ಸರ್ಕಾರಿ ಕಚೇರಿಗಳಲ್ಲಿ ಜಿಮೇಲ್, ಯಾಹೂಗೆ ನಿಷೇಧ
ಕೇಂದ್ರ ಸರ್ಕಾರದ ಮಾಹಿತಿ ಮತ್ತು ತಂತ್ರಜ್ಞಾನ ಖಾತೆ ಸರ್ಕಾರಿ ಕಚೇರಿಗಳಲ್ಲಿ ಈ ಮೇಲ್ ಬಳಕೆ ನಿಷೇಧಿಸುವ ಕುರಿತು ಕರಡು ಪ್ರತಿ ಸಿದ್ಧಗೊಳಿಸಿದೆ. ಅದರಂತೆ ಕೇಂದ್ರ ಮತ್ತು ರಾಜ್ಯ ಸರ್ಕಾರಿ ಕಚೇರಿಗಳಲ್ಲಿ ಜಿ ಮೇಲ್, ಯಾಹೂ ಸೇರಿದಂತೆ ವಿವಿಧ ಇಮೇಲ್ ಬಳಕೆ ನಿಷೇಧಿಸಲಾಗುತ್ತದೆ. ಸರ್ಕಾರಿ ಇಲಾಖೆಗಳು ರಾಷ್ಟ್ರೀಯ ಸೂಚನಾ ಕೇಂದ್ರದ (ಎನ್ ಐಸಿ) ಮೂಲಕ ತಮ್ಮ ಇ ಮೇಲ್ ಕಳಿಸಬೇಕಾಗಿದೆ.
ಈ ಪ್ರಸ್ತಾವನೆ ಸದ್ಯ ಪ್ರಾಯೋಗಿಕ ಹಂತದಲ್ಲಿದ್ದು, ವರ್ಷಾಂತ್ಯದಲ್ಲಿ ಜಾರಿಗೆ ಬರಬಹುದು ಎಂದು ಅಂದಾಜಿಸಲಾಗಿದೆ. ಈ ನೀತಿ ಜಾರಿಗೆ ಬಂದರೆ ಕಡ್ಡಾಯವಾಗಿ ಸರ್ಕಾರಿ ನೌಕರರು ಎನ್ ಐಸಿ ಮೂಲಕವೇ ಇಮೇಲ್ ವ್ಯವಹಾರ ನಡೆಸಬೇಕಾಗುತ್ತದೆ. ಕೇಂದ್ರ ಮತ್ತು ರಾಜ್ಯ ಸರ್ಕರದ ಸುಮಾರು 5-6 ಲಕ್ಷ ಜನರು ಈ ಯೋಜನೆ ವ್ಯಾಪ್ತಿಗೆ ಒಳಪಡಲಿದ್ದಾರೆ ಎಂದು ಮಾಹಿತಿ ಸಂಗ್ರಹಿಸಲಾಗಿದೆ.
ಕೇಂದ್ರ ಸರ್ಕಾರ ಎನ್ ಐಸಿಗೆ ಅಗತ್ಯ ಮೂಲಭೂತ ಸೌಲಭ್ಯಗಳನ್ನು ಒದಗಿಸಲು 4 ಅಥವ 5 ಕೋಟಿ ಅನುದಾನ ಒದಗಿಸಲು ಕೇಂದ್ರ ಸರ್ಕಾರ ಸಿದ್ಧತೆ ನಡೆಸಿದೆ. ಆದರೆ, ನೀತಿ ಜಾರಿಗೆ ಬಂದ ನಂತರ ಸರ್ಕಾರಿ ಮಾಹಿತಿಗಳನ್ನು ಸಂಗ್ರಹಿಸಲು, ಇ ಮೇಲ್ ಸೇವೆ ಒದಗಿಸಲು ಉಪಕರಣಗಳ ಖರೀದಿಗಾಗಿ ಸುಮಾರು 50 ಕೋಟಿ ಅನುದಾನಬೇಕಾಗಬಹುದು ಎಂದು ಪ್ರಸ್ತಾವನೆ ರಚಿಸಲಾಗಿದೆ.
ಜಿಮೇಲ್, ಯಾಹೂ, ಹಾಟ್ ಮೇಲ್ ಮುಂತಾದವುಗಳ ಮೂಲಕ ಸರ್ಕಾರಿ ಮಾಹಿತಿಗಳನ್ನು ಇಮೇಲ್ ಕಳಿಸಲಾಗುತ್ತಿದೆ. ವಿವಿಧ ಇಲಾಖೆಗಳು ಇದನ್ನು ಬಳಸುತ್ತಿವೆ. ಆದರೆ, ಇದು ಹ್ಯಾಕರ್ ಗಳ ಕೈ ಸೇರುತ್ತಿರುವುದರಿಂದ ಸರ್ಕಾರ ಎನ್ ಐಸಿ ಮೂಲಕ ಸರ್ಕಾರಿ ಮಾಹಿತಿಗಳನ್ನು ಇಮೇಲ್ ಕಳುಹಿಸುವುದನ್ನು ಕಡ್ಡಾಯಗೊಳಿಸಲು ಚಿಂತನೆ ಯೋಜನೆ ರೂಪಿಸಿದೆ.