ಸಾಕು ನಾಯಿ ಹುಡುಕಿಕೊಟ್ಟವಳಿಗೆ ಸಿಕ್ಕಿದ್ದ ಬಹುಮಾನ 2 ಲಕ್ಷ ರು.!
ಗುರ್ ಗಾಂವ್, ಮೇ 9: ತಮ್ಮ ಜೀವಕ್ಕಿಂತಲೂ ಹೆಚ್ಚು ಪ್ರೀತಿಸುತ್ತಿದ್ದ ಸಾಕು ನಾಯಿಯನ್ನು ಹುಡುಕಿಕೊಟ್ಟ ಹುಡುಗಿಯೊಬ್ಬಳಿಗೆ ಅದರ ಮಾಲೀಕರು ನೀಡಲು ಹೊರಟಿದ್ದು 2 ಲಕ್ಷ ರು.! ಆದರೆ, ಆ ಹುಡುಕಿಕೊಟ್ಟ ಹುಡುಗಿ ಅದನ್ನು ನಯವಾಗಿ ತಿರಸ್ಕರಿಸಿ ಮೇರು ಗುಣ ಪ್ರದರ್ಶಿಸಿರುವುದು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.
ಇದೇ ವರ್ಷ ಜನವರಿಯಿಂದ ಆಸ್ಟ್ರೇಲಿಯಾ ಮೂಲದ ವೆನಸ್ ಗ್ರೀನ್ ಹಾಗೂ ರಿಕ್ ಗ್ರೀನ್ ಎಂಬ ದಂಪತಿಗಳು ಗುರ್ ಗಾಂವ್ ನ ಐರಿಯೋ ಅಪ್ ಟೌನ್ ಸೆಕ್ಟರ್ 66ನಲ್ಲಿ ವಾಸವಾಗಿದ್ದಾರೆ. ಆದರೆ, ಅವರ ಸಾಕು ನಾಯಿಯಾದ ರೆಕ್ಸಿ ಭಾನುವಾರ (ಮೇ 7ರಿಂದ) ಕಾಣೆಯಾಗಿತ್ತು. ಆಗ, ಆ ದಂಪತಿ ಊರೆಲ್ಲಾ ಪೋಸ್ಟರ್ ಅಂಟಿಸಿದ್ದಲ್ಲದೆ, ನಾಯಿ ಹುಡುಕಿಕೊಟ್ಟವರಿಗೆ 2 ಲಕ್ಷ ರು. ಇನಾಮು ನೀಡುವುದಾಗಿಯೂ ಹೇಳಿದ್ದರಂತೆ.
ಪೋಸ್ಟರ್ ನೋಡಿದವರು ಹಲವಾರು ಮಂದಿ ಆಸೀಸ್ ದಂಪತಿಗೆ ಫೋನು ಮಾಡಿ ಕೆಲವಾರು ನಾಯಿಗಳ ಬಗ್ಗೆ ಮಾಹಿತಿ ದೊರೆತರೂ ಅವು ತಮ್ಮ ರೆಕ್ಸಿ ಅಲ್ಲ ಎಂಬುದು ಈ ದಂಪತಿಯನ್ನು ಮತ್ತಷ್ಟು ಕಂಗೆಡಿಸಿತ್ತು.
ಆದರೆ, ಮಂಗಳವಾರ ಮಧ್ಯಾಹ್ನ ಭಾರತದ ಮೂಲದ ಜಾತಿಯ ಈ ನಾಯಿಯನ್ನು ಸಿಸ್ಪಾಲ್ ವಿಹಾರ್ ನ 49ನೇ ಸೆಕ್ಟರ್ ನಲ್ಲಿ ವಾಸವಿರುವ ಹುಡುಗಿಯೊಬ್ಬಳು ಹುಡುಕಿ ತಂದುಕೊಟ್ಟಿದ್ದಾಳೆ.
ಇದರಿಂದ ಸಂತುಷ್ಟರಾದ ಆಸೀಸ್ ದಂಪತಿ, ಆ ಹುಡುಗಿಗೆ ಮೊದಲೇ ಘೋಷಿಸಿದ್ದಂತೆ 2 ಲಕ್ಷ ರು. ಇನಾಮು ನೀಡಲು ಮುಂದಾದರೆ ಆ ಹುಡುಗಿ ಅದನ್ನು ನಿರಾಕರಿಸಿದ್ದಾಳಂತೆ.