ಶಂಕರ ಕಣ್ಣಾಸ್ಪತ್ರೆಯಿಂದ ಅಮೆರಿಕಾದಲ್ಲಿ ಕೋಲಾಟ

ನವರಾತ್ರಿಯಲ್ಲಿ ನವದೇವಿಯರನ್ನು ಆರಾಧಿಸುವುದರ ಜೊತೆಗೆ ದೇಶದಾದ್ಯಂತ ಮಹಿಳೆಯರು ಲಂಗ ದಾವಣಿ ಉಟ್ಟುಕೊಂಡು ದಾಂಡಿಯಾ (ಕೋಲಾಟ) ಆಡಿ ಸಡಗರಪಡುತ್ತಾರೆ. ಕೋಲಾಟ ಆಡುವವರಿಗೆ ಮಾತ್ರವಲ್ಲ ನೋಡುಗರಿಗೂ ವಿಶಿಷ್ಟ ರೀತಿಯ ಮನರಂಜನೆ ಸಿಗುತ್ತದೆ.

ಅಮೆರಿಕಾದ ಬೇ ಏರಿಯಾದಲ್ಲಿರುವ ಶಂಕರ ಐ ಫೌಂಡೇಷನ್ ದಾಂಡಿಯಾವನ್ನು ಹಣ ಸಂಗ್ರಹಣೆಗೆ ಬಳಸಿಕೊಂಡು ಹೊಸ ಮುನ್ನುಡಿ ಬರೆದಿದೆ. ಭಾರತದಲ್ಲಿ ಮತ್ತಷ್ಟು ಕಣ್ಣಿನ ಆಸ್ಪತ್ರೆಗಳನ್ನು ನಿರ್ಮಿಸುವ ಮಹತ್ತರ ಉದ್ದೇಶದಿಂದ ಅಕ್ಟೋಬರ್ 19ರಿಂದ 27ರವರೆಗೆ 'ದಾಂಡಿಯಾ 2012' ಸ್ಪರ್ಧೆಯನ್ನು ಶಂಕರ ಐ ಫೌಂಡೇಷನ್ ಏರ್ಪಡಿಸಿತ್ತು.

ಅಮೆರಿಕಾದ ಮಿಲ್ಪಿಟಸ್‌ನಲ್ಲಿ ಇರುವ ಶಂಕರ್ ಐ ಫೌಂಡೇಷನ್ ಆಯೋಜಿಸಿದ್ದ ಈ ದಾಂಡಿಯಾ ಉತ್ಸವಕ್ಕೆ ಅಮೆರಿಕದ ದಾನಿಗಳಿಂದ ಭಾರೀ ಸ್ಪಂದನೆ ವ್ಯಕ್ತವಾಯಿತು. ಈಗ ಸಂಗ್ರಹಿಸಲಾಗಿರುವ ಹಣದ ಸಹಾಯದಿಂದ ಭಾರತದ ಗ್ರಾಮೀಣ ಪ್ರದೇಶದಲ್ಲಿರುವ ಜನರಿಗೆ ಸಹಾಯವಾಗಲೆಂದು ಅನೇಕ ಆಸ್ಪತ್ರೆಗಳನ್ನು ಕಟ್ಟಿಸುತ್ತಿದ್ದಾರೆ.

2013ರಲ್ಲಿ ಕಾನ್ಪುರದಲ್ಲಿ 10ನೇ ಕಣ್ಣಿನಾಸ್ಪತ್ರೆ ಮತ್ತು ಉತ್ತರಪ್ರದೇಶದಲ್ಲಿಯೂ ಆಸ್ಪತ್ರೆ ನಿರ್ಮಿಸಲಾಗುತ್ತಿದೆ. ಮುಂದಿನ ಒಂದೇ ವರ್ಷದಲ್ಲಿ ಈ ಆಸ್ಪತ್ರೆಗಳು ಕಣ್ಣುತೆರೆಯಲಿವೆ. ಅಲ್ಲದೆ, ಜನರ ಆಗ್ರಹದ ಮೇರೆಗೆ ಗುಜರಾತ್ ಮತ್ತು ಗುಂಟೂರಿನಲ್ಲಿರುವ ಕಣ್ಣಿನಾಸ್ಪತ್ರೆಗಳನ್ನು ವೃದ್ಧಿಸಲು ನಿರ್ಧರಿಸಿದೆ.

ಈ ಎಲ್ಲ ಆಸ್ಪತ್ರೆಗಳನ್ನು ನಿರ್ಮಿಸಲು ಜಮೀನನ್ನು ವಶಪಡಿಸಿಕೊಳ್ಳುವ ಪ್ರಕ್ರಿಯೆ ಸದ್ಯದಲ್ಲಿಯೇ ಆರಂಭವಾಗಲಿದೆ ಎಂದು ಫೌಂಡೇಷನ್ನಿನ ಪ್ರಕಟಣೆ ಹೇಳಿದೆ. ಈ ಆಸ್ಪತ್ರೆಗಳಲ್ಲಿ ಪ್ರತಿ ವರ್ಷ 20 ಸಾವಿರ ಜನರಿಗೆ ಉಚಿತ ಕಣ್ಣಿನ ಶಸ್ತ್ರಚಿಕಿತ್ಸೆ ನಡೆಸಲು ಉದ್ದೇಶಿಸಲಾಗಿದೆ. ಶಂಕರ್ ಐ ಫೌಂಡೇಷನ್‌ಗಾಗಿ 2008ರಲ್ಲಿ ನ್ಯೂಜೆರ್ಸಿಯಲ್ಲಿರುವ ಬೃಂದಾವನ ಕನ್ನಡ ಕೂಟದಲ್ಲಿ ಹಣ ಸಂಗ್ರಹಿಸಲಾಗಿತ್ತು.

ಶಂಕರ್ ಐ ಫೌಂಡೇಷನ್ ಮಾಡುತ್ತಿರುವ ಈ ಉದಾತ್ತ ಕೆಲಸಕ್ಕೆ ಉದಾರವಾಗಿ ದೇಣಿಗೆ ನೀಡಬಯಸುವವರು ತಮ್ಮ ಶಕ್ತ್ಯಾನುಸಾರ ದಾನ ಮಾಡಬಹುದು. ಈ ಬಗ್ಗೆ ಹೆಚ್ಚಿನ ವಿವರಗಳು ಬೇಕಿದ್ದಲ್ಲಿ ಈ ವೆಬ್ ಸೈಟ್ ಸಂದರ್ಶಿಸಿ ಮಾಹಿತಿ ಪಡೆಯಬಹುದು : http://www.giftofvision.org

English summary

Sankara EYE Foundation had organized Dandia 2012 in bay area as fundraiser to construct 4 hospitals in rural area in India. Dandia is form of dance, where men and women dressed in traditional dress play and dance with sticks (Kolata) and enjoy.