ಶ್ವೇತಭವನ ಮುಂದೆ ಎಚ್‌-1ಬಿ ವೀಸಾ ಚೆಂಡು: ಭಾರತೀಯರಲ್ಲಿ ತಳಮಳ

ವಾಷಿಂಗ್ಟನ್, ಫೆಬ್ರವರಿ 22: ಎಚ್-1ಬಿ ವಿದೇಶಿ ಉದ್ಯೋಗ ವೀಸಾ ಹೊಂದಿರುವವರ ಸಂಗಾತಿಗಳಿಗೆ ಅಮೆರಿಕದಲ್ಲಿ ನೌಕರಿ ಮಾಡಲು ಅವಕಾಶ ನೀಡುವ ನಿಯಮದಲ್ಲಿ ಬದಲಾವಣೆ ತರುವ ಪ್ರಸ್ತಾವವನ್ನು ಶ್ವೇತಭವನ ಸ್ವೀಕರಿಸಿದೆ.

ಅಮೆರಿಕದ ಈ ನಿರ್ಧಾರದಿಂದ ಎಚ್‌-1ಬಿ ವೀಸಾ ಹೊಂದಿರುವ ಸುಮಾರು 90,000 ಮಂದಿಯ ಸಂಗಾತಿಗಳಿಗೆ ಸಂಕಷ್ಟ ಎದುರಾಗಲಿದ್ದು, ಇದರಲ್ಲಿ ಭಾರತೀಯರೇ ಹೆಚ್ಚಿನ ಸಂಖ್ಯೆಯಲ್ಲಿದ್ದಾರೆ. ಹೋಮ್ ಲ್ಯಾಂಡ್ ಸೆಕ್ಯುರಿಟಿ ಇಲಾಖೆಯು ಈ ಪ್ರಸ್ತಾವವನ್ನು ಶ್ವೇತಭವನದ ಬಜೆಟ್ ನಿರ್ವಹಣಾ ಕಚೇರಿಗೆ ರವಾನಿಸಿದೆ.

ಈ ಬಗ್ಗೆ ಅಂತಿಮ ತೀರ್ಮಾನ ತೆಗೆದುಕೊಳ್ಳುವ ಆಯ್ಕೆ ಶ್ವೇತಭವನದ ಮುಂದಿದೆ. ಈ ಪ್ರಸ್ತಾವವನ್ನು ಶ್ವೇತಭವನ ಪರಾಮರ್ಶೆಗೆ ಒಳಪಡಿಸಲಿದ್ದು, ವಿವಿಧ ಸಂಸ್ಥೆಗಳ ಅಭಿಪ್ರಾಯಗಳನ್ನು ಪಡೆದುಕೊಳ್ಳಲಿದೆ. ಇಡೀ ಪ್ರಕ್ರಿಯೆಗೆ ಕೆಲವು ವಾರಗಳಿಂದ ಹಲವು ತಿಂಗಳುಗಳು ಬೇಕಾಗಬಹುದು.

ಪರಾಮರ್ಶೆ ಮತ್ತು ಅಭಿಪ್ರಾಯ ಸಂಗ್ರಹಣಾ ಪ್ರಕ್ರಿಯೆಗಳು ಪೂರ್ಣಗೊಳ್ಳುವವರೆಗೂ ಈ ಪ್ರಸ್ತಾವಿತ ನಿಯಮವು ಅಂತಿಮಗೊಳ್ಳುವುದಿಲ್ಲ. ಈಗಿರುವ ಪ್ರಕ್ರಿಯೆಯ ಅನ್ವಯ ಒಮ್ಮೆ ಶ್ವೇತಭವನ ಅದಕ್ಕೆ ಅನುಮೋದನೆ ನೀಡಿದರೆ, 30 ದಿನಗಳ ಸಲಹಾ ಅವಧಿಯೊಂದಿಗೆ ಫೆಡರಲ್ ರಿಜಿಸ್ಟರ್‌ನಲ್ಲಿ ಪ್ರಕಟಿಸಲಾಗುತ್ತದೆ.

ಭಾರತ ಮೂಲದ ಸೆನೆಟರ್ ಕಮಲಾ ಹ್ಯಾರಿಸ್ ಸೇರಿದಂತೆ ಅಮೆರಿಕದ ಅನೇಕ ಸಂಸದರು ನೂತನ ವೀಸಾ ನೀತಿಯನ್ನು ವಿರೋಧಿಸಿದ್ದಾರೆ. ಅಲ್ಲದೆ, ಸಿಲಿಕಾನ್ ವ್ಯಾಲಿ ಕಂಪೆನಿಗಳು ಕೂಡ ಆಕ್ಷೇಪ ವ್ಯಕ್ತಪಡಿಸಿವೆ. ಇದು ಮಹಿಳಾ ವಿರೋಧಿ ಮಾತ್ರವಲ್ಲ, ಎಚ್‌1ಬಿ ವೀಸಾ ಹೊಂದಿರುವವರ ಪ್ರತಿಭಾವಂತ ಸಂಗಾತಿಗಳು ಅಮೆರಿಕದಲ್ಲಿ ಕೆಲಸ ಮಾಡುವುದನ್ನು ತಡೆಯುತ್ತದೆ ಎಂದು ಹೇಳಿವೆ.

English summary

Donald Trump government will take a final call on H-1B Visa rules. Department of Homeland Security sent the proposed changes in the existing regulations. The movie could jeopardize over 90,000 spouses of H-1B holders.