ಉಡುಪಿ; ದಾರಿಯಲ್ಲಿ ನೋಟು ಎಸೆದು ಆತಂಕ ಸೃಷ್ಟಿಸಿದ ಯುವಕ

ಉಡುಪಿ, ಏಪ್ರಿಲ್ 13: ಕೃಷ್ಣ ಮಠ ಸಮೀಪದ ವಾದಿರಾಜ ರಸ್ತೆಯಲ್ಲಿ ಯುವಕನೊಬ್ಬ ನೋಟಿನ ಕಂತೆ ಎಸೆಯುತ್ತಾ ಕೆಲ ಕಾಲ ಆತಂಕ ಸೃಷ್ಟಿಸಿದ್ದಾನೆ.

ಇಂದು ಯುವಕನೊಬ್ಬ ರಸ್ತೆಯಲ್ಲಿ ಎಲ್ಲೆಂದರಲ್ಲಿ ನೋಟುಗಳನ್ನು ಎಸೆದಿದ್ದಾನೆ. ನೋಟಿನ ಕಟ್ಟುಗಳನ್ನು ಕೈಗಳಲ್ಲಿ ಹಿಡಿದುಕೊಂಡು ಬಂದ ಈ ಯುವಕ ಎರಡು ಸಾವಿರ, ಐನೂರು ಹಾಗೂ ಇನ್ನೂರರ ನೋಟುಗಳನ್ನು ರಸ್ತೆಯಲ್ಲಿ ಚೆಲ್ಲಿಕೊಂಡು ಹೋಗಿದ್ದಾನೆ. ಯುವಕ ನೋಟುಗಳನ್ನು ಎಸೆಯುತ್ತಿದ್ದುದನ್ನು ನೋಡಿದ ಜನ ನೋಟು ತೆಗೆದುಕೊಳ್ಳಲು ಮುಗಿಬಿದ್ದಿದ್ದಾರೆ.

ಆದರೆ ಈ ನೋಟುಗಳೆಲ್ಲವೂ ನಕಲಿ ನೋಟುಗಳೆಂಬುದು ತಿಳಿಯುತ್ತಿದ್ದಂತೆ ಜನ ಕೂಡಲೇ ಯುವಕನನ್ನು ಹಿಡಿಯಲು ಯತ್ನಿಸಿದ್ದಾರೆ. ಯುವಕ ಪರಾರಿಯಾಗಿದ್ದಾನೆ. ಜೆರಾಕ್ಸ್ ಮಾಡಲಾದ ಈ ನಕಲಿ ನೋಟುಗಳನ್ನು ಸಂಗ್ರಹಿಸಿ ನಗರ ಠಾಣಾ ಪೊಲೀಸರಿಗೆ ಒಪ್ಪಿಸಲಾಗಿದೆ.

ಈ ಯುವಕ ಹೀಗೆ ನಕಲಿ ನೋಟುಗಳನ್ನು ಎಸೆಯುತ್ತಿದ್ದ ದೃಶ್ಯ ಉಡುಪಿಯ ವಾದಿರಾಜ ರಸ್ತೆಯಲ್ಲಿರುವ ಮನೆಯಲ್ಲಿದ್ದ ಸಿಸಿಟಿವಿಯಲ್ಲಿ ದಾಖಲಾಗಿದೆ. ಯುವಕ ಮಾಸ್ಕ್ ನಿಂದ ಮುಚ್ಚಿಕೊಂಡು ನಕಲಿ ನೋಟುಗಳನ್ನು ಎಸೆದುಕೊಂಡು ಹೋಗಿರುವುದು ಕಂಡುಬಂದಿದೆ.

English summary

A boy creates panic by throwing duplicate notes in krishna math road of udupi district