ಎಚ್-1ಬಿ ವೀಸಾ ನಿರ್ಬಂಧ: ನ್ಯಾಯಾಲಯದಲ್ಲೂ ಭಾರತದ ಉದ್ಯೋಗಿಗಳಿಗೆ ಹಿನ್ನಡೆ
ವಾಷಿಂಗ್ಟನ್, ಸೆಪ್ಟೆಂಬರ್ 18: ಎಚ್1ಬಿ ವಿಶೇಷ ಉದ್ಯೋಗ ವೀಸಾದಡಿ ವಿದೇಶಿ ಪ್ರಜೆಗಳು ಈ ವರ್ಷದ ಅಂತ್ಯದವರೆಗೂ ಅಮೆರಿಕ ಪ್ರವೇಶಿಸುವುದನ್ನು ನಿಷೇಧಿಸಿ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಹೊರಡಿಸಿದ್ದ ಆದೇಶವನ್ನು ಪ್ರಶ್ನಿಸಿದ್ದ ಭಾರತದ ಪ್ರಜೆಗಳಿಗೆ ಹಿನ್ನಡೆಯಾಗಿದೆ.
ಈ ಆದೇಶ ಪ್ರಶ್ನಿಸಿ ಭಾರತ ಮೂಲದ 169 ಮಂದಿ ನ್ಯಾಯಾಲಯದಲ್ಲಿ ಪ್ರಶ್ನಿಸಿದ್ದರು. ಇದರ ವಿಚಾರಣೆ ನಡೆಸಿದ ಭಾರತ-ಅಮೆರಿಕದ ನ್ಯಾಯಾಧೀಶರು ಅರ್ಜಿಯನ್ನು ತಿರಸ್ಕರಿಸಿದ್ದಾರೆ.
ಎಚ್1ಬಿ ವೀಸಾ ನೆಪದಲ್ಲಿ 21 ಮಿಲಿಯನ್ ಡಾಲರ್ ವಂಚನೆ: ಅಮೆರಿಕದಲ್ಲಿ ಭಾರತೀಯನ ಬಂಧನ
ಸೈದ್ಧಾಂತಿಕ ಅಥವಾ ತಾಂತ್ರಿಕ ಪರಿಣತಿ ಹೊಂದಿರುವ ವಿಶೇಷ ಉದ್ಯೋಗಗಳಿಗೆ ವಿದೇಶಿ ನೌಕರರನ್ನು ನೇಮಿಸಿಕೊಳ್ಳಲು ಅಮೆರಿಕದ ಕಂಪೆನಿಗಳಿಗೆ ಎಚ್-1ಬಿ ವಲಸೆಯೇತರ ವೀಸಾದಡಿ ಅವಕಾಶ ನೀಡಲಾಗುತ್ತದೆ. ಭಾರತ ಮತ್ತು ಚೀನಾದಂತಹ ದೇಶಗಳಿಂದ ಪ್ರತಿ ವರ್ಷ ಸಾವಿರಾರು ಮಂದಿಯನ್ನು ತಂತ್ರಜ್ಞಾನ ಕಂಪೆನಿಗಳು ನೇಮಿಸಿಕೊಳ್ಳುವುದರಿಂದ ಅವು ಈ ವೀಸಾವನ್ನು ಹೆಚ್ಚು ಅವಲಂಬಿಸಿವೆ.
ಆದರೆ ಈ ವೀಸಾದಡಿ ವಿದೇಶಿಗರ ಮೇಲೆ ನಿರ್ಬಂಧ ವಿಧಿಸುವ ಆದೇಶದಿಂದ ಭಾರತದ ಉದ್ಯೋಗಿಗಳಿಗೆ ಹಿನ್ನಡೆಯಾಗಿದೆ. ಹೀಗಾಗಿ ಕೊಲಂಬಿಯಾ ಜಿಲ್ಲೆಯ ನ್ಯಾಯಾಲಯದಲ್ಲಿ ಇದನ್ನು ಪ್ರಶ್ನಿಸಲಾಗಿತ್ತು. ರಜೆ ನಿಮಿತ್ತ ಭಾರತಕ್ಕೆ ಮರಳಿದ್ದ ಪ್ರಜೆಗಳು ತಮ್ಮ ಉದ್ಯೋಗಕ್ಕೆ ವಾಪಸಾಗಲು ಈ ಆದೇಶದಿಂದ ಸಾಧ್ಯವಾಗುತ್ತಿಲ್ಲ. ಇದರಿಂದಾಗಿ ನಿಷೇಧವನ್ನು ತೆರವುಗೊಳಿಸುವಂತೆ ಕೋರಿದ್ದರು. ಭಾರತದ ಉದ್ಯೋಗಿಗಳ ಮನವಿಯನ್ನು ಪರಿಶೀಲಿಸಿದ ಭಾರತ ಮೂಲದವರೇ ಆದ ನ್ಯಾಯಾಧೀಶ ಅಮಿತ್ ಪಿ ಮೆಹ್ತಾ ಅದನ್ನು ವಜಾಗೊಳಿಸಿದ್ದಾರೆ.