇವಸ್ಥಾನಗಳಲ್ಲಿ, ಕನ್ನಡ ಸಂಘದ ಆಶ್ರಯದಲ್ಲಿ ಸಮುದಾಯ ಭವನಗಳಲ್ಲಿ ನಡೆಯುತ್ತಿದ್ದ ಈ ಕಾರ್ಯಕ್ರಮ ವರ್ಷದಿಂದ ವರ್ಷಕ್ಕೆ ಬೆಳೆಯುತ್ತಾ ಬಂದಿದೆ. ಫೆಬ್ರವರಿ 20ನೇ ತಾರೀಖು, ಶನಿವಾರ ಸಿಂಗಪುರದಲ್ಲಿ ನಡೆಯುವ ಪುರಂದರ ನಮನ 2016ರ (ಪುರಂದರ ದಾಸರ 451ನೇ ಆರಾಧನೆ) ಕೆಲವು ವೈಶಿಷ್ಟ್ಯಗಳು ಇಲ್ಲಿವೆ. [ಸಿಂಗಪುರದಲ್ಲಿ ಮೇಳೈಸಿದ 'ಲಯತರಂಗ'ದ ನಾದವೈಭವ]
1. ದಾಸಸಾಹಿತ್ಯ ಮತ್ತು ಸಂಗೀತವನ್ನು ಹೆಚ್ಚಿನ ಕನ್ನಡಿಗರಿಗೆ ಮತ್ತು ಕನ್ನಡೇತರರಿಗೆ ತಲುಪಿಸುವ ನಿಟ್ಟಿನಲ್ಲಿ ಈ ಬಾರಿ ಆರಿಸಿಕೊಂಡ ವಿಷಯ "ಕನಕ-ಪುರಂದರ". ಜನವರಿ 31ರಂದು ಸುಮಾರು 120ಕ್ಕೂ ಹೆಚ್ಚು ಹಿರಿ-ಕಿರಿಯರು "ಕನಕ-ಪುರಂದರ" ಸಂಗೀತ ಸ್ಪರ್ಧೆಯಲ್ಲಿ ಭಾಗವಹಿಸಿದ್ದರು.
2. ಸಾಹಿತ್ಯ ಮತ್ತು ಸಂಗೀತಾಧಾರಿತವಾದ ಈ ಕಾರ್ಯಕ್ರಮವನ್ನು ಕನ್ನಡ ಸಂಘ (ಸಿಂಗಪುರ)ವು ಇಲ್ಲಿನ ಪ್ರತಿಷ್ಠಿತ ಕಲಾಸಂಸ್ಥೆಯಾದ ಸಿಂಗಪುರ ಇಂಡಿಯನ್ ಫೈನ್ ಆರ್ಟ್ಸ್ ಸೊಸೈಟಿ (SIFAS)ನ ಜಂಟಿ ಸಹಯೋಗದಲ್ಲಿ ಹಮ್ಮಿಕೊಂಡಿದೆ.
3. "ಕನಕ-ಪುರಂದರ" ಸಂಗೀತ ಸ್ಪರ್ಧೆಯ ವಿಜೇತರಿಗೆ ಬಹುಮಾನ ವಿತರಣೆ, ಗಾನಕೋಗಿಲೆ ಡಾ. ಭಾಗ್ಯ ಮೂರ್ತಿ ಅವರ ನೇತೃತ್ವದಲ್ಲಿ ಸಿಂಗಪುರದ ಹಲವಾರು ಸಂಗೀತಗಾರರು, ಶಿಕ್ಷಕರು ಹಾಗೂ ಶಿಷ್ಯವರ್ಗದವರಿಂದ ಸಮೂಹಗಾಯನದ ಜೊತೆಗೆ ಈ ಕಾರ್ಯಕ್ರಮದ ಮುಖ್ಯ ಆಕರ್ಷಣೆ "ಕನಕ-ಪುರಂದರ" ಹಿಂದೂಸ್ಥಾನಿ-ಕರ್ನಾಟಕ ಸಂಗೀತಗಳ ಜುಗಲ್ ಬಂದಿ ಕಾರ್ಯಕ್ರಮ.
4. ಇದಲ್ಲದೆ ಈ ಕಾರ್ಯಕ್ರಮದಲ್ಲಿ ಆಯೋಯಿಸಲಾಗುತ್ತಿರುವ ಪಕ್ಕವಾದ್ಯಗಳಲ್ಲೊಂದು - ಸಾರಂಗಿ. ಅಪರೂಪವಾದ, ಪ್ರಾಯಶಃ ಸಿಂಗಪುರದಲ್ಲಿ ಪ್ರಥಮಬಾರಿಗೆ ಈ ಪಕ್ಕವಾದ್ಯವನ್ನು ನುಡಿಸಿತ್ತಿರುವವರು ಉಸ್ತಾದ್ ಫೈಯಾಜ್ ಖಾನ್ ಅವರ ಪುತ್ರ ಉಸ್ತಾದ್ ಸರ್ಫರಾಜ್ ಖಾನ್.
ಇಷ್ಟೊಂದು ಹೊಸತನ ತುಂಬಿರುವ ಈ ಕಾರ್ಯಕ್ರಮವನ್ನು ನೋಡಲು ನಾನೂ ಸಿಂಗಪುರದಲ್ಲಿದ್ದರೆ ಎಷ್ಟು ಚೆನ್ನಾಗಿತ್ತು ಎಂದು ನಿಮಗನಿಸಿದರೆ ಅದರಲ್ಲೇನೂ ತಪ್ಪಿಲ್ಲ, ನಿರಾಶರಾಗುವ ಅಗತ್ಯವೂ ಇಲ್ಲ. ಕನಕ-ಪುರಂದರ ದಾಸರ ಸಂಗೀತ ಸುಧೆಯನ್ನು ಎಲ್ಲೆಡೆ ಹರಡುವ ನಿಟ್ಟಿನಲ್ಲಿ ಕನ್ನಡ ಸಂಘ (ಸಿಂಗಪುರ)ವು ತನ್ನ ತಾಂತ್ರಿಕ ತಂಡದ ಸಹಯೋಗದೊಂದಿಗೆ ಹೊಸ ಹೆಜ್ಜೆಯೊಂದನ್ನು ಇಡುತ್ತಿದೆ.
ಇದೇ ಮೊದಲ ಬಾರಿಗೆ ಕಾರ್ಯಕ್ರಮದ ನೇರ ಪ್ರಸಾರ ಮಾಡಲಿದೆ. ಈ ಕಾರ್ಯಕ್ರಮವನ್ನು ಕನ್ನಡ ಸಂಘದ ಯೂಟ್ಯೂಬ್ ಚಾನಲ್ಲಿನಲ್ಲಿ ಈ ಶನಿವಾರ ಮಧ್ಯಾಹ್ನ 2.30 ಗಂಟೆ ಭಾರತೀಯ ಸಮಯದಿಂದ (Live Streaming) ನೋಡಲು ಈ ಕೊಂಡಿಯನ್ನು ಕ್ಲಿಕ್ಕಿಸಿ. ಕೇವಲ ನೀವು ಮಾತ್ರ ನೋಡುವುದಲ್ಲ - ನಿಮ್ಮ ಸಂಗೀತ ಪ್ರಿಯ ಬಂಧುಮಿತ್ರರಿಗೂ ತಿಳಿಸಿ.