ಹೊಸ ವರುಷಕ್ಕೆ ಮೈಸೂರಿನ ಜನ ಸವಿಯಬಹುದು ತಿರುಪತಿ ಮಾದರಿ ಲಾಡು
Recommended Video
ಮೈಸೂರು, ಡಿಸೆಂಬರ್ 27 : ಹೊಸ ವರ್ಷದ ಪ್ರಯುಕ್ತ ಮೈಸೂರಿನ ಯೋಗಾನರಸಿಂಹ ದೇವಸ್ಥಾನವು ತಿರುಪತಿಯಲ್ಲಿ ಮಾಡುವ ರೀತಿಯಲ್ಲಿ 2 ಲಕ್ಷ ಲಾಡುಗಳನ್ನು ಸಾರ್ವಜನಿಕರಿಗೆ ವಿತರಿಸಲು ಸಿದ್ಧತೆ ಮಾಡಿಕೊಳ್ಳುತ್ತಿದೆ. 1994ರಿಂದಲೂ ನೂತನ ವರ್ಷದ ಸಂಭ್ರಮದಲ್ಲಿ ದೇವಸ್ಥಾನದ ವತಿಯಿಂದ ಲಾಡುಗಳನ್ನು ವಿತರಿಸಲಾಗುತ್ತಿದೆ.
ಚಾಮುಂಡೇಶ್ವರಿ ದೇವಿಯ ತಂಗಿ ಚಿಕ್ಕದೇವಮ್ಮನ ನೆಲೆ ಗೊತ್ತಾ?
ಆರಂಭದಲ್ಲಿ 1 ಸಾವಿರ ಲಾಡು ವಿತರಣೆ ಮಾಡಲಾಗಿತ್ತು. ನಾಲ್ಕು ವರ್ಷಗಳಿಂದ 1 ಲಕ್ಷ ಲಾಡುಗಳನ್ನು ನೀಡಲಾಗುತ್ತಿತ್ತು. ಈ ವರ್ಷ 2 ಲಕ್ಷ ಲಾಡುಗಳನ್ನು ವಿತರಿಸಲು ಸಿದ್ಧತೆ ಮಾಡಲಾಗಿದೆ. 1500 ಗ್ರಾಂ ತೂಕದ 5 ಸಾವಿರ ಲಾಡು, 100 ಗಾಂ ತೂಕದ 2 ಲಕ್ಷ ಲಾಡುಗಳನ್ನು ವಿತರಿಸಲಾಗುವುದು.
ಈ ಕುರಿತಾಗಿ ಮಾಹಿತಿ ನೀಡಿದ ಭಾಷ್ಯಂ ಸ್ವಾಮೀಜಿ, ಜನವರಿ 1ರಂದು ಯೋಗಾನರಸಿಂಹ ಸ್ವಾಮಿಗೆ ವಿಶೇಷ ಪೂಜೆ ಸಲ್ಲಿಸಿದ ಬಳಿಕ ತಿರುಪತಿ ಮಾದರಿಯ 2 ಲಕ್ಷ ಲಾಡುಗಳನ್ನು ಬೆಳಗ್ಗೆ 4ರಿಂದ ಮಧ್ಯಾಹ್ನ 12ರವರೆಗೆ ವಿತರಿಸಲಾಗುವುದು ಎಂದು ತಿಳಿಸಿದರು.
ಲಾಡುಗಳನ್ನು ತಯಾರಿಸಲು 50 ಮಂದಿ ನುರಿತ ಬಾಣಸಿಗರು ಡಿಸೆಂಬರ್ 21ರಿಂದ ಕಾರ್ಯ ನಿರತರಾಗಿದ್ದಾರೆ. ಲಾಡು ತಯಾರಿಸಲು 50 ಕ್ವಿಂಟಲ್ ಕಡ್ಲೇಹಿಟ್ಟು, 100 ಕ್ವಿಂಟಲ್ ಸಕ್ಕರೆ, 4 ಸಾವಿರ ಲೀಟರ್ ಖಾದ್ಯ ತೈಲ, 100 ಕೆ.ಜಿ. ಗೋಡಂಬಿ, 100 ಕೆ.ಜಿ. ಒಣದ್ರಾಕ್ಷಿ, 50 ಕೆ.ಜಿ. ಬಾದಾಮಿ, 50 ಕೆ.ಜಿ. ಡೈಮಂಡ್ ಸಕ್ಕರೆ, 10 ಕೆ.ಜಿ. ಪಿಸ್ತಾ, 20 ಕೆ.ಜಿ. ಏಲಕ್ಕಿ, 20 ಕೆ.ಜಿ. ಜಾಕಾಯಿ ಮತ್ತು ಜಾಪತ್ರೆ, 5 ಕೆ.ಜಿ. ಪಚ್ಚೆ ಕರ್ಪೂರ, 50 ಕೆ.ಜಿ. ಲವಂಗ ಬಳಸಲಾಗಿದೆ ಎಂದು ಮಾಹಿತಿ ನೀಡಿದರು.