ಲೋಕಸಭಾ ಚುನಾವಣೆ: ಜನ ಸಂಪರ್ಕಕ್ಕಾಗಿ ಬಿಜೆಪಿಯಿಂದ ಪಾದಯಾತ್ರೆಯ ತಂತ್ರ

ನವದೆಹಲಿ, ನವೆಂಬರ್ 28: 2019 ರ ಲೋಕಸಭಾ ಚುನಾವಣೆಗೆ ಇಂದಿನಿಂದಲೇ ತಯಾರಿ ಆರಂಭಿಸಿರುವ ಬಿಜೆಪಿ ಜನಸಂಪರ್ಕಕ್ಕಾಗಿ ಪಾದಯಾತ್ರೆಯ ತಂತ್ರವನ್ನು ಅನುಸರಿಸಲು ನಿರ್ಧರಿಸಿದೆ.

ಪಕ್ಷದ ಪ್ರತಿ ಮಂಡಲ ವಿಭಾಗದಿಂದ 10 ಕಿಮೀ ದೂರದವರೆಗೆ ಪಾದಯಾತ್ರೆ ಕೈಗೊಳ್ಳುವ ಮೂಲಕ ಆ ಭಾಗದ ಮತದಾರರನ್ನು ಸೆಳೆಯುವ ತಂತ್ರಕ್ಕೆ ಬಿಜೆಪಿ ಕೈಹಾಕಿದೆ.

ಆಯಾ ಕ್ಷೇತ್ರದ ಮುಖಂಡರು, ಕಾರ್ಯಕರ್ತರು, ಶಾಸಕರು, ಸಂಸದರು ಸೇರಿದಂತೆ ಸುಮಾರು 50-60 ಬಿಜೆಪಿ ಸದಸ್ಯರು ಮಂಡಲ ವಿಭಾಗದಿಂದ ಪಾದಯಾತ್ರೆ ಆರಂಭಿಸುವುದು. 10 ಕಿಮೀ ದೂರದಲ್ಲಿರುವ ಒಂದು ನಿರ್ದಿಷ್ಟ ಕೇಂದ್ರಕ್ಕೆ ತಲುಪುವರೆಗೂ ಜನರಲ್ಲಿ ಕೇಂದ್ರ ಎನ್ ಡಿಎ ಸರ್ಕಾರದ ಸಾಧನೆಗಳನ್ನು, ಮತ್ತು ಮುಂಬರುವ ಚುನಾವಣೆಯ ನಂತರ ಹಾಕಿಕೊಂಡಿರುವ ಯೋಜನೆಗಳನ್ನು ಮನಮುಟ್ಟುವಂತೆ ಪರಿಚಯಿಸುವುದು.

ಈ ಯೋಜನೆ 15 ದಿನಗಳ ಕಾಲ ನಡೆಯಲಿದ್ದು, ಇದೇ ಡಿಸೆಂಬರ್ 1 ರಿಂದ 15 ರವರೆಗೆ ನಡೆಯಲಿದೆ ಎಂದು ಮೂಲಗಳು ತಿಳಿಸಿವೆ. ಪ್ರತಿ ಮಂಡಲದಲ್ಲೂ ಒಂದು ತಂಡವನ್ನು ರಚಿಸಿ, ಅದಕ್ಕೆ ಪ್ರತಿದಿನವೂ ಒಬ್ಬೊಬ್ಬ 'ದಿವಸ್ ಪ್ರಮುಖ್' ಎಂಬ ಹೆಸರಿನಲ್ಲಿ ಮುಖ್ಯಸ್ಥರನ್ನು ನೇಮಿಸಲಾಗುತ್ತದೆ. ಈ ಯಾತ್ರೆಗೆ ಅಗತ್ಯವಿರುವ ಎಲ್ಲಾ ತಯಾರಿಯನ್ನೂ ಬಿಜೆಪಿ ಈಗಾಗಲೇ ಮಾಡಿಕೊಂಡಿದೆ.

ಆಯಾ ಪ್ರದೇಶದ ಬಿಜೆಪಿ ಮುಖಂಡರ ಮನೆಯಲ್ಲೇ ರಾತ್ರಿ ನಾಯಕರು ತಂಗಲಿದ್ದು, ಅಲ್ಲಿನ ಜನರಿಗೆ ಸರ್ಕಾರದ ಬಗೆಗಿರುವ ಪ್ರತಿಕ್ರಿಯೆಯನ್ನು ಕಲೆಹಾಕುವ ಕೆಲಸವನ್ನೂ ಮಾಡುತ್ತಾರೆ. 2019 ರ ಲೋಕಸಭಾ ಚುನಾವಣೆಯಲ್ಲಿ ಬಿಜೆಪಿಯ ಈ ಪಾದಯಾತ್ರೆ ಫಲನೀಡುತ್ತದೆಯೇ ಎಂಬುದನ್ನು ಕಾದುನೋಡಬೇಕಿದೆ.

English summary

The Bharatiya Janata Party (BJP) wants to keep its workers motivated till at least 2019 Lok Sabha elections. So in one such move, the party will be organising around 10-lilometre-long padyatra from every mandal to another important designated location in the city to connect with the people,