ಕೊಡಚಾದ್ರಿ ಬೆಟ್ಟದ ಮೇಲೆ ಹೊಸ ವರ್ಷಾಚರಣೆಗೆ ಬೀಳಬಹುದು ಬ್ರೇಕ್

ಶಿವಮೊಗ್ಗ, ಡಿಸೆಂಬರ್ 27: ಹೊಸನಗರದ ಪ್ರಸಿದ್ಧ ನಿಸರ್ಗಧಾಮ ಕೊಡಚಾದ್ರಿ ಗಿರಿಯ ಮೇಲ್ಭಾಗದಲ್ಲಿರುವ ಸರ್ಕಾರಿ ಪ್ರವಾಸಿ ಮಂದಿರದಲ್ಲಿ ಹೊಸ ವರ್ಷಕ್ಕೆ ಬರಬೇಕೆಂದು ಪ್ಲಾನ್ ಮಾಡಿರುವ ಪ್ರವಾಸಿಗರಿಗೆ ಬ್ರೇಕ್ ಬೀಳುವ ಸಾಧ್ಯತೆ ಇದೆ.

ವರ್ಷಾಂತ್ಯ ಹಾಗೂ ಹೊಸ ವರ್ಷಾಚರಣೆ ನೆಪದಲ್ಲಿ ನಡೆಯುವ ಮೋಜು ಮಸ್ತಿ ಮತ್ತು ಫೈರ್ ಕ್ಯಾಂಪ್ ಗಳಿಂದ ಉಂಟಾಗಬಹುದಾದ ಅನಾಹುತ ತಪ್ಪಿಸಲು ಅರಣ್ಯ ಇಲಾಖೆ ಮುಂದಾಗಿದ್ದು, ಯಾವುದೇ ಕಾರಣಕ್ಕೂ ಪ್ರವಾಸಿ ಗೃಹದಲ್ಲಿ ಪ್ರವಾಸಿಗರಿಗೆ ತಂಗಲು ಅವಕಾಶ ಕೊಡಬಾರದು ಎಂದು ಅರಣ್ಯ ಇಲಾಖೆಯ ಕೊಲ್ಲೂರು ವನ್ಯಜೀವಿ ವಿಭಾಗ ಲೋಕೋಪಯೋಗಿ ಇಲಾಖೆಗೆ ಪತ್ರ ಬರೆದು ಮನವಿ ಮಾಡಿದೆ.

ಸರ್ಕಾರಿ ಅತಿಥಿಗೃಹ ಮಾತ್ರವಲ್ಲದೆ ಗಿರಿಯ ಸುತ್ತಮುತ್ತ ನಡೆಯುವ ಪ್ರವಾಸಿಗರ ಅಟಾಟೋಪಗಳತ್ತ ವನ್ಯಜೀವಿ ಇಲಾಖೆ ಹದ್ದಿನ ಕಣ್ಣಿಟ್ಟಿದೆ. ಕೊಡಚಾದ್ರಿ ಗಿರಿಯ ಸುತ್ತಲಿನ ಪರಿಸರ ಶೋಲಾ ಅರಣ್ಯ ಮತ್ತು ಹುಲ್ಲುಗಾವಲು ಪ್ರದೇಶವಾಗಿದ್ದು, ಕೊಡಚಾದ್ರಿ ಗಿರಿಯ ಹಿತದೃಷ್ಟಿಯಿಂದ ಪ್ರವಾಸಿ ಮಂದಿರದಲ್ಲಿ ತಂಗಲು ನಿರ್ಬಂಧ ಹೇರಬೇಕಾದುದು ಅನಿವಾರ್ಯ ಎಂದು ತಿಳಿಸಿದೆ.

"ಇಲ್ಲಿಗೆ ಬರುವ ಪ್ರವಾಸಿಗರು ಮೋಜು ಮಸ್ತಿ ಮಾಡುತ್ತಿದ್ದು, ಪರಿಸರದಲ್ಲಿ ಫೈರ್ ಕ್ಯಾಂಪ್ ಹಾಕುತ್ತಾರೆ. ಆ ಕಾರಣಕ್ಕಾಗಿ ತಂಗಲು ಅವಕಾಶ ನೀಡಕೂಡದು' ಎಂದು ಇಲಾಖೆ ಸ್ಪಷ್ಟಪಡಿಸಿದೆ. ಡಿ. 28ರಿಂದ 2020ರ ಜನವರಿ 1ರವರಗೆ ಪ್ರವಾಸಿ ಮಂದಿರದಲ್ಲಿ ಪ್ರವಾಸಿಗರಿಗೆ ತಂಗಲು ಅವಕಾಶ ನೀಡದಂತೆ ಪತ್ರ ಮುಖೇನ ಮನವಿ ಮಾಡಿದೆ.

English summary

Visitors who plan to celebrate New Year at the top of Kodachadri hills this time may have to think twice,