ಮೈಸೂರ್ ಟು ಮುಂಬೈ ಸಂಚಾರಕ್ಕೆ ವಿಶೇಷ ಐಶಾರಾಮಿ ಬಸ್
ಮೈಸೂರು, ಜೂನ್ 11: ರಾಜ್ಯ ರಸ್ತೆ ಸಾರಿಗೆ ಸಂಸ್ಥೆಯು ಮೈಸೂರಿನಿಂದ ಪ್ರತಿನಿತ್ಯ ಮುಂಬೈಗೆ ಅಂತರರಾಜ್ಯ ಐಶಾರಾಮಿ ಬಸ್ ಸೌಲಭ್ಯ ಆರಂಭಿಸಿದೆ. ಮೈಸೂರು ಗ್ರಾಮಾಂತರ ವಿಭಾಗದ ವತಿಯಿಂದ ಐರಾವತ ಅಂಬಾರಿ ಡ್ರೀಮ್ ಕ್ಲಾಸ್ ಮಾದರಿಯ ಎಸಿ ಸ್ಲೀಪರ್ ವಾಹನಕ್ಕೆ ಚಾಲನೆ ನೀಡಲಾಗಿದೆ. ಈ ಹಿಂದೆ ಐರಾವತ ಕ್ಲಬ್ ಕ್ಲಾಸ್ ಸೌಲಭ್ಯವಿತ್ತು.
ಪಾಸ್ ಇಲ್ಲದ ವಿದ್ಯಾರ್ಥಿಗಳಿಗೂ ಕೆಎಸ್ಆರ್ ಟಿಸಿಯಲ್ಲಿ ಉಚಿತ ಪ್ರಯಾಣ
ನಿತ್ಯ ಮಧ್ಯಾಹ್ನ 1 ಗಂಟೆಗೆ ಮೈಸೂರಿನಿಂದ ಹೊರಟು ಕೆ.ಆರ್.ಪೇಟೆ, ಶ್ರವಣಬೆಳಗೊಳ, ಅರಸೀಕೆರೆ, ಶಿವಮೊಗ್ಗ, ಹರಿಹರ, ಹಾವೇರಿ, ಹುಬ್ಬಳ್ಳಿ, ಬೆಳಗಾವಿ, ಕೊಲ್ಲಾಪುರ, ಪುಣೆ ಮಾರ್ಗವಾಗಿ ಮಾರನೇ ದಿನ ಬೆಳಿಗ್ಗೆ 9 ಗಂಟೆಗೆ ಮುಂಬೈ ತಲುಪುತ್ತದೆ. ಹಾಗೆಯೇ, ಮುಂಬೈನಿಂದ ಮಧ್ಯಾಹ್ನ 1 ಗಂಟೆಗೆ ಹೊರಟು ಮಾರನೇ ದಿನ ಬೆಳಿಗ್ಗೆ 9ಕ್ಕೆ ಮೈಸೂರಿಗೆ ಬರಲಿದೆ. 1,100 ಕಿ.ಮೀ ದೂರದ, 20 ಗಂಟೆ ಅವಧಿಯ ಒಂದು ಕಡೆಯ ಪ್ರಯಾಣ ದರ 2,000 ರೂಪಾಯಿ ಇರಲಿದೆ. ಈ ಬಸ್ 40 ಸೀಟುಗಳ ಸೌಲಭ್ಯ ಹೊಂದಿದೆ.
ಕೇಂದ್ರ ಕಚೇರಿಯಿಂದ ನೂತನ ಎರಡು ಐಶಾರಾಮಿ ಬಸ್ಗಳನ್ನು ಒದಗಿಸಲಾಗಿದೆ. ಆ ಎರಡೂ ಬಸ್ಗಳು ಮೈಸೂರು-ಮುಂಬೈ ಮಧ್ಯೆ ಸಂಚರಿಸಲಿವೆ. ಮೊದಲ ದಿನವೇ ಎಲ್ಲಾ ಸೀಟುಗಳು ಭರ್ತಿಯಾಗಿದ್ದವು. ಸದ್ಯ ಇರುವ ಐರಾವತ ಸ್ಲೀಪರ್ ಕೋಚ್ ಸೇವೆಯನ್ನು ಡ್ರೀಮ್ ಸೇವೆಯನ್ನಾಗಿ ಪರಿವರ್ತಿಸುವ ಉದ್ದೇಶ ಹೊಂದಿದ್ದು, ಮುಂದೆ ಚೆನ್ನೈ, ಹೈದರಾಬಾದ್, ಬೆಳಗಾವಿ ಇನ್ನಿತರ ಕಡೆಗಳಿಗೆ ಡ್ರೀಮ್ ಕ್ಲಾಸ್ ಬಸ್ ಗಳನ್ನು ಪರಿಚಯಿಸುವ ಉದ್ದೇಶವಿದೆ ಎಂದು ಕೆಎಸ್ ಆರ್ ಟಿಸಿ ಗ್ರಾಮಾಂತರ ಡಿಸಿ ಅಶೋಕ್ ತಿಳಿಸಿದ್ದಾರೆ.