ಭೋರ್ಗರೆಯುತ್ತಿದೆ ಜೋಗ, ಈ ಸೊಬಗ ನೋಡಲು ಬಾ ಬೇಗ!

ಶಿವಮೊಗ್ಗ, ಆಗಸ್ಟ್ 16: ಎಂತಹ ಅರಸಿಕನಲ್ಲಿಯೂ ಸೌಂದರ್ಯ ಆರಾಧನೆಯ ಭಾವ ಮೂಡಿಸುವ ಶಕ್ತಿ ಮಲೆನಾಡಿನ ಸೊಬಗಿನ ಜೋಗ ಜಲಪಾತಕ್ಕಿದೆ.

ಬಿರು ಬೇಸಿಗೆಯಲ್ಲಿ ಸಣ್ಣ ಝರಿಯಂತೆ ನೀರು ಧುಮುಕಿದರೂ ಅದರ ಅಂದ ಪ್ರವಾಸಿಗರಿಗೆ ಮುದ ನೀಡುತ್ತದೆ. ಹೀಗಿರುವಾಗ ರಾಜ, ರಾಣಿ, ರೋರರ್ ಮತ್ತು ರಾಕೆಟ್ ಪರಸ್ಪರ ಜಿದ್ದಿಗೆ ಬಿದ್ದವರಂತೆ ತುಂಬಿಕೊಂಡು ನೋಡಿದಷ್ಟೂ ನೋಡಬೇಕೆನಿಸುವ ದೃಶ್ಯ ಮೂಡಿಸಿದೆ.

ನಾಲ್ಕು ವರ್ಷದಲ್ಲಿ ಇದೇ ಮೊದಲ ಬಾರಿಗೆ ಜೋಗ ಜಲಪಾತ ತನ್ನ ವೈಭವವನ್ನು ಮರಳಿ ಪಡೆದುಕೊಂಡಿದೆ. ಲಿಂಗನಮಕ್ಕಿ ಜಲಾಶಯವು ಭರ್ತಿಯಾಗಿರುವುದರಿಂದ 22 ಸಾವಿರ ಕ್ಯುಸೆಕ್ಸ್ ನೀರನ್ನು ಹೊರಬಿಡಲಾಗುತ್ತಿದೆ. ಹನ್ನೊಂದು ಗೇಟ್‌ಗಳ ಪೈಕಿ ಒಂಬತ್ತು ಗೇಟುಗಳನ್ನು ತೆರೆಯಲಾಗಿದೆ.

ಭಾರತದ ಅತ್ಯಂತ ಎತ್ತರದ ಜಲಪಾತ ಎಂದು ಹೆಸರಾಗಿರುವ ಜೋಗದಲ್ಲಿ ಶರಾವತಿ 830 ಅಡಿ ಎತ್ತರದಿಂದ ಮೈದುಂಬಿಕೊಂಡು ನೆಲವನ್ನು ಮುತ್ತಿಕ್ಕುತ್ತಿದ್ದಾಳೆ.

'ಮುಂಗಾರು ಮಳೆ' ಚಿತ್ರದಲ್ಲಿ ಜೋಗವನ್ನು ಸೆರೆಹಿಡಿದ ಬಗೆ ಅನನ್ಯ. ಅದರಿಂದ ಪ್ರೇರಣೆಗೊಂಡ ಅನೇಕರು ವಿವಿಧ ಕೋನಗಳಿಂದ ಜೋಗದ ಜನಸಿರಿಯನ್ನು ತಮ್ಮ ಕ್ಯಾಮೆರಾ, ಮೊಬೈಲ್ ಫೋನ್‌ಗಳನ್ನು ಚಿತ್ರಿಸುತ್ತಿದ್ದಾರೆ. ಎಎನ್‌ಐ ಸುದ್ದಿ ಸಂಸ್ಥೆ ಬಿಡುಗಡೆ ಮಾಡಿರುವ ಈ ವಿಡಿಯೋ ದೇಶದಾದ್ಯಂತ ವೈರಲ್ ಆಗುತ್ತಿದೆ.

#WATCH Visuals of Jog falls in Karnataka's Shimoga during monsoon pic.twitter.com/q2jRMRUXzR

— ANI (@ANI) 15 August 2018

ಲಿಂಗನಮಕ್ಕಿ ಜಲಾಶಯದ ಗರಿಷ್ಠ ಸಾಮರ್ಥ್ಯ 1819 ಅಡಿ. ಮಲೆನಾಡಿನಲ್ಲಿ ಉತ್ತರ ಮಳೆಯಾಗುತ್ತಿರುವುದರಿಂದ ಜಲಾಶಯ ತುಂಬಿಕೊಳ್ಳುತ್ತಿದ್ದು, 1815 ಅಡಿ ನೀಡು ಸಂಗ್ರಹವಾಗಿದೆ. 1964 ರಲ್ಲಿ ಅಣೆಕಟ್ಟು ನಿರ್ಮಾಣವಾದ ಬಳಿಕ ಇದುವರೆಗೂ 13 ಬಾರಿ ಮಾತ್ರ ಜಲಾಶಯ ಭರ್ತಿಯಾಗಿದ್ದು, 2014ರಲ್ಲಿ ಕೊನೆಯ ಬಾರಿ ಜಲಾಶಯದ ಒಡಲು ತುಂಬಿಕೊಂಡಿತ್ತು.

ವಿಪರೀತ ಮಳೆ, ಥಂಡಿ ವಾತಾವರಣ, ರಸ್ತೆ ಸಂಪರ್ಕದ ಸಮಸ್ಯೆಗಳ ಹೊರತಾಗಿಯೂ ಜೋಗದ ವೈಭವವನ್ನು ಕಣ್ತುಂಬಿಕೊಳ್ಳಲು ಪ್ರವಾಸಿಗರ ದಂಡು ಅತ್ತ ದೌಡಾಯಿಸುತ್ತಿದೆ.

English summary

Jog Falls roars in full glory for the first time in 4 years. 9 out of 11 gates of Linganamakki reservoir opened, 22,000 cusecs of water have been released.