ವೈರಸ್ ಪತ್ತೆಗೆ ಮೈಸೂರಿಗೂ ಬಂತು ಲ್ಯಾಬ್ ಆನ್ ವ್ಹೀಲ್
ಮೈಸೂರು, ಅಕ್ಟೋಬರ್ 29: ಹೈಟೆಕ್ ಸಿಟಿಗಳಲ್ಲಿ ಮಾತ್ರ ಕಾಣಿಸುತ್ತಿದ್ದ ಮೊಬೈಲ್ ಲ್ಯಾಬ್ ವಾಹನ ಈಗ ಮೈಸೂರಿಗೂ ಬಂದಿದೆ. ಲ್ಯಾಬ್ ಆನ್ ವ್ಹೀಲ್ ಎಂಬ ಹೆಸರಿನ ಸಂಚಾರಿ ಲ್ಯಾಬ್ ಗೆ ಇಂದು ಚಾಲನೆ ನೀಡಲಾಗಿದೆ.
ಮೈಸೂರಿನ ಆಟೋಮೋಟಿವ್ ಎಕ್ಸೆಲ್ ಕಂಪನಿಯು ಸುಮಾರು 80 ಲಕ್ಷ ರೂಪಾಯಿ ವೆಚ್ಚದ ಈ ವಾಹನವನ್ನು ಸಾರ್ವಜನಿಕರ ಸೇವೆಗೆ ಅರ್ಪಿಸಿದೆ. ಕೊರೊನಾ ವೈರಾಣು ಸೇರಿದಂತೆ ಅಣುಜೀವಿಗಳು, ವೈರಾಣುಗಳು ಮತ್ತು ಶಿಲೀಂಧ್ರಗಳಿಂದ ಹರಡುವ ರೋಗಗಳ ಪತ್ತೆಗೆ ಅನುಕೂಲವಾಗುವ ಸಂಚಾರಿ ಪ್ರಯೋಗಾಲಯವನ್ನು ಕನ್ನಡಿಗ ಉದ್ಯಮಿಗಳು ಸಿದ್ಧಪಡಿಸಿದ್ದಾರೆ.
ರಸ್ತೆಗಿಳಿದ ಉತ್ತರ ಕರ್ನಾಟಕದ ಮೊದಲ ಸಂಚಾರಿ ಪ್ರಾಣಿ ಚಿಕಿತ್ಸಾಲಯ
ಈ ಸಂಚಾರಿ ಪ್ರಯೋಗಾಲಯ ಗಾಲಿ ಮೇಲೆ ರೋಗಾಣು ಪತ್ತೆ ಮಾಡುವುದಾಗಿದೆ. ಗ್ರಾಮೀಣ ಪ್ರದೇಶದ ಜನರು ಮತ್ತು ರೋಗ ಪರೀಕ್ಷೆ ಮಾಡುವ ವ್ಯವಸ್ಥೆ ಇಲ್ಲದ ಪ್ರದೇಶಗಳ ಮಂದಿಗೆ ಈ ಲ್ಯಾಬ್ ವರದಾನವಾಗಲಿದೆ. ವೈದ್ಯರು, ಎಂಜಿನಿಯರ್ ಗಳು ಹಾಗೂ ಉದ್ಯಮಶೀಲರ ಜಂಟಿ ಕೊಡುಗೆ ಇದಾಗಿದೆ. ರೋಗ ಪರೀಕ್ಷೆಯ ವ್ಯವಸ್ಥೆಗಳಿಲ್ಲದ ಜಿಲ್ಲೆ, ತಾಲೂಕು ಕೇಂದ್ರಗಳಿಗೆ ಇದನ್ನು ಒದಗಿಸುವ ಇರಾದೆ ಸಂಸ್ಥೆಯದು.
ಈ ಪ್ರಯೋಗಾಲಯವನ್ನು ಜಿಲ್ಲಾ ಕೇಂದ್ರಗಳಾಗಲಿ, ಇತರ ಜಾಗಗಳಿರಲಿ, ಬೇಕಾದ ಜಾಗಕ್ಕೆ, ಜೀಪ್ ಇಲ್ಲವೇ ಟ್ರ್ಯಾಕ್ಟರ್ ಗಳ ಮೂಲಕ ಎಳೆದುಕೊಂಡು ಹೋಗಲು ಸಾಧ್ಯವಾಗುವಂತೆ ಅತ್ಯಾಧುನಿಕ ಟ್ರೈಲರ್ ಗಳ ಮೇಲೆ ಈ ಪ್ರಯೋಗಾಲಯವನ್ನು ಸ್ಥಾಪಿಸಲಾಗಿದೆ.