ಓಣಂ ಸೀಸನ್ ದಾಖಲೆ: ಮಲ್ಲುಗಳ ಮದ್ಯ ಸೇವನೆ ಚಟಕ್ಕೆ ಮಿತಿಯೇ ಇಲ್ಲ!
ತಿರುವನಂತಪುರಂ, ಸೆ.13: ಕೇರಳಿಗರ ಪ್ರಮುಖ ಹಬ್ಬ ಓಣಂ ಸಂದರ್ಭದಲ್ಲಿ ಮಲ್ಲುಗಳು ಸರಿ ಸುಮಾರು 487 ಕೋಟಿ ರುಗಳನ್ನು ಖರ್ಚು ಮಾಡಿದ್ದಾರೆ.
ಸರ್ಕಾರಿ ಸ್ವಾಮ್ಯದ ಮದ್ಯ ಮಾರಾಟ ಮಳಿಗೆ ನಡೆಸಿದ ಲೆಕ್ಕಾಚಾರದಿಂದ ಈ ಮೊತ್ತ ಸಿಕ್ಕಿದೆ. ಕೇರಳ ರಾಜ್ಯ ಅಬಕಾರಿ ನಿಗಮ(ಕೆಎಸ್ ಬಿಸಿ) ಯಿಂದ ಭಾರತೀಯರಿಂದ ತಯಾರಾದ ವಿದೇಶಿ ಮದ್ಯ(ಐಎಂ ಎಫ್ ಎಲ್) ಗಳನ್ನು ಮಾರಾಟ ಮಾಡಲಾಗುತ್ತದೆ. ಸೆಪ್ಟೆಂಬರ್ 3 ರಿಂದ 10ರ ಅವಧಿಯಲ್ಲಿ ಸುಮಾರು 487 ಕೋಟಿ ರು ಮೌಲ್ಯದ ಮದ್ಯ ಸೇವನೆ ಮಾಡಲಾಗಿದೆ. ಕಳೆದ ವರ್ಷಕ್ಕೆ ಹೋಲಿಸಿದರೆ ಈ ವರ್ಷ 30 ಕೋಟಿ ರು ಅಧಿಕ ವ್ಯಾಪಾರ ನಡೆದಿದೆ.
ಅತಿ ಹೆಚ್ಚು ಕುಡುಕರಿರುವ ಸಾಮ್ರಾಜ್ಯ ಇನ್ನಿಲ್ಲ
ಸೆಪ್ಟೆಂಬರ್ 10ರಂದು ಉತ್ತರಾದಂ ಸಂದರ್ಭದಲ್ಲಿ ಮದ್ಯ ಮಳಿಗೆಗಳು ಸಾಮಾನ್ಯವಾಗಿ ಬಂದ್ ಆಗಿರುತ್ತವೆ, ಆದರೂ ಕದ್ದು ಮುಚ್ಚಿ ಕುಡಿಯುವವರಿಂದ ಆ ದಿನವೂ 90.32 ಕೋಟಿ ರು ಮೌಲ್ಯದ ಮದ್ಯ ಮಾರಾಟವಾಗಿದೆ.
ತ್ರಿಶೂರ್ ಜಿಲ್ಲೆಯ ಇರಿಂಜಲಕುಡದ ಮಳಿಗೆಯೊಂದರಲ್ಲಿ ಒಂದೇ ದಿನ 1.04 ಕೋಟಿ ರು ಮದ್ಯ ಮಾರಾಟವಾಗಿದ್ದು ದಾಖಲೆ ಬರೆದಿದೆ ಎಂದು ಕೆಎಸ್ ಬಿಸಿ ಹೇಳಿದೆ.
ಸೆ. 13ರಂದು 'ಡ್ರೈ ಡೇ' ಆಗಿದೆ. ಸಮಾಜ ಸುಧಾರಕ ನಾರಾಯಣ ಗುರು ಜಯಂತಿ ಅಂಗವಾಗಿ ಮದ್ಯ ಮಾರಾಟ ನಿರ್ಬಂಧಿಸಲಾಗಿದೆ. ಹೀಗಾಗಿ ಗುರುವಾರದಂದು ಮದ್ಯ ಮಳಿಗೆಗಳ ಮುಂದೆ ಸಾಲುಗಟ್ಟಿ ನಿಂತು ಮದ್ಯ ಖರೀದಿಸುವವರ ಸಂಖ್ಯೆ ಹೆಚ್ಚಾಗಿತ್ತು.
ಭಾರತದಲ್ಲಿ ಅತಿ ಹೆಚ್ಚು ಮದ್ಯ ಮಾರಾಟವಾಗುವ ರಾಜ್ಯಗಳ ಪೈಕಿ ಅಗ್ರಪಂಕ್ತಿಯಲ್ಲಿ ಕಾಣಿಸಿಕೊಳ್ಳುವ ಕುಡುಕರ ರಾಜ್ಯ ಕೇರಳದಲ್ಲಿ 2014ರಲ್ಲಿ ಮದ್ಯ ಮಾರಾಟಕ್ಕೆ ನಿಷೇಧ ಹೇರಲಾಗಿತ್ತು. ಉಮ್ಮನ್ ಚಾಂಡಿ ಸರ್ಕಾರ ಸುಮಾರು 700 ಬಾರ್ ಗಳನ್ನು ಬಂದ್ ಮಾಡಿಸುವಲ್ಲಿ ಯಶಸ್ವಿಯಾಗಿತ್ತು. ಆದರೆ, ಲಿಕ್ಕರ್ ಲಾಬಿ ಜೋರಾಗಿ, ಆಡಳಿತ ಪಕ್ಷ ಬದಲಾಗಿ ಎಲ್ ಡಿ ಎಫ್ ಸರ್ಕಾರ ಬರುತ್ತಿದ್ದಂತೆ ಮದ್ಯ ಮಾರಾಟ ಮೇಲಿನ ನಿಷೇಧ ಹಿಂಪಡೆಯಲಾಗಿದೆ. ಮದ್ಯದ ಮೇಲೆ 200% ತೆರಿಗೆ ಹೇರಲಾಗಿದ್ದರೂ ಮಾರಾಟ ಕುಸಿದಿಲ್ಲ, ಕುಡುಕರ ಸಂಖ್ಯೆ ತಗ್ಗಿಲ್ಲ.