ಜ್ವರದ ನಡುವೆಯೂ ಧ್ವಜಾರೋಹಣ ನೆರವೇರಿಸಿದ ಅಡ್ವಾಣಿ

ನವದೆಹಲಿ, ಆಗಸ್ಟ್ 15: ತೀವ್ರ ಜ್ವರದಿಂದ ಬಳಲುತ್ತಿದ್ದರೂ ಸ್ವಾತಂತ್ರ್ಯ ದಿನದಂದು ತಮ್ಮ ಮನೆಯಲ್ಲಿ ಧ್ವಜಾರೋಹಣ ಮಾಡುವ ಸಂಪ್ರದಾಯವನ್ನು ಮಾಜಿ ಉಪ ಪ್ರಧಾನಿ ಎಲ್‌ಕೆ ಅಡ್ವಾಣಿ ಅವರು ಮರೆಯಲಿಲ್ಲ. ವೈರಲ್ ಜ್ವರದಿಂದ ಬಳಲುತ್ತಿರುವ ಅವರು, ಗುರುವಾರ ಮನೆಯಲ್ಲಿ ತ್ರಿವರ್ಣ ಧ್ವಜಾರೋಹಣ ನೆರವೇರಿಸಿದರು.

ಆದರೆ, ಹಲವು ದಶಕಗಳಿಂದ ಪ್ರತಿ ಬಾರಿ ತಪ್ಪದೇ ಕೆಂಪುಕೋಟೆಗೆ ಹೋಗಿ ಧ್ವಜಾರೋಹಣದ ವೇಳೆ ಪಾಲ್ಗೊಳ್ಳುತ್ತಿದ್ದ ಅವರು, ಈ ಬಾರಿ ಅಲ್ಲಿಗೆ ತೆರಳಲು ಸಾಧ್ಯವಾಗಲಿಲ್ಲ. ಇದೇ ಮೊದಲ ಬಾರಿಗೆ ಅವರು ಕೆಂಪುಕೋಟೆಯ ಸ್ವಾತಂತ್ರ್ಯ ಸಂಭ್ರಮಕ್ಕೆ ಗೈರು ಹಾಜರಾದರು.

91 ವರ್ಷದ ಅಡ್ವಾಣಿ ಅವರು ಜ್ವರದಿಂದ ಬಳಲುತ್ತಿರುವ ಕಾರಣ ತಮ್ಮ ನಿವಾಸದಲ್ಲಿ ಧ್ವಜಾರೋಹಣ ನೆರವೇರಿಸುವುದಿಲ್ಲ ಎಂದು ಬುಧವಾರ ಅವರ ಕಚೇರಿ ತಿಳಿಸಿತ್ತು. ಆದರೆ, ಆರೋಗ್ಯದಲ್ಲಿ ಸ್ವಲ್ಪ ಚೇತರಿಕೆ ಕಂಡುಬಂದಿದ್ದರಿಂದ ಅವರು ಹಲವು ವರ್ಷಗಳಿಂದ ಪಾಲಿಸಿಕೊಂಡುಬಂದಿರುವ ತಮ್ಮ ಸಂಪ್ರದಾಯವನ್ನು ನೆರವೇರಿಸಿದರು.

'ಅವರ ಆರೋಗ್ಯದಲ್ಲಿ ಚೇತರಿಕೆ ಕಂಡುಬಂದಿದೆ. ಹೀಗಾಗಿ ಧ್ವಜಾರೋಹಣ ಕಾರ್ಯಕ್ರಮ ನೆರವೇರಿಸಲು ನಿರ್ಧರಿಸಿದೆವು' ಎಂದು ಅವರ ಕುಟುಂಬದ ಮೂಲಗಳು ತಿಳಿಸಿವೆ.

English summary

BJP Senior leader LK Advani unfurls the national flag in his residence on Independence Day despite suffering from viral fever.